கணினியில் தமிழ் எழுத்துக்கு அதிக இடம்

தற்போதைய நிலையில் தமிழ் எழுத்துகள் அனைத்தும் கணிப்பொறி சாஃப்ட்வேரில் பதிவு செய்யப்படவில்லை. ஓர் எழுத்துக்கு இரு இயக்கம் தேவைப்படுகிறது. ஆனால், தற்போது அதற்கான இடம் இல்லை. ஓர் எழுத்தைப் பதிவு செய்ய கணினி இயக்க முறையில் (ஆபரேட்டிங் சிஸ்டம்) இடர்ப்பாடு உள்ளது.

இக்குறையைப் போக்க தற்போதுள்ள இடங்களைவிடக் கூடுதலான இடம் தேவை என்று வல்லுநர்கள் வலியுறுத்தி வருகின்றனர். 1999-ம் ஆண்டு நடைபெற்ற தமிழ் இணைய மாநாட்டில் (தமிழ் நெட் 99) இது விரிவாக விவாதிக்கப்பட்டது.

அமெரிக்காவில் உள்ள "யூனிகோட்' கன்சார்டியம் தமிழ் எழுத்துகளுக்கு கணினி சாஃப்ட்வேரில் இடம் அளிக்கும். இது குறித்து அந்தக் கூட்டமைப்பின் கவனத்துக்கு எடுத்துச் செல்லப்பட்டது. அதன்படி அதிக தரக் குறியீட்டை (பிட்) பெறவேண்டும்.

அவ்வாறு அதிக இடம் அளிப்பதன் நன்மை, தீமைகளை ஆராய பணிக் குழு அமைக்கப்பட்டது. அக்குழு விரிவாக விவாதித்து, பல்வேறு சோதனைகளையும் மேற்கொண்டது. அதன் முடிவுகளை ஆராய "யூனிகோட் கன்சார்டியம்' மூத்த கல்வியாளர் மு.ஆனந்தகிருஷ்ணன் தலைமையில் துணைக் குழுவை அமைத்தது.

இக்குழு சென்னையில் வரும் ஜனவரியில் கூடி விவாதிக்கும். குழுத் துணைத் தலைவரும் பாரதிதாசன் பல்கலைக்கழகத் துணைவேந்தருமான மு.பொன்னவைக்கோ உள்ளிட்ட வல்லுநர்கள் இதில் பங்கேற்பர்.

அதிக இடம் பெறுவது என்றால் என்ன?: கணினி சாஃப்ட்வேரில் ஆங்கில எழுத்துகள் ஒவ்வொன்றுக்கும் ஒவ்வோர் இடம் அளிக்கப்பட்டுள்ளது. இதன் மூலம் ஓர் எழுத்தை இயக்க ஆபரேடிங் சிஸ்டத்தில் ஒரே இயக்கம் போதும்.

ஆனால், தமிழ் எழுத்து ஒவ்வொன்றுக்கும் ஓர் இயக்கமோ அதற்கு மேலோ தேவைப்படுகிறது. உதாரணத்துக்கு "கி' என்ற எழுத்தைப் பதிவு செய்ய "க்', "இ' என இரு எழுத்துகளை சாஃப்ட்வேர் தேடி எடுத்து, இணைத்துப் பதிவு செய்யும். இதனால், நேரம் அதிகமாகும். அத்துடன், 12 உயிர் எழுத்துகள், 16 மெய் எழுத்துகள், ஆய்த எழுத்து ஆகியவற்றுக்கு மட்டுமே இடம் உண்டு. ஆனால், "கி' என்ற ஒரே எழுத்தை ஒரே இயக்கத்தில் பதிவு செய்ய அந்த எழுத்துக்கு மட்டும் தனியாக ஓர் இடம் வேண்டும். இவ்வாறு செய்வதன் மூலம் உயிர் எழுத்து, மெய் எழுத்துகளுடன் உயிர்மெய் எழுத்துகளுக்கும் இடம் தேவை. அதற்காகவே இடம் விரிவு செய்யப்பட வேண்டும் என வல்லுநர்கள் வலியுறுத்துகிறார்கள்.

இது நடைமுறைக்கு வந்துவிட்டால், நேரம் மிச்சமாகும். தமிழ் இயக்கத்தை விரைவில் செயல்படுத்தலாம். உலக அளவில் வணிகம், அறிவியல், ஊடகம் ஆகிய அனைத்துத் துறைகளிலும் தமிழ் எழுத்துகளை விரைவில் பதிவு செய்யலாம்.

நன்றி:ஆயுத எழுத்து