""என்ன செய்திருக்கலாம் அல்லது எதனை செய்யத் தவறியுள்ளனர் என்பது குறித்து நாங்கள் பார்க்கவில்லை.

அதிகாரப் பகிர்வு நடவடிக்கையை நோக்கி இலங்கை அரசை மெதுவாக நகர்த்துவதற்காகவே அனைத்துக் கட்சிக் குழுவின் யோசனையை இந்தியா வரவேற்றது.

இலங்கையின் இனப்பிரச்சினை தீர்விற்கான சர்வகட்சி பிரதிநிதிகளின் தற்போதைய பரிந்துரையை ஆதரிக்காத பட்சத்தில் இலங்கையில் அதிகாரப் பகிர்விற்கான செயற்பாடுகள் அற்றுப் போய்விடுமென இந்தியா கருதுவதாக புதுடில்லி வட்டாரங்களை மேற்கோள் காட்டி "இந்தோ ஆசிய செய்திச் சேவை' மேலும் தெரிவித்துள்ளது.

இதன் காரணமாகவே இந்தத் தீர்வு யோசனையில் புரட்சிகரமானதாக ஏதும் இல்லாவிட்டாலும் அதனை வரவேற்பதற்கு இந்தியா தீர்மானித்தது.

இந்திய அதிகாரிகள் இதனை நல்லதொரு ஆரம்பமாக கருதும் அதேவேளை, இதன் வரையறைகள் குறித்தும், தமிழ் மக்களின் அரசியல் அபிலாஷைகளை இது நிறைவேற்ற வில்லையென்பதையும் உணர்ந்துள்ளனர் என்றும் தெரிவிக்கப்படுகின்றது.

""என்ன செய்திருக்கலாம் அல்லது எதனை செய்யத் தவறியுள்ளனர் என்பது குறித்து நாங்கள் பார்க்கவில்லை. முன்வைக்கப்பட்டுள்ள யோசனை முன்னேற்றகரமான முதல் நடவடிக்கை. பின்னோக்கியதானல்ல'' எனப் புதுடில்லி வட்டாரங்கள் தெரிவித்துள்ளன.

இந்தியா 1987 இற்கு பின்னர் நிறைய விடயங்கள் நடந்து விட்டன என கருதுகின்றது.

மேலும், வடக்குக் கிழக்கு இணைந்திருக்க வேண்டும் என்ற முன்னைய நிலைப்பாடுகளை கைவிட இந்தியா தயார் என்பது போல தோன்றுகின்றது என "இந்தோ ஆசிய செய்திச் சேவை' குறிப்பிட்டுள்ளது.

வடக்குக் கிழக்கை இலங்கை பிரித்துள்ளதுடன் அதனை இணைக்க மறுக்கின்றது.

இந்தியா கிழக்கில் தேர்தல் நடத்துவதை எதிர்க்கவில்லை.

அனைத்துக் கட்சி குழுவின் யோசனை இந்தியா நிராகரித்தால் மாகாணங்களுக்கு அதிகாரத்தைப் பகிர்வதற்கு கொழும்பு எதனையும் செய்யாது என்ற அச்சம் புதுடில்லியில் காணப்படுகின்றது.

மேலும், இந்த யோசனைகளுக்கான இந்தியாவின் ஆதரவை இலங்கையில் நடைபெறும் அனைத்திற்குமான ஆதரவாகக் கருதக்கூடாது என்பதில் இந்தியா தெளிவாக உள்ளது.

நாட்டின் ஆட்சியில் தாங்களும் பங்காளிகள் எனத் தமிழ் மக்கள் கருதக்கூடிய அரசியல் சீர்திருத்தங்கள் மூலம் மாத்திரமே இலங்கையில் உண்மையான சமாதானம் சாத்தியம் என அது கருதுவதாகவும் தெரிவிக்கப்பட்டுள்ளது.

இதேவேளை, அனைத்துக் கட்சி குழுவின் யோசனையை இந்தியா வரவேற்றமை குறித்து தமிழ் மக்களை ஆச்சரியமடைந்துள்ளனர் எனவும் அதில் தெரிவிக்கப்பட்டுள்ளது

Uthayan