கச்சதீவு திருவிழா இந்த ஆண்டு நடக்குமா?

வீரகேசரி இணையம் - இலங்கையில் போர்ப் பதற்றம் அதிகரித்துள்ளதால் இந்த ஆண்டு கச்சதீவு அந்தோனியார் கோவில் திருவிழா நடக்குமா என்பதில் சந்தேகம் எழுந்துள்ளது. இராமேஸ்வரத்தில் இருந்து 18 கடல்மைல் தொலைவில் கச்சதீவு அமைந்துள்ளது. இங்குள்ள புனித அந்தோனியார் கோவிலை மீனவர்கள் காவல் தெய்வமாக வழிபடுகின்றனர்.

இப்போது இலங்கையின் கட்டுப்பாட்டில் இத்தீவு அமைந்துள்ளது. கிறிஸ்தவர்களின் தவக்காலத்தில் பெப்ரவரி கடைசி வாரத்திலிருந்து மார்ச் 15 ஆம் திகதி 3 நாட்கள் தேர்வு செய்யப்பட்டு அந்தோனியார் கோவில் திருவிழா நடைபெறும். இதில் முதல் நாள் கொடியேற்றம், 2 ஆம் நாள் சிறப்பு பிரார்த்தனை, 3 ஆம் நாள் தேர்பவனி நடைபெறும்.

இக்கோவில் திருவிழாவில் இரு நாடுகளையும் சேர்ந்தவர்கள் எந்தவித ஆவணங்களும் இன்றி பங்கேற்கலாம். இலங்கையில் இனப்பிரச்சினை ஏற்பட்டதால் கச்சதீவுத் திருவிழா நிறுத்தப்பட்டது.

அதன் பிறகு யாழ்ப்பாணம் மறைமாவட்ட ஆயர் தோமஸ் சௌந்தரநாயகம் முயற்சியால் மீண்டும் 2002 ஆம் ஆண்டு கச்சதீவுத் திருவிழா தொடங்கியது. இதில் இருநாட்டைச் சேர்ந்தவர்களும் பங்கேற்றனர். கடந்த ஆண்டு இலங்கையில் போர் பதற்றம் ஏற்பட்டது. இதனால் ஒரு நாள் திருவிழா மட்டுமே நடத்தப்பட்டது.

இராமேஸ்வரத்தைச் சேர்ந்த சிலர் மட்டுமே இதில் பங்கேற்கின்றனர். இலங்கையில் உள்நாட்டுப் போர் தற்போது உச்சக் கட்டத்தை எட்டியுள்ளது. கச்சதீவு அந்தோனியார் கோவில் இலங்கையின் நெடுந்தீவு பங்குத் தந்தையின் கட்டுப்பாட்டில் உள்ளது. இங்கு புதிய பங்குத் தந்தை பொறுப்பேற்க உள்ளார்.

அவர் பொறுப்பேற்ற பிறகு இது குறித்து முடிவெடுக்கப்படும். நெடுந்தீவு பங்குத்தந்தை அனுப்பும் தகவல்களின் அடிப்படையில் இராமேஸ்வரம், பாம்பன், தங்கச்சிமடம் பகுதியிலிருந்து பொதுமக்கள் இத்திருவிழாவில் பங்கேற்பர். ஆனால், இதுவரை இராமேஸ்வரம் பகுதிக்கு நெடுந்தீவிலிருந்து தகவல் வரவில்லை. இதனால் இந்த ஆண்டு திருவிழா நடக்குமா என்ற சந்தேகம் எழுந்துள்ளது.கச்சதீவு திருவிழாவுக்கு ஒவ்வொரு ஆண்டும் செல்லக்கூடிய பொதுமக்கள், மீனவர்கள் குறித்து கியூபிரிவு மற்றும் தனிப்பிரிவு பொலிஸார் கணக்கெடுத்து வருகின்றனர்.