கொழும்பிலிருந்து கோடம்பாக்கம்: ஒரு பாடகரின் பயணம்

குண்டுவெடிப்பு சப்தங்களால் கோமா நிலைக்கும்போகும் செவிகளை தனது இன்னிசை மழையில் உயிர்ப்பிக்க செய்யும் உன்னத காரியத்தை செய்து வருபவர் பாடகர் சிவக்குமார்.

இவரது பூர்வீகம் கொழும்பு. அக்னி சிவக்குமார் என்றால் இலங்கையில் தெரியாத ஆட்களே இல்லையாம். இவர் நடிக்கும் இசைக்குழுவின் பெயர்தான் அக்னி. பள்ளிப்பருவத்தில் ஆரம்பித்த பாட்டு ஆர்வம் இன்று சினிமா பாடகர்வரை வளர்த்துவிட்டுள்ளது.

இலங்கை வானொலிகள், தொலைக்காட்சி தொடர்கள் என இவரது பாட்டு பயணம் நெடுந்தொலைவு. 90களில் தமிழ் சினிமாவில் கோலோச்சிய பாடகர் மனோதான் சிவாகுமாரின் இன்ஸ்பிரேஷனாம். இவர் நடத்தி வரும் இசைகுழுவில் தமிழ் பின்னணி பாடகர்-பாடகிகள் பலர் பாடியுள்ளனராம்.

'ஜிக்கி, சுசிலாவுடன் இணைந்து பாடிய பாக்கியமும் உண்டு' என்னும் சிவக்குமார் பல ஆல்பங்களையும் வெளியிட்டுள்ளார்.

ஆர்கெஸ்ட்ரா, ஆல்பம் என்ற வட்டத்துக்குள்ளிருந்து எப்போது வெளியே வரப் போகிறாய்? பிரபல அறிவிப்பாளர் அப்துல் ஹமீதிடமிருந்து வந்த இந்த கேள்வி சிவக்குமாரை இப்போது சினிமாவுக்குள் தள்ளியுள்ளது.

சிங்களத்தில் ரீமேக் ஆகும் 'காசி' படத்தில் அனைத்து பாடல்களையும் பாடி பின்னணி பாடகர் என்ற அந்தஸ்திற்கும் உயர்ந்துள்ளார். கனடாவில் வெளியான இரண்டு படங்களிலும் பாடியுள்ள சிவக்குமாரின் அடுத்து குறி தமிழ் சினிமாதான்.

இதற்காக கடந்த இரண்டு மாதங்களுக்குமுன் சென்னை வந்திறங்கிய சிவக்குமார் பல இசையமைப்பாளர்களிடமும் வாய்ப்புக்கான அச்சாரம் போட்டு வைத்துள்ளார். இருப்பினும் சிவக்குமாரின் திறமை கண்டு வியந்து முதல் வாய்ப்பை அளித்துள்ளார் இசையமைப்பாளர் உதயா. பீஸ்மர், காதல்கடிதம் போன்ற படங்களுக்கு இசையமைத்துள்ள உதயா தற்போது வசீகரன் எழுதும் 'காதல் வானம்' என்ற ஆல்பத்திற்கு இசையமைத்து வருகிறார்.

இதில் "எங்கோ பிறந்தோம் எங்கோ வளர்ந்தோம்..." என்ற புலம்பெயர்ந்த தமிழர்களின் ஏக்கத்தை வெளிப்படுத்தும் பாடலை பாட புதிய குரல் ஒன்று தேவைப்பட்டது. உதயாவின் தேடலில் தென்பட்ட தேன்குரலுக்கு சொந்தக்காரர் சிவக்குமார்தான்.

பாடல் பதிவின்போது அங்கிருந்த நம்மையும் உருகச்செய்தது சிவக்குமாரின் கானம்.

By Amalan -www.cinesouth.com

நீங்கள் சொலகின்ற சிவக்குமார், நிலுக்ஸியின் கணவரா? நிலுக்ஸியின் மேடைகளில் பாடிய நிகழ்ச்சிகள் பார்த்திருக்கின்றேன். அப்போது, சிவக்குமாரும் பாடியிருப்பார்.