தமிழீழம் மலர்ந்தே தீரும் என்று பாமக நிறுவனர் டாக்டர் ராமதாஸ்

தமிழீழம் மலர்ந்தே தீரும் - டாக்டர் ராமதாஸ் பேட்டி

தமிழீழம் மலர்ந்தே தீரும் என்று பாமக நிறுவனர் டாக்டர் ராமதாஸ் கூறியுள்ளார்.

சென்னையில் செய்தியாளர்களிடம் பேசிய அவர், இலங்கையில் போர் நிறுத்தம் செய்ய அந்நாட்டு அரசிடம் வலியுறுத்துமாறு மத்திய அரசிடம் நாங்கள் எத்தனையோ முறை கோரிக்கை வைத்தோம். தமிழகத்தில் இருந்து பல்வேறு தரப்பிடமிருந்தும் கோரிக்கை வைக்கப்பட்டது.

தமிழக எம்பிக்கள் மத்திய அரசை வலியுறுத்தினர். அனைத்துக் கட்சித் தலைவர்களும் முதல்வர் கருணாநிதி தலைமையில் பிரதமரை சந்தித்து பேசினோம். எத்தனையோ முறை போரை நிறுத்தத் சொல்லி வற்புறுத்தியும், மத்திய அரசு செவி சாய்க்கவில்லை.

இது 7 கோடி தமிழர்களின் தலைகுனிவு. இதனால் சுயமரியாதை, தன்மானத்தை இழந்து நிற்கிறோம். அடுத்த 15 நாளில் இந்திய வெளியுறவுத் துறை அமைச்சர் இலங்கைக்கு செல்வதாக தெரியவில்லை என்றார்.

இலங்கை பிரச்சினையில் செவிசாய்க்காத மத்திய அரசிடம் கூட்டணி வைத்துள்ளீர்கள். அந்த கூட்டணியில் இருந்து வெளியேறுவீர்களா? என்று செய்தியாளர்கள் கேட்டதற்கு, அதை பாமக பொதுக்குழு கூட்டத்தில் முடிவு எடுப்போம். அதில் பாமக பொதுக்குழு உறுப்பினர்கள் அதிகப்படியான எந்த முடிவுகளை எடுக்கிறார்களோ அதன்படி நடப்போம் என்றார்.

மேலும் இலங்கை பிரச்னையில் மத்திய அரசு அதிகாரிகளும், மத்திய அமைச்சர்களும் அலட்சியம் செய்கிறார்கள். கிளிநொச்சியை பிடித்துவிட்டோம் என்று கூறும் இலங்கை ராணுவம், கிளிநொச்சியில் எத்தனை விடுதலைப்புலிகள் சரணடைந்தனர். அவர்களிடம் இருந்து கைப்பற்றப்பட்ட ஆயுதங்கள் ஆகியவற்றை காண்பிக்க வேண்டும். சீனா, பாகிஸ்தான் ஆகிய நாடுகளில் இருந்து ஆயுதங்களையும், இந்தியாவின் தொழில் நுட்பத்தையும் வைத்து இலங்கை ராணுவம் போரிட்டு வருகிறது.

விடுதலைப்புலிகள் தீவிரவாத இயக்கம் என்று காங்கிரஸ் கூறுகிறதே என்று செய்தியாளர்கள் கேட்டதற்கு, விடுதலைப்புலிகள் தீவிரவாத இயக்கம் அல்ல. விடுதலைக்காக போராடும் இயக்கம் என்றார். மேலும் இலங்கை அரசு ஈழத்தமிழர்களுக்காக எதுவும் செய்ததில்லை. பிள்ளையான், கருணா, டக்ளெஸ் போன் துரோகிகளை வளர்த்துள்ளனர் என்றும், நிச்சயம் தமிழீழம் மலர்ந்தே தீரும். தமிழீழம் தான் இந்தியாவுக்கு ஆதரவு அளிக்கும் என்றும் கூறினார்.