மனித நடமாட்டமோ, கட்டடங்களோ இல்லாத வனாந்தரமாகக் காட்சிதரும் பரந்தன் முல்லைத்தீவுப் பிரதேசம்;போரின் உக்கிரத்தை உணர வைக்கிறது அந்தப் பகுதி

பரந்தனில் இருந்து முல்லைத்தீவு வரையான நீண்டபிரதேசத்தில் கடும்போர் இடம்பெற்றமைக்கான அடையாளங்களே காணப்படுகின்றன. கட்டடங்கள் எவையும்இன்றி மனித நடமாட்டமே இல்லாத வெளியாக, வனாந்தரப் பிரதேசமாக அது காட்சியளிக்கிறது.

அங்கு சென்று திரும்பிய வெளிநாட்டுச் செய்தியாளர் ஒருவர் வன்னி நிலைமையை மேற்கண்டவாறு வர்ணித்தார்.

வெளிநாட்டு மற்றும் உள்நாட்டுச் செய்தியாளர்கள் அடங்கிய 40பேர் நேற்று களமுனைக்கு அழைத்துச் செல்லப்பட்டனர்.

கிளிநொச்சி, புதுக்குடியிருப்பு, புதுமாத்தளன் ஆகிய பகுதிகளுக்கு செய்தியாளர்கள் அழைத்துச் செல்லப்பட்டனர்.

அங்கு இடம்பெற்ற சண்டை தொடர்பாக படைஅதிகாரிகள் செய்தியாளர்களிடம் விவரித்து விளக்கங்களையும் கூறினர்.

மக்கள் பாதுகாப்பு வலயப் பிரதேசத்தில் இருந்து வெளியேறி வந்து இரணைப்பாலைச் சந்தியில் வீதியோரங்களில் தங்கியுள்ளவர்களை செய்தியாளர்கள் சந்தித்துக் கலந்துரை யாடினர்.

படையினரால் அங்கு கட்டாந்தரையில் தங்கவைக்கப்பட்டுள்ள ஆயிரத்துக்கும் மேற்பட்டவர்களுக்கு குடிதண்ணீர் வசதி, உணவுவசதி செய்யப்பட்டுள்ளது. அங்கு இடம்பெறும் விசாரணைகளின் பின் இரண்டு, மூன்று தினங்களில் நலன்புரி நிலையங்களுக்கு அனுப்பி வைக்கப்படுவர் என்று செய்தியாளர்களிடம் தெரிவிக்கப்பட்டது.

கட்டடங்களைக் காணமுடியவில்லை

அங்குள்ள நிலைமைதொடர்பாக சர்வதேச நிறுவன செய்தியாளர் ஒருவர் தெரிவித்ததாவது

பரந்தனில் இருந்து புதுக்குடியிருப்பு வரை செல்லும் பாதையில் கட்டடங்கள் எதையும் காணமுடியவில்லை. இடை இடையே அமைந்திருந்த நகரங்கள் கூட அங்கு இருந்த இடமே தெரியாது அழிந்து விட்டன; அழிக்கப்பட்டுவிட்டன. அங்கு உக்கிரமான போர் ஒன்று இடம்பெற்றதன் தோற்றமும் காணப்படுகின்றது.

கம்பீரமாகக் காட்சி தந்த கட்டடங்கள் வீடுகள் எல்லாம் இருந்த இடமே தெரியாத அளவு வெட்டைவெளியாகக் காட்சி அளிக்கின்றது. போரின் உக்கிரத்தை உணரக்கூடிய எச்சங்களையே காண முடிகின்றது. என்றார். "

ஷெல் தாக்குதல்களாலேயே தாம் இடம்பெயர்ந்ததாகவும் பாதிக்கப்பட்டதாகவும் கூறும் மக்கள் எந்தத் தரப்பினது ஷெல் தம்மைத் தாக்கியது என்பதையும் கூற மறுத்துவிட்டனர். என்றார் அந்தச் செய்தியாளர்.

uthayan paper