உங்களுக்கு எந்த வகையில் நாங்கள் ஒற்றுமை உணர்வை வெளிப்படுத்தவில்லை: கருணாநிதியிடம் இராமதாஸ் கேள்வி

ஈழத் தமிழர் விவகாரத்தில் உங்களுக்கு எந்த வகையில் நாங்கள் ஒற்றுமை உணர்வை வெளிப்படுத்தவில்லை என்று தமிழ்நாடு முதலமைச்சர் கருணாநிதியிடம் பாட்டாளி மக்கள் கட்சியின் நிறுவனர் மருத்துவர் இராமதாஸ் கேள்வி எழுப்பியுள்ளார்.

பாட்டாளி மகளிர் அணி சார்பில் ஈழத் தமிழர்களை தாய்த் தமிழகம் தனது மடியில் வாரி அரவணைக்கும் என்ற தலைப்பில் பேரணி நடைபெற்றது.

இப்பேரணி சென்னை மன்றோ சிலையில் இருந்து நேற்று சனிக்கிழமை மாலை புறப்பட்டது. பேரணிக்கு பாட்டாளி மக்கள் கட்சியின் மாநில மகளிர் அணி தலைவர் நிர்மலா ராசா தலைமை தாங்கினார்.

திரைப்பட இயக்குநர் சீமான் பேரணியை தொடங்கி வைத்தார். பேரணியின் முன்னதாக மகளிர் அணியினர் அணிவகுத்து ஊர்வலமாக சென்றனர்.

ஊர்வலத்தின் பின்னால் பாட்டாளி மக்கள் கட்சியின் நிறுவனர் மருத்துவர் இராமதாஸ் நடந்து வந்தார். அரசினர் விருந்தினர் மாளிகை அருகே ஊர்வலம் முடிவடைந்தது.

பேரணியின் நிறைவில் மருத்துவர் இராமதாஸ் உரையாற்றிய போது மேலும் தெரிவித்துள்ளதாவது:

இலங்கை தமிழர்களை பாதுகாக்கவேண்டும் என்று தீர்மானம் போட்டோம். ஒன்று சேர்ந்து போராடினோம். நமது இன உணர்வுக்காக இப்போதாவது ஒற்றுமை வேண்டும் என்று முதலமைச்சர் கருணாநிதி சட்டசபையில் பேசி இருக்கிறார்.

எந்த வகையில் உங்களுக்கு நாங்கள் ஒற்றுமை உணர்வை வெளிப்படுத்தவில்லை. நீங்கள் கூப்பிட்ட இடத்திற்கு எல்லாம் வந்தோம்.

இலங்கை தமிழர்கள் முகாம்களில் முள்வேலியில் அடைக்கப்பட்டு அதனால் அனுபவிக்கும் துயரம் ஏன் தெரியவில்லை. உலகில் உள்ள தமிழர்கள் எல்லாம் பொங்கி எழுந்து இருக்கிறார்கள். நிச்சயமாக இலங்கை தமிழர் பிரச்சினையை விடப்போவது இல்லை.

இலங்கை பிரச்சினையில் அரங்கேற்றப்பட்டுள்ள நிகழ்வுகள் குறித்து விசாரணை நடத்தவேண்டும் என்று வலியுறுத்தி பிரதமர் மன்மோகன் சிங், வெளிவிவகாரத்துறை அமைச்சர் எஸ்.எம்.கிருஷ்ணாவுக்கு கடிதம் எழுதினேன்.

இதே முயற்சியில் ஈடுபடவேண்டும் என்று முதலமைச்சர் கருணாநிதிக்கு கடந்த 2 ஆம் நாள் கடிதம் எழுதினேன். என்ன ஒற்றுமை வேண்டும் சொல்லுங்கள். ராஜபக்ச இலங்கை தமிழர்களை கூண்டோடு அழிக்க திட்டமிட்டு இருக்கிறார். நாங்கள் இனி சும்மா இருக்கப்போவது இல்லை.

இதனை மக்களிடம் கொண்டு செல்வோம். இதற்காக ஆதரவு திரட்ட வேண்டும் என்று இந்த நேரத்தில் சூளுரை எடுத்துக்கொள்ளவேண்டும். தூங்கி விழிக்கும்போது எல்லாம் நமக்கு இலங்கை தமிழர்கள்தான் நினைவுக்கு வருகிறது.

இதற்கு தீர்வு காணவேண்டும் என்ற அடிப்படையில் இப்படிப்பட்ட பேரணி தொடர்ந்து நடக்கவேண்டும். இந்தப் பிரச்சினையை தீர்க்க எந்த தியாகத்திற்கும் நம்மை தயார்படுத்திக்கொள்வோம் என்றார் அவர்.

புதினம்