இடம்பெயர்ந்தோரின் மீள் குடியேற்றம் என்பது கற்பனை செய்வதைவிட மிகவும் கடினமான ஒரு இலக்கு: மகிந்த

போரினால் இடம்பெயர்ந்த மக்களைத் துரிதமாக மீளக்டியமர்த்துவதற்கு அரசாங்கம் அதிகளவு முன்னுரிமை கொடுத்துவருவதாகத் தெரிவித்த சிறிலங்காவின் அரசுத் தலைவர் மகிந்த ராஜபக்ச, கற்பனை செய்வதைவிட இது மிகவும் கடினமான இலக்கு எனவும் குறிப்பிட்டிருக்கின்றார்.

கொழும்பு, பண்டாரநாயக்க ஞாபகர்த்த சர்வதேச மாநாட்டு மண்டபத்தில் நேற்று நடைபெற்ற ஆசிய ஒத்துழைப்பு கலந்துரையாதலின் அமைச்சர்கள் மட்ட மாநாட்டில் பங்குகொண்டு உரையாற்றிய அரசுத் தலைவர், உள்நாட்டில் இடம்பெயர்நத தற்காலிக வசதிகளுடன் தங்கவைக்கப்பட்டுள்ள மக்களை அவர்களுடைய வீடுகளுக்கு துரிதமாக அனுப்பிவைப்பதே அரசின் முக்கியமான நோக்கம் எனவும் தெரிவித்தார்.

அரசுத் தலைவர் மகிந்த ராஜபக்ச தனது உரையில் மேலும் முக்கியமாகத் தெரிவித்திருப்பதாவது:

"மீள்குடியேற்றத்தை மிகவும் கவனமான முறையில் அணுகவேண்டியிருக்கின்றது. பொதுமக்கள் வகித்த பொருளாதார நடவடிக்கைகளுக்குப் பயன்படுத்திய பெருமளவு நிலப் பிரதேசம் கண்ணிவெடிகள் புதைக்கப்பட்ட இடங்களாக மாறியுள்ளன.

அந்தக் கண்ணி வெடிகளை அகற்ற வேண்டியிருக்கின்றது. ஆனால், அதற்குக் காலம் எடுக்கும். அதிகளவு கவனத்துடன் இதனை மேற்கொள்ள வேண்டியிருக்கின்றது. எந்தவொரு தவறும் ஏற்படாத வகையில் இதனை மேற்கொள்ள வேண்டும்.

ஆசிய பிராந்தியத்தில் இப்போது அதிகளவு பங்களிப்பை வழங்கிவரும் அனைத்துலக நிதி நிறுவனங்கள், தமது உதவிகளுக்காக நிபந்தனைகளை விதித்து அதிகளவு சுமைகளை ஆசிய நாடுகளின் மீது சுமத்துகின்றன" எனவும் அரசுத் தலைவர் தனது உரையில் கவலை தெரிவித்தார்.

புதினம்