தீவுப் பகுதியிலிருந்து தென்பகுதிக்கு மாடுகள் கடத்தப்படுவதாக பொது மக்கள் குற்றஞ்சாட்டியுள்ளனர்.இரவு வேளைகளில் தீவுப் பகுதிக்குள் நுழையும் தென்பகுதி லொறிகள் அப்பகுதியில் உள்ளவர்களின் உதவியுடன் மாடுகளை ஏற்றிக் கொண்டு செல்ல முயற்சிப்பதாக நேரில் கண்டவர்கள் தெரிவித்தனர். இவ்வாறான சம்பவம் ஒன்று நேற்று முனதினம் இரவு மண்டைதீவுப் பகுதியில் முறியடிக்கப்பட்டுள்ளது.இது தொடர்பாக மேலும் தெரியவருவதாவது,

நேற்றுமுன்தினம் இரவு 9மணியளவில் வவுனியாவிலிருந்து வரவழைக்கப்பட்ட லொறி ஒன்றில் 20ற்கும் மேற்பட்ட மாடுகள் ஏற்றப்பட்டு வவுனியாவுக்குக் கடத்தப்பட இருந்தது.இத் தகவலினை அறிந்த அவ் ஊர் மக்கள் கிராம அலுவலர்களைத் தொலைபேசியில் தொடர்பு கொண்டு கடத்தல் சம்பவம் தொடர்பாக முறையிட்டுள்ளனர்.இச்சம்பவத்தினை அறிந்த கிராம அலுவலர்கள் கடற்படையினருடன் தொலைபேசியில் தொடர்பு கொண்ட போது தகுந்த பதில் எதுவும் கிடைக்காததால் தாம் உடனடியாக மண்டைதீவுக்குள் நுழைந்து தேடுதலில் ஈடுபட்டனர்.

அப்போது வவுனியா என்ற பெயர் பொறிக்கப்பட்ட லொறி ஒன்று அதன் சில்லு மணலில் புதையுண்ட நிலையில் நிற்பதையும் அதனுடன் 20பேர் கொண்ட குழு ஒன்றையும் கையும் மெய்யுமாக பிடித்து விசாரணை மேற்கொண்டனர். அதன் போது மாடுகள் கடத்தப்படவிருந்த விபரம் தெரியவந்தது. மண்டைதீவு மக்கள் தங்களின் வாழ் வாதாரத்திற்காக வளர்க்கப்பட்டு வந்த சுமார் 20 ற்கும் மேற்பட்ட மாடுகள் களவாடப்பட்டு, வவுனியாவிலிருந்து வரப்பட்ட லொறியில் ஏற்றப்பட்டுள்ளது.

லொறி பாரம் தாங்காமல் புதையுண்டதால் ஏற்றப்பட்ட மாடுகள் இறக்கிவிடப்பட்ட நிலையிலேயே வெற்று லொறியினை கிராம அலுவலர்கள் பிடித்துள்ளனர்.இதனையடுத்து மேலதிக விபரங்களை அறியும் பொருட்டுத் தொடர்ந்து மேற்கொண்ட விசாரணையின் போது மண்டைதீவைச் சேர்ந்தவர்களாலேயே இம் மாடு கடத்தல் மேற்கொள்ளப்படவிருந்ததாகவும், மண்டைதீவைச் சேர்ந்தவரும், வவுனியாவில் வியாபாரம் மேற்கொள்பவரின் லொறியிலேயே கடத்தல் சம்பவம் இடம்பெறவிருந்ததாகவும் தெரிய வந்ததுடன் பொலிஸாரின் கவனத்திற் கும் இது கொண்டு வரப்பட்டுள்ளது.

இது தொடர்பான மேலதிக விசாரணை களை ஊர்காவற்றுறைப் பொலிஸார் மேற் கொண்டு வருகின்றனர்.

http://www.valampurii.com

உள் ஊர் திருடர்களின் கைங்கரியம்.