இலங்கை உள்விவகாரங்களில் ஐ.நா.வின் அநாவசிய தலையீடுகளை மேற்கொள்வதற்கான வாய்ப்பை இலங்கை அரசாங்கமே ஏற்படுத்திக் கொடுத்திருப்பதாக ஜெனரல் சரத் பொன்சேகா தலைமையிலான ஜனநாயகத் தேசியக் கூட்டணிகுற்றஞ்சாட்டியுள்ளது.

கொழும்பு ராஜகீய மாவத்தையிலுள்ள ஜனநாயகத் தேசியக் கூட்டணியின் அலுவலகத்தில் வியாழக்கிழமை நடைபெற்ற ஊடகவியலாளர் சந்திப்பில் அக்கட்சியின் தேசிய பட்டியல் உறுப்பினரும் ஜே.வி.பி.பாராளுமன்றக்குழுத் தலைவருமான அநுரகுமார திஸாநாயக்க இந்த கருத்தை வெளியிட்டார்.

“ஐ.நா.செயலாளர் யுத்த காலத்தைப் பற்றி எதுவும் குறிப்பிடவில்லை. யுத்தத்தின் பின்னரான கால நடவடிக்கைகளின் பொருட்டு இலங்கை அரசாங்கத்துக்கும் ஐ.நா.வுக்கும் ஏற்படுத்திக் கொள்ளப்பட்ட உடன்பாடுகள் நிறைவேற்றப்படவில்லை என்று ஐ.நா. செயலாளர் நாயகம் குற்றஞ்சாட்டியுள்ளார். யுத்தத்தின் பின்னர் ஜனநாயகத்தையும் மனித உரிமைகள் பாதுகாப்பையும் முன்னெடுத்துச் செல்லும் நடவடிக்கைகளை அரசாங்கம் போட்டுடைத்துவிட்டது.

ஜனநாயகத்துக்குப் புறம்பான நடவடிக்கைகள், ஊடகங்கள் மீதான அடக்குமுறை, ஊடகவியலாளர்கள் கடத்தல், எதிர்க்கட்சியினர் சுதந்திரமாக அரசியல் நடவடிக்கைகளில் ஈடுபட முடியாத நிலைமையை ஏற்படுத்தல், விசாரணைகளுக்கு அழைத்தல் என அனைத்துத் துன்புறுத்தல்களைச் செய்து விட்டு இதுபற்றிக் கூறினால் ஐ.நா.விடமிருந்து பிரச்சினை வந்துவிடுமென அரசாங்கம் கூறுகிறது.

ஜெனரல் பொன்சேகா கைது, லங்கா பத்திரிகை ஆசிரியர் கைது, ஜெனரல் பொன்சேகாவுக்கு ஆதரவாக செயற்பட்டவர்களும் கைது என அரசாங்கத்தின் ஜனநாயக மீறல் செயற்பாடுகளைக் கூறுவது மட்டுமல்லாது இவற்றுக்கு எதிராக நாம் போராடுவோம். இதில் எம்மீது எந்தத் தவறும் கிடையாது. இவை அனைத்தும் அரசாங்கம் இழைத்த தவறுகள்.

எனவே, இவற்றின் மூலம் இலங்கை விவகாரங்களில் ஐ.நா.தலையிட அரசாங்கமே வழி ஏற்படுத்திக் கொடுத்துள்ளது. இங்கு உரிய பணியைச் செய்யாமல் இருப்பதில் பிரச்சினை இருக்கிறதே தவிர கூறுவதில் எந்தப் பிரச்சினையும் கிடையாது. எனவே, ஐ.நா. அநாவசியமாகத் தலையீடுகளை மேற்கொள்வதற்கான வாய்ப்புகளை அரசாங்கமே ஏற்படுத்திக் கொடுத்துள்ளது என்றார்.

http://www.thinamurasam.com/

ஓடவிட்ட முயலை பிடிக்கிற .....

ஒரு "சன நாயக" அரசாங்கத்தில தலைவரின் குடும்பத்தினர் நானூறு பேர் இருப்பது எங்கே நடக்கிறது? சர்வதிகார ஆட்சிகளில் உண்டு!

ஸ்ரீ லங்காவில் அரசாங்கம் இல்லை, இராச பக்சவின் குடும்ப சங்கம் தான் உண்டு!