நாசகார தாக்குதல்களை முறியடித்து பொங்குதமிழ் மீண்டும் புத்துயிர்ப்புடன் இயங்கும்

நாசகார தாக்குதல்களை முறியடித்து பொங்குதமிழ் மீண்டும் புத்துயிர்ப்புடன் இயங்கும்

பொங்குதமிழ் இணையத்தளம் (www.ponguthamil.com) தற்போது செயலிழந்த நிலையில் இருப்பதற்கு கடந்த வெள்ளிக்கிழமை (25.03.11) இணையத்தளம் மீது மேற்கொள்ளப்பட்ட திட்டமிட்ட பாரிய சைபர் தாக்குதலே (cyber attack) காரணமாக அமைந்துள்ளது என்பதனை உலகத் தமிழ் மக்களுக்கு அறியத் தருகிறோம்.

இத் தாக்குதல் சீனாவிலிருந்து மேற்கொள்ளப்பட்டிருப்பதாக எமது ஆரம்ப விசாரணகளிலிருந்து தெரியவந்துள்ளது. மீண்டும் தளத்தை இயங்க வைப்பதற்கான வேலைகள் வேகமாக மேற்கொள்ளப்பட்டு வருகின்றன. விரைவில் பொங்குதமிழ் புத்துயிர்ப்புடன் இயங்கும் என்பதை அறியத் தருகிறோம்.

தமிழ் இணையத்தளங்கள் மீதான இதுபோன்ற தாக்குதல்களின் பின்னணியில் சிறிலங்கா அரச தரப்பே செயற்படுவதாக ஏற்கனவே ஊடகங்களில் செய்திகள் வெளியாகி உள்ளன. இப் பின்னணியில், தற்போது மேற்கொள்ளப்பட்டுள்ள தாக்குதலின் பின்னணியையும் நோக்க வேண்டியுள்ளது.

முள்ளிவாய்க்கால் துயரங்களின் பின்னரான அடுத்த கட்ட அரசியல் குறித்து ஓர் அறிவார்ந்த தளத்தில் பொங்குதமிழ் பங்காற்றி வருகிறது. ஈழப்பிரச்சனையின் அடுத்த கட்டம் குறித்தான எமது இந் நிலைப்பாடு, அறிவார்ந்து ஈழப்பிரச்சனையை அணுகும் மக்கள் மத்தியில் பெரும் வரவேற்புப்பெற்று வருவதனை அதிகரித்து வரும் வாசகர்களின் எண்ணிக்கையும் எழுத்தாளர்களின் ஆதரவும் நமக்கு உணர்த்தி நிற்கிறது.

இத்தகைய சைபர் தாக்குதல்கள் போன்ற நாசகார வேலைகள் காரணமாக ஊடகப்பரப்பில் பொங்குதமிழ் வழங்க முனையும் பங்களிப்பை எவராலும் தடுத்து நிறுத்திவிட முடியாது என்பதனை நாம் உறுதியுடன் வெளிப்படுத்த விரும்புகிறோம்.

மீண்டும் பொங்குதமிழ் விரைவில் இயங்கும் என்பதை அறியத்தருவதுடன் இந்நேரத்தில் மின்னஞ்சல் மூலமாகவும் தொலைபேசி ஊடாகவும் எமக்கு உற்சாகத்தை வழங்கிவரும் அனைவருக்கும் எமது நன்றியைத் தெரிவித்துக் கொள்கிறோம்.

தோழமையுடன்

ஆசிரியர் குழு