சிவன் கோவில் நிலத்திற்காகத் தாய்லாந்து- கம்போடியாச் சண்டை

சிவன் கோவில் நிலத்திற்காகத் தாய்லாந்து- கம்போடியாச் சண்டை

Posted by சங்கீதா on 25/05/2011 in பிரதான செய்தி | 0 Comment

இரு நாட்டு இராணுவங்களும் ஒருவர் மீது ஒருவர் கனரக ஆயுதங்களால் தாக்குதல் நடத்துவதால் தாய்லாந்து- கம்போடியா எல்லையில் கடும் பதற்றம் நிலவுகிறது. இந்த எல்லையில் கிட்டத்தட்ட ஆயிரம் வருடம் பழமை வாய்ந்த மூன்று கோவில்கள் இருக்கின்றன.

அவற்றுள் முக்கியமானது பெரிய விகார் என்ற சிவாலயம். தனக்குச் சொந்தம் என்று தாய்லாந்தும் கம்போடியாவும் அதற்கும் அது அமைந்துள்ள நிலத்திற்கும் உரிமை கோருகின்றன. 1962ம் ஆண்டில் இந்த சர்ச்சை முதன் முறையாக வெடித்த போது இரு நாடுகளும் அனைத்துலக நீதி மன்றத்திடம் நீதி கேட்டு முறைப்பாடு செய்தன.

விசாரணைக்கு பிறகு அனைத்துலக நீதி மன்றம் (Internation al Court of Justice) பெரிய விகார் புராதான ஆலயத்தின் அரசுரிமை கம்போடியாவுக்குரியது என்று தீர்ப்பு வழங்கியது. ஆனால் இந்த ஆலயத்திற்கு அருகாமையிலுள்ள 4.6 கி.மீ நிலப்பரப்பு யாருக்குரியது என்று தீர்ப்புக் கூறாமல் நீதி மன்றம் விடுத்துள்ளது.

மக்கள் குடியிருப்புக்கள், மருத்துவ மனைகள் மீதான தாக்குதல்களை இரு நாட்டு இராணுவங்களும் நடத்தியதாகப் பரஸ்பர குற்றச் சாட்டுக்கள் சுமத்தப்படுகின்றன. 10,000க்கும் மேற்பட்ட கிராமப்புற மக்கள் பாதுகாப்புத் தேடி இந்த எல்லையின் இரு பக்கத்திலும் இருந்து வெளியேறியுள்ளனர்.

அமெரிக்க இராஐங்கச் செயலர் ஹிலரி கிளின்ரன் சூட்டுப் பரிமாற்றத்தை நிறுத்தி விட்டு அமைதி வழியில் பிரச்சனையைத் தீர்க்குமாறு நேரடியாக இரு நாடுகளுக்கும் வேண்டுதல் விடுத்துள்ளார். ஆனால் தொடர்ந்து பதற்றம் நிலவுகிறது.

கம்போடியாவின் புராதான இந்து ஆலயங்களைப் பார்வையிட வரும் பயணிகள் மூலம் பெரும் வருவாயை அது ஈட்டுகிறது. உலகின் மிகப் பெரிய மதக் கட்டிடம் என்று வகைப்படுத்தப்பட்ட அங்கூர் வாத் (Ankor wat) இந்துக் கோயில் கம்போடியாவில் இருக்கிறது. ஜம்பெரும் கோபுரங்களைக் கொண்ட இந்தக் கோயில் பார்வையாளர்களுக்கு விருந்தாகவும் நாட்டிற்கு வருவாயாகவும் இடம்பெறுகிறது.

2008ம் ஆண்டில் பெரிய விகார் எல்லைக் கோயிலை ஐநாவின் யுனெஸ்கோ, மனித குலத்தின் பாரம்பரியச் சொத்தாக அறிவித்தது. அதன் பிறகு அதன் முக்கியத்துவம் உயர்ந்ததோடு யாருக்குச் சொந்தம் என்ற சர்ச்சையும் சூடு பிடித்தது.

தாய்லாந்தும் கம்போடியாவும் தேரவாத பவுத்த நாடுகளாக இருந்தாலும் பெருமளவு இந்து மத அனுட்டானங்களும் நம்பிக்iகைகளும் வரலாற்றுக் காரணங்களுக்காக இரு நாடுகளிலும் நிலவுகின்றன. அவர்கள் பயிலும் மொமிகளில் தமிழ்ச் சொற்கள் கலந்துள்ளன.

நெடுங்காலமாக நீடிக்கும் எல்லை நிலம் மற்றும் அங்குள்ள கோயில்கள் தொடர்பான சர்ச்சையும் அண்மையில் தொடங்கிய சூட்டுப் போரும் உலகின் கவனத்தை ஈர்க்கத் தவறியதற்கு லிபியாப் போர் காரணமாக இருக்கலாம் என்று நம்பப்படுகிறது.

என்றாலும் ஐநா செயலாளர் நாயகம் இந்த விவகாரத்தைத் தனது மேலான கவனத்தில் எடுத்துள்ளார். இரு நாடுகளும் ஆயுத மோதலைக் கைவிட வேண்டும் என்றும் அமைதி வழியில் பிரச்சனைக்குத் தீர்வுகாண வேண்டும் என அவர் சென்ற வாரம் பகிரங்க அழைப்பு விடுத்துள்ளார்.

நன்றி. ஈழம் பிரஸ்