வடபகுதிக்கு சென்ற ஊடகவியலாளர்கள் படையினரால் தடுக்கப்பட்டனர்

[ வியாழக்கிழமை, 07 யூலை 2011, 03:20.30 AM GMT ]

இலங்கையின் வடபகுதிக்கு வெளிநாட்டவர்கள் தடையின்றி செல்லமுடியும் என்று நேற்று முன்தினம் பாதுகாப்பு அமைச்சு தெரிவித்திருந்த நிலையில், நேற்றைய தினம் சென்ற வெளிநாட்டு ஊடகவியலாளர்கள் படையினரால் தடுத்து நிறுத்தப்பட்டனர்.

இந்த சம்பவம் தொடர்பில் தெரியவருவதாவது:

இலங்கையின் வடக்குக்கு வெளிநாட்டவர்கள் தடையின்றி செல்லமுடியும் என்று நேற்று முன்தினம் இலங்கையின் பாதுகாப்பு அமைச்சு தெரிவித்திருந்தது.

இந்தநிலையில், உள்நாட்டு மற்றும் வெளிநாட்டு ஊடகவியலாளர்கள் நேற்று வடபகுதிக்கு செய்தி சேகரிப்புக்காகச் சென்றனர்.

எனினும் அவர்களை வடபகுதிக்கு செல்லமுடியாது என்று வவுனியா சோதனைச் சாவடியில் வைத்து படையினர் தடுத்துள்ளனர்.

இதனையடுத்து வெளிநாட்டவர்களுக்கு வடக்கு செல்வதற்கான தடை நீக்கப்பட்டுள்ள செய்தித்தாள் செய்தியை ஊடகவியலாளர்கள் படையினருக்கு காட்டினர். எனினும் அதனை படையினர் ஏற்றுக்கொள்ளவில்லை.

வடபகுதிக்குச் செல்வதாகவிருந்தால் பாதுகாப்பு அமைச்சின் முன் அனுமதி தேவை என்று அவர்களுக்கு பதிலளிக்கப்பட்டது.

இது தொடர்பில் இராணுவப் பேச்சாளர் உபய மெதவலவை தொடர்புகொண்டபோது ஊடகவியலாளர் வடக்குக்கு செல்வது தொடர்பில் பாதுகாப்பு அமைச்சே தீர்மானிக்கும் என்று தெரிவித்துள்ளார்.

http://www.tamilwin.com/view.php?20cIBB30eFjQM4ebiGphcbdF92Mddc8293bc41pG3e43oQj2023PLG22