நம்பிக்கை இழக்காதே! மனம் தளராதே! என்பது தான் அறிவியல் அறிஞர் ஒருவர் அனைவருக்கும் தரும் யோசனை! நமது மூட், ஆசைகள் மற்றும் உணர்வுகளுக்கு ஏற்ப நம்முடைய உடல் மாறிவிடும் தன்மை படைத்தது. நல்ல உணவை நினைத்தால் ஜீரண சுரப்பிகள் சுரக்கும், வாயில் எச்சில் ஊறும்! ஒரு துயரகரமான நிகழ்ச்சியை நினைத்தாலே சிலர் அழுது விடுவர்! ஒரு பேரழகியைக் கண்ணால் கண்டவுடனே கண்கள் பளபளக்கும்! ஆக, நமது சுவாசம் ‘மூடு'டன் மிக நெருங்கிய தொடர்புடையது! விஞ்ஞானி ஃப்ராய்ட், தான் ஆல்ப்ஸ் மலையில் பார்த்த ஒரு இளம்பெண்ணைப் பற்றி விவரித்துள்ளார். அவளுக்கு அடிக்கடி நரம்புத் தளர்ச்சி உருவாகும். தலைசுற்றல், காதில் ஓசை இடைவிடாமல் கேட்டல், மார்பில் எரிச்சல், தொண்டை அடைப்பு, சாவு உடனே வந்து விடுவது போன்ற உணர்வு இவை எல்லாம் தொடர்ந்து வரும். ஃப்ராய்ட் மிகுந்த மன உளைச்சலினால் இது ஏற்பட்டது என்று கண்டார். முன் மூளை உள்ளறையின் அடிப்பகுதியில் இருக்கும் பகுதியான ஹைப்போதாலமஸே மன உணர்வுகளுக்கு ஏற்ப உடல் நிலை மாற்றத்தை ஏற்படுத்துகிறது. இரண்டு அமெரிக்க டாக்டர்கள் ஒரு சிறிய சம்பவத்தை விளக்கிக் கூறியுள்ளனர். ஒரு கத்தோலிக்கர் இதய நோயால் அவஸ்தைப்பட்டுக் கொண்டிருந்தார். அவரைப் பார்க்க பாதிரியார் வந்தார். நோய்வாய்ப்பட்டிருந்தவரோ அவர் தனது இறுதிச் சடங்கிற்காகத் தான் முன்னமேயே வந்திருக்கிறார் என்று எண்ணிக் கொண்டார். மிகவும் பயந்து போன அவருக்கு ஹார்ட் அட்டாக் வந்தது. உடனே அவர் மரணமடைந்தார். அவரது மனதில் ஏற்பட்ட உளைச்சல் அவருக்கு மரணத்தைத் தந்தது. ஒரு நோயாளி சிகிச்சையில் தேறுவாரா அல்லது மீளமாட்டாரா என்பதை அவருக்கு எந்த அளவு மன உளைச்சல் இருக்கிறது என்பதை வைத்தே சொல்லி விடலாம்!

கர்ட் ரிச்சர் என்ற விஞ்ஞானி ஜான் ஹாப்கின்ஸ் மருத்துவ மனையில் ஒரு சில எலிகளை வைத்துச் சோதனை ஒன்றை நடத்தினார். முழு அளவு நீர் நிரப்பட்ட டம்ளரில் எலிகளை அவர் வைத்தார். ஒன்று நீந்தி அவை உயிரைக் காப்பாற்றிக் கொள்ள வேண்டும் அல்லது மூழ்கி அவை இறக்க வேண்டும். நார்வே எலிகளின் மூக்கு மயிர் அல்லது மீசை மயிரை அவர் வெட்டி எடுத்த போதெல்லாம் அவை இரண்டு நிமிடத்தில் மூழ்கி பரிதாபமாக உயிரை இழந்து விடும். ஆனால் இப்படி மூக்கு மயிரை எடுக்காத போதெல்லாம் எண்பது மணி நேரம் இடை விடாது நீந்தித் தங்கள் உயிரைப் பாதுகாத்துக் கொள்ளப் போராடும்!

அவை இறந்த போது, இடைவிடாது முயற்சி செய்து களைத்துப் போனதால் தான் அவை இறந்து விட்டன என்று சாமான்யருக்குத் தோன்றும். அப்படி அல்ல, அவற்றின் இருதயம் மெதுவாகத் துடித்ததனாலும் மெதுவாகச் சுவாசம் விட ஆரம்பித்ததாலுமே அவை இறந்தன! அவற்றின் உயிருக்கு ஒரு அபாய மிரட்டல் வந்தபோது அவை நம்பிக்கையற்ற ஒரு தன்மையை அடைந்தன. எதிர்த்துப் போராடவும் முடியவில்லை, அங்கிருந்து தப்பித்து ஓட வழியுமில்லை! நம்பிக்கை இழக்கத் தேவை இல்லை என்று அங்கு அவற்றிற்குக் காண்பிக்கப்பட்ட போதெல்லாம் அவை முயன்று போராடித் தங்கள் உயிரைக் காத்துக் கொண்டன!

மனிதர்களும் இப்படித்தான். ஒரு அறுவை சிகிச்சை நிபுணருக்கு தனது நோயாளி மனமுடைந்து முகத்தை இருள் படரவிட்டால் அவர் பிழைக்க மாட்டார் என்பது தெரியும். வெற்றிகரமான அறுவை சிகிச்சைக்குப் பின்னும் நோயாளி இறக்க இதுவே காரணம்! நார்மன் பாரட் என்ற உலக பிரசித்தி பெற்ற இருதய அறுவை சிகிச்சை நிபுணர் பி.பி.சி.யை சேர்ந்த அறிவியல் நிகழ்ச்சி அமைப்பாளரான கார்டன் ராட்ரே டெய்லரிடம் ஒருமுறை கூறினார். "மிகவும் கஷ்டமான எனது வேலை அறுவைச் சிகிச்சைக்கான ஆபரேஷன் அல்ல; அது முடிந்தவுடன் வார்டுகளில் சென்று நோயாளிகளிடம் வாழ வேண்டும் என்ற ஆசையை உருவாக்குவது தான்!"

அமெரிக்க அறுவை சிகிச்சைப் பேராசிரியரான ஜே.எம்.டின்னி அறுவை சிகிச்சையின் முடிவு என்னவாகுமோ என்று பயப்படும் எந்த ஒரு நோயாளிக்கும் ஆபரேஷன் செய்ய மாட்டாராம்!

வலியால் அவதிப்பட்ட சாதாரண காயங்களை அடைந்தவர்கள் தூக்க மருந்தை மிகச் சிறிய அளவே சாப்பிட்ட போதும் இறந்தது அவர்கள் தங்கள் நம்பிக்கையை இழந்து "தங்களைத் தாங்களே விட்டு விட்டது தான்!" ஆனால் எந்த ஒரு அபாயத்திலும் நம்பிக்கை இழக்காதவர்கள் அதிலிருந்து மீண்டு வாழத் தொடங்குகிறார்கள்.

ஆகவே எந்த ஒரு கட்டத்திலும் எப்போதும் நம்பிக்கையை இழக்காதே, மனம் தளராதே என்பதே விஞ்ஞானிகளின் ஆலோசனை!

*************

அறிவியல் அறிஞர் வாழ்வில்...

நோபல் பரிசு பெற்ற இயற்பியல் விஞ்ஞானி ரிச்சர்ட் ஃபெய்ன்மேன் அருமையாக ட்ரம் வாசிக்கும் விற்பன்னர். 1966ஆம் ஆண்டில் ஸ்விட்சர்லாந்தை சேர்ந்த ஒரு புத்தகப் பதிப்பாளர் அவரிடம் என்சைக்ளோபீடியா ஒன்றை வெளியிடப் போவதாகவும் அதற்கு அவர் ட்ரம் வாசிப்பது போல போஸ் கொண்ட போட்டோ ஒன்றைத் தந்தால் அது கருத்தியற்பியல் தரும் கஷ்டமான விஷயங்களுக்கு மனிதத் தன்மையுள்ள அணுகுமுறையைக் காண்பிப்பதால் இருக்கும் என்றார்.

ஃபெய்ன்மேன் என்ன பதில் தந்தார் தெரியுமா?

அன்புள்ள ஐயா!

நான் ட்ரம் வாசிப்பதற்கும் 'கொள்கை நிலை இயற்பியல்' ஆராய்ச்சி செய்வதற்கும் எந்தவித சம்பந்தமும் இல்லை. கருத்தியற்பியல் என்பது மனிதனின் முயற்சி. இது மனிதர்களின் மேம்பாடுகளில் ஒன்று. சில மனிதர்கள் பாங்கோ ட்ரம் வாசிப்பதைப் போல நானும் செய்து காண்பித்து கருத்தியற்பியல் அறிஞர்களும் மற்ற விஷயங்களைச் செய்யும் மனிதர்கள்தான் என்று நிரூபிக்க முயலும் இடைவிடாத ஆசை என்னை இழிவு படுத்தும் ஒன்றாகும். நீங்கள் நரகத்தில் விழுங்கள் என்று சொல்லுமளவு நான் மனிதத்தன்மை வாய்ந்தவன்!

தங்கள் அன்புள்ள

ஃபெய்ன்மேன்

(ரிச்சர்ட் பிலிப்ஸ் ஃபெய்ன்மேன் (1918-1988) அமெரிக்க இயற்பியல் விஞ்ஞானி. க்வாண்டம் எலக்ட்ரோடைனமிக்ஸ் துறையில் ஆராய்ச்சிக்காக நோபல் பரிசை 1965ம் ஆண்டு பெற்றவர்)

நீதி: உண்மையான அறிஞர்கள் மலிவான விளம்பரத்திற்கு ஆசைப்பட மாட்டார்கள்.

************

நன்றி : பாக்யா

www.nilacharal.com

உடம்பில் நோய் இல்லாத ஒருவரைப் பார்த்து.....

என்ன, முகம் எல்லாம் வெளிறிக்கிடக்குது. சுகமில்லையா என்று கேட்டால். அவர் யோசிக்க ஆரம்பித்து விடுவார்... அதனையே வேறு இரண்டு மூன்று பேர்.. திரும்பத், திருப்பக் கேட்ட்டால்.. அன்று நிச்சயம் தனது குடும்ப வைத்தியரிடம் செல்வார். இணைப்பிற்கு நன்றி உடையார்.