26.10.11 டூர் & இண்டர்நேஷனல் ஸ்பெஷல் தாய்நாட்டிலிருந்து துரத்தப்பட்டு, சொந்தமாக ஒரு நாடில்லாமல், எங்கு குடியேறுவது எனத் தெரியாமல், ஒரு நாட்டைத் தேடி உலகம் சுற்றி அலைவது எப்படியிருக்கும்? இலங்கையிலிருந்து அகதியாக வெளியேறி பல்வேறு நாடுகளுக்குச் சென்று, தற்போது கனடாவில் குடியேறியிருக்கும் ராஜா மகேந்திரன் தன் அனுபவங்களைச் சொல்கிறார்.

”உலகம் சுற்றிய தமிழர் என்று ஏ.கே.செட்டியாரைச் சொல்வார்கள். ஆனால், தற்காலத்தில் உலகம் சுற்றிய தமிழர்கள் என்றால் அது இலங்கைத் தமிழர்கள்தான். ஒரு வித் தியாசம் - குடியேற ஒரு நாடு தேடி நாங்கள் உலகம் சுற்றினோம்.

இலங்கையில் யாழ்ப்பாணம் அருகேயுள்ள கொக்குவில் கிராமம்தான் எங்கள் ஊர். 1983-ம் ஆண்டு இனக்கலவரம் காரணமாக நான் படித்துக்கொண்டிருந்த பேராதனை பல்கலைக்கழகம் மூடப்பட்டது. கலவரம் பெரிதாக 1984-ம் ஆண்டு தாய்நாட்டைப் பிரிந்து வெளியேறினேன்.

வெளியேறிவிட்டேனே தவிர எங்கு போவது எனத் தெரியவில்லை. அந்தக் காலத்தில் இலங்கைத் தமிழ் அகதிகள் பெரும்பாலும் மேற்கு ஜெர்மனிக்கே சென்றார்கள். நானும் அங்கே சென்றேன். ஆனால், மொழிப் பிரச்னை காரணமாக அங்கு தொடர்ந்து நீடிக்க முடியாத நிலை. எனவே, எனது நண்பர்கள் அதிகம் பேர் இருக்கும் கனடாவுக்குச் செல்லலாம் என முடிவு செய்தேன். ஆனால், அது அவ்வளவு சுலபமாக இருக்கவில்லை. ஜெர்மனியில் இருந்து மெக்சிகோவுக்கு சென்றேன். பிறகு அங்கி ருந்து அமெரிக்கா சென்றேன். அமெரிக்காவில் மூன்று மாதம் என்னை தடுப்புக் காவலில் வைத்துவிட்டார்கள். அடுத்து என்ன நடக்கும், என்ன செய்வது என தெரியாமல் நகர்ந்த நாட்கள் அவை. சட்டப் போராட்டத்துக்குப் பிறகு விடுவிக்கப்பட்டேன். கனடா சென்று அகதி நிலை கோரி விண்ணப்பித்தேன். அது ஏற்றுக்கொள்ளப்பட்டதும் கனடாவில் குடியேறினேன். என் ஜெர்மனி டூ கனடா பயணம் த்ரில், சந்தோஷம், கவலை எல்லாம் கலந்தது.

அக்காலத்தில் கனடாவில் பெரும்பலானவர்களுக்கு இலங்கை என்ற நாடு இருப்பதே தெரியாது. இதனால், இலங்கையில் நான் பெற்ற பொறியியல் பட்டம் அங்கு பயன் படவில்லை. எனவே, தளவாடங்கள் செய்யும் சிறிய தொழிற்சாலைகள், ஹோட்டல்கள் என கிடைத்த இடங்களில் எல்லாம் பகலில் வேலை பார்த்தேன். இரவில் கம்பெனிகளில் செக்யூரிட்டி கார்ட் பணி செய்தேன்.

டொரண்டோவில் ஒரு அடுக்குமாடி குடியிருப்பில் 28வது மாடியில் ஏழு பேர் சேர்ந்து வாடகைக்கு ஒரு வீடு எடுத்துத் தங்கினோம். ஏழு பேரும் வெவ்வேறு நாட்டைச் சேர்ந்தவர்கள். என்னைப் போல் சிறுசிறு வேலை பார்த்தவர்கள். எங்கள் வருமானத்துக்கு ஹோட்டல்களில் சாப்பிட்டால் தாக்குப் பிடிக்க முடியாது என்பதால், எங்களுக்குள் முறை வைத்து சமைப்போம்.

வேலை பார்த்துக்கொண்டே படித்து கனடா பல்கலைக்கழக புரொபஷனல் இன்ஜினீயர் பட்டம் பெற்றேன். அதன்மூலம் எனக்கு கன்சல்டண்ட் இன்ஜினீயர் வேலை கிடை த்தது. 1987-ம் ஆண்டு எங்களுக்குச் சொந்தமாக ஒரு வீடு வாங்கினேன். எங்கள் வீட்டில் இருந்து நயாகரா ஃபால்ஸ் 150 கி.மீ. தூரத்தில் உள்ளது.

1988-ம் ஆண்டு எனக்கு திருமணம் நடந்தது. எனது மனைவி யாழ்ப்பாணத்தைச் சேர்ந்தவர். அவரை ஸ்பான்ஸர் மூலம் கனடாவுக்கு வரவழைத்தோம். எங்களுக்கு இரு மகன்கள். இங்குள்ள பல்கலைக்கழகத்தில் படிக்கிறார்கள்.

1.5 ஏக்கர் காணியை 1.8 மில்லியன் கனடா டாலருக்கு வாங்கி 40 ஆயிரம் சதுர அடியில் ஒரு இண்டோர் மால் கட்டியிருக்கிறோம். இந்த கட்டடம்தான் கனடாவில் தெற்காசியாவைச் சேர்ந்த ஒருவர் கட்டிய முதல் மால்.

உலகில் மக்கள் வாழ்வதற்கு ஏற்ற சிறந்த நாடுகள் பட்டியலில் கனடாவுக்குதான் முதல் இடம். வாழ்க்கையில் உழைத்து முன்னேற தயாராக இருப்பவர்களை கனடா நிச்சயம் உயர்த்தும்.

இலங்கையில் இருந்து நாடில்லாமல் வெளியேறிய தமிழர்களுக்கு அடைக்கலம் தந்த நாடுகளிலும் கனடாவுக்குத்தான் முதலிடம். எனவே, தமிழர்கள் கனடாவுக்கு நன் றியுடையவர்களாக இருக்கக் கடமைப்பட்டிருக்கிறோம். நான் நிச்சயம் நன்றியுடையவனாக இருப்பேன்’’ என்கிறார் ராஜா மகேந்திரன்

- தளவாய் சுந்தரம்

-குமுதம்

"டிராவல் அன்ட் இன்டர்னேஷனல் சிறப்பிதழ்" தமிழ் நல்லா வாழுது தமிழ் நாட்டில!