அபிவிருத்திக்கு முன்னர் இறந்தோர்க்கு இறப்பு சான்றிதழைக்கொடுங்கள்: மாவை

இந்த நாட்டில் ஜனநாயக ஆட்சி நடைபெறுவதனை நீங்கள் ஏற்றுக்கொண்டீர்களானால் தமிழர்களது இறைமையினப் பறிக்க கூடாது. இவ்வாறு இன்று பாராளுமன்றில் கூறினார் மாவை சேனாதிராஜா. தமிழ் மக்கள் எப்போதும் தமது இறைமையினை சிங்கள அரசாங்கத்திற்கோ அல்லது சிங்கள அரச அமைப்பிற்கோ ஒப்புக்கொடுக்கவில்லை. கடந்த அறுபது ஆண்டு கால வரலாற்றில் நடைபெற்ற தேர்தல்கள் அனைத்திலும் தமிழ் மக்கள் தமது இறைமையினை வெளிக்காட்டியுள்ளனர்.

.

இன்று வரவு செலவுத்திட்ட விவாதத்தில் கலந்துகொண்டு உரையாற்றுகையிலேயே மேற்கண்டவாறு கூறினார். அவரது உரையின் சுருக்கம் வருமாறு;

.

போர் நடந்துவிட்டதாக நீங்கள் கூறிவருகின்றீர்கள் ஆனால் மேற்குலகிலும், தமிழ் மக்கள் மத்தியிலும் அவ்வாறு இல்லை என்றே கருதுகின்றார்கள். யுத்தத்தில் நடந்த உண்மைகள் வெளிக்கொண்டுவரவேண்டும். உங்களது. இந்த சபையில் நாங்கள் எத்தனை தடவை முள்ளிவாய்க்கால் போரின்போது உணவும் மருந்தும் அனுப்புமாறு கெஞ்சினோம். ஆனால் நீங்கள் கேலி செய்தீர்கள். மக்கள் அங்கே எழுபதாயிரம் பேர்தான் இருக்கின்றார்கள் என ஜனாதிபதியும் அமைச்சரும் பொய் சொன்னார்கள்.

.

ஆகையால்தான் கூறுகின்றோம் சகல வகையான உண்மைகளும் வெளிக்கொண்டுவரவேண்டும். ஆணைக்குழு அறிக்கை பாராளுமன்றில் சமர்ப்பிக்கவேண்டும். அதன் மீது நாம் கேட்கின்ற கேள்விகளுக்கு பதில் தரப்படவேண்டும்.

.

போர்வீரரை நினைவு கூருகின்ற உங்கள் மன்னனின் பரம்பரையில் வந்த நீங்கள் செய்தது என்ன? போரில் உயிர் நீத்த எங்கள் பிள்ளைகளின் இல்லங்களை கிழறி எறிந்தீர்கள். இடித்து தள்ளினீர்கள் இதுதானா உங்கள் பண்பாடு. இதுதானா உங்கள் மரபு. இறந்த எங்கள் பிள்ளைகளுக்காக நாம் அழக்கூடாதா? இதுதானா உங்கள் ஜனநாயகம்.

.

இராணுவத்தின் மூன்றாவது பிள்ளைக்கு கொடுப்பனவு கொடுக்கும் நீங்கள் எங்கள் குடும்பத்தில் இறந்த பிள்ளைகளுக்கு நட்ட ஈடு கொடுக்கப்படுகின்றதா? அழிந்த சொத்துக்களிற்கு நட்ட ஈடு கொடுப்பீர்களா?

.

வடக்கு கிழக்கில் இராணுவ ஆட்சிதான் நடக்கின்றது என்பதனை நான் இங்கு பதிவு செய்கின்றேன். எங்கள் நிலங்களை தமக்கு தருமாறு கோர இராணுவத்திற்கு யார் அதிகாரம் கொடுத்தார்கள்.

.

எங்களுக்கு உங்கள் நிதி வேண்டாம் முதலில் இறந்த எம் மக்களுக்கு சான்றிதழை கொடுங்கள். நாங்கள் உங்கள் அபிவிருத்தியினை கேட்கவில்லை. நீங்கள் அபிவிருத்தி என்ற பேரில் எம்மை அடிமைப்படுத்துகின்றீர்கள். அபிவிருத்தி என்பது அரசியல் தீர்வின் பின்னரே நாம் ஏற்றுக்கொள்வோம். வெளிநாடுகளில் கடன்களைப்பெற்று இராணுவத்தின் இருப்பை அதிகரிக்கின்றீர்கள்.

http://www.eelanatham.net/

Edited November 30, 201114 yr by உமை