கொழும்புக்குக் கூற வேண்டியது பற்றி கிருஷ்ணாவுக்கு நன்றாகத் தெரியும்

கொழும்புக்குக் கூற வேண்டியது பற்றி கிருஷ்ணாவுக்கு நன்றாகத் தெரியும் உறுதியான நம்பிக்கையில் தமிழ்க் கூட்டமைப்பு

இலங்கைக்கு உத்தியோகபூர்வ விஜயத்தை மேற்கொள்ளும் இந்திய வெளியுறவுத்துறை அமைச்சர் எஸ்.எம். கிருஷ்ணா அரச தரப்பு சந்திப்புகளுக்கு அப்பால் எதிரணி கட்சிகளான ஐக்கிய தேசியக் கட்சியினரையும் தமிழ்த் தேசியக் கூட்டமைப்பினரையும் சந்தித்து பேசவுள்ளார்.

நாளை மறுதினம் திங்கட்கிழமை கொழும்பை வந்தடையும் இந்திய வெளியுறவுத்துறை அமைச்சர் அன்றைய தினமே சந்திப்புகளை ஆரம்பிக்கவிருப்பதாக இலங்கைக்கான இந்திய உயர்ஸ்தானிகராலய வட்டாரங்கள் தெரிவித்தன.

எஸ்.எம். கிருஷ்ணா இந்த விஜயத்தின் போது ஜனாதிபதி மஹிந்த ராஜபக்ஷ, வெளிவிவகார அமைச்சர் ஜீ.எல். பீரிஸ் ஆகியோரை சந்தித்து பேசவுள்ளதுடன், ஐ.தே.க.வையும் தமிழ்த் தேசியக் கூட்டமைப்பையும் சந்தித்து கலந்துரையாடவிருப்பதாகவும் இந்திய உயர்ஸ்தானிகராலய அதிகாரி ஒருவர் கூறினார்.

இதில் தமிழ்த் தேசியக் கூட்டமைப்பினருடனான சந்திப்பே முதலாவதாக நடைபெறவுள்ளதாகவும் தெரிவிக்கப்பட்டது. இதற்கமைய எதிர்வரும் 16 ஆம் திகதி இந்திய வெளியுறவுத்துறை அமைச்சர் கிருஷ்ணாவுடன் தமிழ்த் தேசியக் கூட்டமைப்புக்கு சந்திப்பு இருப்பதாக அறிவிக்கப்பட்டிருப்பதாக அக் கட்சியின் யாழ்.மாவட்ட எம்.பி. சுரேஷ் பிரேமச்சந்திரன் தெரிவித்தார்.

அரசாங்கத்துக்கும் தமிழ்க் கூட்டமைப்புக்கும் இடையிலான அடுத்த சுற்று பேச்சுகள் எதிர்வரும் 17 ஆம் திகதி நடைபெற தீர்மானமாகியுள்ள நிலையில் அதற்கு முன்தினமே இந்த சந்திப்பு இடம்பெறவுள்ளது.

வடக்கு, கிழக்கு அரசியல் சூழ்நிலை, அரச, தமிழ்க் கூட்டமைப்பு பேச்சுகளின் நிலைமை, ஒரு வருடமாக இடம்பெற்று வரும் பேச்சுகளின் கதி, அரசின் செயற்பாடுகள் போன்ற விடயங்கள் பற்றி இச் சந்திப்பின் போது கிருஷ்ணாவிடம் எடுத்துரைக்க தமிழ்க் கூட்டமைப்பு எதிர்பார்த்துள்ளதாகவும் அவர் இதன்போது குறிப்பிட்டார்.

இதேநேரம், இந்த சந்திப்பின் மூலம் இந்திய அரசின் ஊடாக இலங்கை அரசிற்கு எதையாவது வலியுறுத்த தமிழ்த் தேசியக் கூட்டமைப்பு எதிர்பார்க்கிறதா என்ற கேள்விக்கு பதிலளித்த சுரேஷ் பிரேமச் சந்திரன்;

இந்திய அரசின் முயற்சியினாலேயே இந்த (அரச தமிழ்க் கூட்டமைப்பு) பேச்சுகள் ஆரம்பமாகின. இந்திய அரசினால் தான் அது இன்னும் நீடித்துக் கொண்டும் இருக்கிறது. பேச்சுகள் நடைபெறுகின்ற போதிலும் இதுவரை ஒரு அங்குலம் கூட எதுவும் நகர்ந்ததாக இல்லை. ஆகவே இலங்கை அரசாங்கத்துக்கு என்ன சொல்ல வேண்டும் என்பது கிருஷ்ணாவுக்கு இதிலிருந்தே புரிந்து கொள்ளக் கூடியதாக இருக்கும். அத்துடன், நாமும் சொல்ல வேண்டியதை எடுத்துச் செல்வோம் என்று கூறினார்.

இதேநேரம், இருநாட்டு வெளிவிவகார அமைச்சருடனான சந்திப்பின் பின்னர் இரு நாட்டு அமைச்சுகளிடையேயும் சில உடன்படிக்கைகள் கைச்சாத்திட விருப்பதாகவும் இந்திய உயர்ஸ்தானிகராலய அதிகாரி தெரிவித்தார்.

அத்துடன் வடக்கிற்கு விஜயம் செய்யவுள்ள இந்திய வெளியுறவுத்துறை அமைச்சர் கிருஷ்ணா அங்கு இந்திய அரசின் அனுசரணையில் புனர் நிர்மாணம் செய்யப்பட்ட பாடசாலையை கையளிக்கும் நிகழ்விலும் அதேபோல் இந்திய உதவியுடன் அமைக்கப்பட்ட இடம்பெயர்ந்தோருக்கான வீடுகளை மக்களுக்கு கையளிக்கும் நிகழ்வுகளிலும் கலந்து கொள்ளவுள்ளார்.

அத்துடன், தெற்கில் காலியில் இந்திய உதவியுடன் அமைக்கப்பட்டிருக்கும் ரயில் பாதையை திறந்து வைக்கும் நிகழ்விலும் கிருஷ்ணா பங்கேற்கவிருப்பதாகவும் இந்திய உயர்ஸ்தானிகராலய வட்டாரங்கள் மேலும் கூறின.

http://www.thinakkural.com/news/all-news/local/9863-2012-01-14-01-36-47.html