அமெரிக்க அரைகுறைத் தீர்மானமும் அபத்தமான உரிமை கோரல்களும்!

'இப்போதும் விடுதலைப் புலிகளே போராடுகின்றார்கள். முன்னர் போர்க்களத்தில் நின்று தமிழீழ விடுதலைக்காகப் போராடினார்கள். இப்போது, தங்களை சிங்கள தேசத்தின் இன அழிப்புக்குத் தங்களை இரையாக்கிவிட்டு, அதன் சாட்சிகளாக இருந்து போராடுகின்றார்கள்' என்று புலம்பெயர்ந்து வாழும் பெண் விடுதலைப் புலி ஒருவர் தெரிவித்திருந்தார்.

அதுவே உண்மை என்பதைத் தமிழ் மக்களும் நன்றாகவே புரிந்துகொண்டுள்ளார்கள். ஐ.நா. மன்றத்தின் ஆணைக் குழுவுக்கும், சனல் 4 தொலைக்காட்சிக்கும் ஈழப் போரில் தம்மை உருக்கிக்கொண்ட விடுதலைப் புலிகளும், அவர்களது மக்களுமே மௌன சாட்சிகளாக உள்ளார்கள். சிங்கள தேசத்தின் கொடூரங்களை உலகின் மனச்சாட்சிவரை கொண்டு சென்றது அவர்களது விம்பங்களும், ஒளிப் பேழைகளும். ஐ.நா. மனித உரிமைகள் மையத்தின் கதவுகளை அமெரிக்கா ஊடாகத் தட்டியது இறுதிப் போரின் அவலங்கள் மட்டுமே.

ஆனாலும், ஐ.நா. மனித உரிமைகள் அமர்வில் அமெரிக்கா கொண்டுவந்த தீர்மானத்திற்கு உரிமை கோரல்கள் எட்டுத் திசைகளிலுமிருந்தும் ஒலிக்க ஆரம்பித்துள்ளது. ஐ.நா. மனித உரிமைகள் அமர்வில் கலந்து கொள்வதைத் தவிர்த்து, சிங்கள ஆட்சியாளர்களைக் குஷி படுத்திய சம்பந்தனும் உரிமை கோருகின்றார். ஐ.நா. மனித உரிமைகள் மையத்தின் முன்னால் ஒத்த குரலில் ஓங்கி ஒலிக்க வேண்டிய புலம்பெயர் தமிழர்களது பலத்தைப் பிளவு படுத்தியதன் மூலம் சிங்கள தேசத்தின்மீதான் அழுத்தங்களைக் குறைக்க முயன்ற நாடு கடந்த தமிழீழ அரசாங்கம் என்ற குழுவும் உரிமை கோருகின்றது. இந்திய மத்திய அரசை அச்சுறுத்தி அடிபணிய வைத்ததால்தான் இந்த அதிசயம் நடந்ததென்று கருணாநிதியும் உரிமை கோருகின்றார்.

நான் உட்கார்ந்ததால்தான் பனம்பழம் வீழ்ந்ததென்று காகம் நினைப்பது போன்று இவர்களில் யார் எதையாவது நினைத்துவிட்டுப் போகட்டும் என்று விட்டுவிடலாம். ஆனால், வரலாறு தவறாகப் பதிவுபடலாகாது என்ற ஆதங்கம் தமிழ் மக்களிடம் மேலோங்கி உள்ளது.

'விடுதலைப் புலிகளுக்குப் பின்னர் என்றொரு காலம் தமிழீழ மக்களுக்கு எப்போதும் வரப் போவதில்லை' என்று தமிழீழ அரசியல்துறைப் பொறுப்பாளர் நடேசன் அவர்கள் ஒரு தடவை தெரிவித்திருந்தார். அதுவே நிதர்சனமாகவும் உள்ளது. விடுதலைப் புலிகள் தமிழீழ விடுதலைக்காக அன்றும் போராடினார்கள். இன்றும் போராடுகின்றார்கள். தமிழீழம் மலரும்வரை அவர்கள் தொடர்ந்தும் போராடுவார்கள். மலரும் தமிழீழத்திலும் அவர்கள் மக்களுடன் வாழ்வார்கள்.

இப்போது நடப்பதெல்லாம் அவர்களது இன்னொரு போராட்ட வடிவம் மட்டுமே. அதற்கு யாரும் கருவிகளாக இருக்கலாம். இருக்க வேண்டும். ஆனால், உரிமை கோர முன்வராதீர்கள். பூகம்பத்தின் அதிர்வுக்கும், புயலின் கோபத்திற்கும், எரிமலையின் கொந்தளிப்புக்கும் முன்னால் நானும், நீங்களும் விட்டில் பூச்சிகளே!

- ஈழநாடு