தை தமிழர் மரபுரிமை மாதமாக அங்கீகரிக்கும் தீர்மானம்! நாளை கனடா ஒன்றாரியோ மாகாணத்தின் பாராளுமன்றில்!!

கனடாவில் தமிழ் மொழிக்கு சிறப்புக் கௌரவம் வழங்கும் வைபவம் ஒன்று நாளை மாலை கனடாவின் ஒன்றாரியோ மாகாணத்தின் பாராளுமன்றமான “குயின்ஸ் பார்க்” கில் இடம்பெறவுள்ளது.

மேற்படி வைபவத்தில் எதிர்வரும் 2013ஆம் ஆண்டு தொடக்கம் தை மாதத்தை தமிழர் மரபுரிமை மாதமாக அங்கீகரிக்கும் தீர்மானத்தை மாகாணப் பாராளுமன்றத்தில் டொன்வெலி மேற்கு மாகாண பாராளுமன்ற உறுப்பினர் மைக்கல் குடோ முன்மொழிய முதல்வர் மற்றும் லிபரல் கட்சியின் பாராளுமன்ற உறுப்பினர்கள் அனைவரும் வழிமொழிவார்கள்.

மேற்படி வைபவம் இடம்பெறுவது, கனடிய தமிழர்கள் மத்தியில் மிகுந்த உற்சாகத்தையும் நம்பிக்கையை தரும் என்றும் எதிர் காலத்தில் கனடாவின் மத்திய பாராளுமன்றமும் தை மாதத்தை தமிழர்களின் மாதமாக கனடா முழுவதிலும் அங்கீகரிக்கும் வகையில் கடிதமொன்றை தமது இயக்கத்தின் தலைமைப் பீடம், கனடாவின் பல்கலாச்சார அமைச்சருக்கு அனுப்பி வைத்துள்ளதாகவும் உலகத் தமிழ் பண்பாட்டு இயக்கத்தின் தலைவர் வேல் வேலுப்பிள்ளை தெரிவித்துள்ளார்.

ஏற்கெனவே தை மாதத்தை கனடாவில் மார்க்கம் நகரசபை தமிழ் மரபுரிமை மாதமாக அங்கீகரித்துள்ளது. மேற்படி தீர்மானம் மார்க்கம் மாநகர சபையில் அங்கீகரிக்கும் அனைத்து முயற்சிகளையும் மார்க்கம் நகரசபையின் தமிழ் பேசும் உறுப்பினர் லோகன் கணபதி செய்திருந்தார் என்பது குறிப்பிடத்தக்கது.

http://eeladhesam.com