கிழக்குப் பத்திரிகையாளர்கள் ஐரோப்பிய நாடுகளில் தஞ்சம்.

கிழக்குப் பத்திரிகையாளர்கள் ஐரோப்பிய நாடுகளில் தஞ்சம்.

சிறீலங்காப் புலனாய்வுப் பிரிவினராலும், அவர்களுடன் சேர்ந்தியங்கும் கருணா குழுவினராலும் கொலை அச்சுறுத்தலுக்கு உள்ளாகும் தமிழ் ஊடகவியலாளர்கள், நாட்டை விட்டு வெளியேறுவது தற்பொழுது அதிகரித்து வருவதாக தெரிவிக்கப்படுகின்றது.

தமிழ் மக்கள் மீது சிறீலங்காப் படைத்துறை கட்டவிழ்த்து விட்டுள்ள மனித உரிமை மீறல்களை உலகிற்கு அம்பலப்படுத்தும் பணியை மேற்கொண்டு வரும் ஊடகவியலாளர்கள் மீது கொலைத் தாக்குதல்களும், கொலை அச்சுறுத்தல்களும் அதிகரித்துள்ளதன் காரணமாக, தமிழ் ஊடகவியலாளர்கள் பலர் நாட்டை விட்டுத் தப்பியோடும் நிலை ஏற்பட்டுள்ளது.

31.05.2004ம் திகதி மட்டக்களப்பின் மூத்த ஊடகவியலாளரும் பிரபல அரசியல் ஆய்வாளருமான திரு ஐயாத்துரை நடேசன், மட்டக்களப்பு நகரில் படுகொலை செய்யப்பட்டதைத் தொடர்ந்து ஆரம்பமான இந்த ஊடகவியலாளர்கள் வெளியேற்றம், தொடர்ந்து இடம்பெற்ற சிவராம், எஸ்.எஸ்.ஆர், ஜோசப் பரராசசிங்கம் போன்றவர்களின் படுகொலைகள் மற்றும் உதயன் செய்தி நிறுவனத்தில் மேற்கொள்ளப்பட்ட படுகொலைகள் என்பனவற்றைத் தொடர்ந்து தற்பொழுது உச்சக்கட்டத்தை அடைந்துள்ளதாகத் தெரிவிக்கப்படுகின்றது.

சிரேஷ்ட ஊடகவியலாளரும்;, இலங்கைத் தமிழ் ஊடகவியலாளர் ஒன்றியம் மற்றும் கிழக்கிலங்கைச் செய்தியாளர் சங்கம் போன்ற ஊடகவியலாளர் அமைப்புக்களின் தலைவரும் பிரபல அரசியல் பத்தியாளருமான இரா.துரைரத்தினம், இலங்கை தமிழ் ஊடகவியலாளர் ஒன்றியத்தின் இணைச் செயலாளரும், அரசியல் மற்றும் இராணுவ ஆய்வாளருமான நிராஜ் டேவிட், 2004ம் ஆண்டிற்கான சிறந்த தமிழ் ஊடகவியலாளர் விருதைப் பெற்ற தா.வேதனாயகம், மட்டக்களப்பு மாவட்ட இளம் பத்திரிகையாளர் சங்கத்தின் தலைவர் சந்திரபிரகாஷ், தமிழ் அலை பத்திரிகையின் நிர்வாக இயக்குனர் தில்லையம்மா, சக்தி தொலைக்காட்சியின் மட்டக்களப்புச் செய்தியாளர் ரவீந்திரன், தினக்குரல் ஆசிரியர் பீடத்தைச் சேர்ந்த சித்ராஞ்சன் போன்ற மட்டக்களப்பு மாவட்டத்தைச் சேர்ந்த ஊடகவியலாளர்கள் அண்மைக் காலங்களில் நாட்டை விட்டு வெளியேறி மேற்குலக நாடுகளில் அரசியல் தஞ்சம் அடைந்துள்ளதாக தெரியவருகின்றது.

இதேபோன்று மேலும் பல ஊடகவியலாளர்கள் தமது உயிரைக் காப்பாற்ற நாட்டை விட்டுத் தப்பியோடவேண்டிய நிலைக்குத் தள்ளப்பட்டுள்ளதாகவும் தெரியவருகின்றது.

செய்தி

ஆதர்சினி