ஸ்ரீலங்கா முஸ்லிம் காங்கிரஸ் தலைவர் ரவூப் ஹக்கீம் ஒரு இனத் துரோகி எனவும் மாபெரும் காட்டிக்கொடுப்பாளர் எனவும் எதிர்க்கட்சியை சேர்ந்த முஸ்லிம் தலைவர்கள் கொழும்பில் நேற்று நடைபெற்ற ஊடகவியலாளர் சந்திப்பில் குற்றம் சுமத்தியுள்ளனர்.

இந்த ஊடகவியலாளர் சந்திப்பில் கருத்து வெளியிட்ட ஐக்கிய தேசியக்கட்சியின் மேல் மாகாண சபை உறுப்பினர் முஜிபுர் ரஹ்மான், முஸ்லிம் காங்கிரஸ் தலைவர் செய்த மாபெரும் காட்டிக் கொடுப்பு காரணமாக கிழக்கு மாகாண மக்கள் கோபத்தில் இருப்பதாகவும் நெடு நாள் செல்லும் முன்னர் இந்த கோபம் வெடித்து சிதறும் எனவும் கூறியுள்ளார்.

ரவூப் ஹக்கீம் அரசாங்கத்திற்கு எதிராக பேசி, முஸ்லிம் மக்களின் உரிமைகளை பெற்று தருவதாக வாக்குறுதியளித்து, அரசாங்கத்துடன் இணைந்தது முஸ்லிம் மக்களின் பிரச்சினையை அடிப்படையா கொண்டு அல்ல. அவரது தனிப்பட்ட அதிகாரத்தை தக்கவைத்து கொள்வதற்காகவும் அமைச்சு பதவியை பாதுகாத்து கொள்வதற்காகவும் அவர் அரசாங்கத்துடன் இணைந்துள்ளார்.

அரசாங்கத்துடன் அவர் செய்து கொண்டுள்ள உடன்பாடு தொடர்பில் முஸ்லிம் மக்கள் ஹக்கீமை எப்போதும் மன்னிக்க போவதில்லை. கிழக்கு மாகாண முஸ்லிம் மக்களை அவர் காட்டிக்கொடுத்துவிட்டார் என இந்த ஊடகவியலாளர் சந்திப்பில் உரையாற்றிய நாடாளுமன்ற உறுப்பினர் கபீர் ஹசீம் தெரிவித்துள்ளார்.

அதேவேளை இந்த ஊடகவியலாளர் சந்திப்பில் உரையாற்றிய கொழும்பு மாநகர முதல்வர் ஏ.ஜே.எம். முஸ்ஸம்மில், நஜீப் அப்துல் மஜீட் பதவியேற்ற பின்னர், கால வரையாறைக்குட்பட்டு தான் முதலமைச்சர் பதவியை பெற்று கொள்ளவில்லை என கூறுகிறார். 5 வருடங்கள் நானே முதலமைச்சர் எனவும் அவர் தெரிவித்துள்ளார்.

ஆனால் முஸ்லிம் காங்கிரஸ், தாம் ஜனாதிபதியுடன் உடன்படிக்கை ஒன்றை கைச்சாத்திட்டுள்ளதாக கூறுகிறது. இதனை யாருக்கு கூறுகின்றனர். யாரை இவர்கள் ஏமாற்றுகின்றனர். உடன்படிக்கை எங்கே என்று கேட்டால், ஊடகங்களுக்கு அதனை காண்பிக்க முடியாது அது ரகசியமானது என்கின்றனர். அரசியல் கட்சிகள் ரகசிய உடன்பாடுகளை செய்வதில்லை. மக்களுக்கு தெரியாமல் உடன்படிக்கையை செய்வதில்லை. அவ்வாறான ஒப்பந்தங்கள் பகிரங்கமாக மேற்கொள்ளப்படும் எனவும் முஸ்ஸாம்மில் தெரிவித்துள்ளார்.

http://www.globaltamilnews.net/GTMNEditorial/tabid/71/articleType/ArticleView/articleId/83456/language/ta-IN/article.aspx

சம்பந்தருக்கே இப்பிடி கோபம் வந்திருக்குமோ தெரியாது.