கிழக்கு தேர்தல் சூட்சுமங்கள் அம்பலம்: பசீரின் ராஜனமா கடிதத்தை மஹிந்தர் இனமும் ஏற்கவில்லையாம்

சிறிலங்கா முஸ்லிம் காங்கிரஸின் தவிசாளரும் பாராளுமன்ற உறுப்பினருமான பஷீர் ஷேகு தாவுத் தனது பிரதியமைச்சர் பதவியை அவர் இராஜினாமாச் செய்திருந்த போதும் அவரது ராஜினாமாக் கடிதம் ஜனாதிபதி மஹிந்த ராஜபக்ஷவினால் இதுவரை எற்றுக் கொள்ளப்படாமை தொடர்பில் தற்போது பல்வேறு சந்தேகங்களையும் கேள்விகளையும் தோற்றுவித்துள்ளதாக தெரிய வருகிறது.

கிழக்கு மாகாண சபைத் தேர்தல் இடம்பெற்ற காலத்தில் தனது பிரதியமைச்சர் பதவியை பஷீர் ஷேகு தாவுத் இராஜினாமாச் செய்திருந்தார். ஆனால் இவரது ராஜினாமா கடிதம் ஜனாதிபதி மஹிந்த ராஜபக்ஷவினால் இதுவரை ஏற்றுக் கொள்ளப்படவில்லை. இதன் காரணமாக இவர் தொடர்ந்தும் பாராளுமன்றத்தில் பிரதியமைச்சர் ஆசன வரிசையிலேயே அமர்ந்து வருகிறார்.

அத்துடன் பிரதியமைச்சருக்கான (இவரது) பணியாளர் குழுவினரும் தொடர்ந்தும் சேவையிலீடுபட்டு வருகினறனர்.

இவ்வாறு இவர் பிரதியமைச்சர் பதவியிலிருந்து தானாக இராஜினாமாச் செய்தும் அதனை ஜனாதிபதி மஹிந்த ராஜபக்ஷ இதுவரை ஏற்றுக் கொள்ளாமை தொடர்பில் தற்போது பல்வேறு சந்தேகங்களும் கேள்விகளும் எழுந்துள்ளன.

சிறிலங்கா முஸ்லிம் காங்கிரஸின் அண்மைய செயற்பாடுகள் குறித்து அதிருப்தி கொண்டுள்ளவர்கள் இந்த விடயத்தையும் மு.காவின் இன்னொரு ஏமாற்று நாடகம் எனத் தெரிவித்துள்ளனர். ஜனாதிபதி மஹிந்த ராஜபக்ஷவுடன் பேசியே இவர்கள் இந்த நாடகத்தை அரங்கேற்றி முஸ்லிம் மக்களை ஏமாற்றியுள்ளனர் எனவும் அவர்கள் விசனம் தெரிவித்துள்ளனர்.

தனது கட்சியின் தவிசாளரான பஷீர் ஷேகு தாவுத் அவர் வகிக்கும் பிரதியமைச்சர் பதவியை இராஜினாமாச் செய்தாலும் அதனை ஏற்றுக் கொள்ளக் கூடாது என்று முஸ்லிம் காங்கிரஸின் தலைமை ஜனாதிபதி மஹிந்த ராஜபக்ஷவை பின்கதவால் சென்ற கேட்டுக் கொண்டதற்கு இணங்கவே பஷீரின் இந்த ராஜினாமா ஜனாதிபதியால் ஏற்றுக் கொள்ளப்படவில்லை என்றும் தெரிவிக்கப்படுகிறது.

கிழக்கு மாகாண சபைத் தேர்தல் காலத்தில் அரசையும் ஜனாதிபதி மஹிந்த ராஜபக்ஷவையும் விமர்சித்தும் பள்ளிவாசல் விவகாரங்களைப் பேசியும் முஸ்லிம் மக்களிடம் வாக்குக் கேட்ட முகா தலைமையானது,அந்த வேளையிலும் ஜனாதிபதி மஹிந்த ராஜபக்ஷவுடன் சில விடயங்களில் புரிந்துணர்வு செயற்பட்டது. இந்த அடிப்படையிலேயே பஷீரின் ராஜினாமா ஏற்றுக் கொள்ளப்படவில்லை என்றும் தெரிவிக்கப்படுகிறது.

வடமத்திய மாகாண சபைத் தேர்தல் முடிவின் பின்னர் அமைச்சரவை அந்தஸ்துள்ள அமைச்சரான எஸ்எம். சந்திரசிறி தனது அமைச்சுப் பொறுப்பினை இராஜினாமாச் செய்த போது அதனை ஜனாதிபதி மஹிந்த ராஜபக்ஷ உடனடியாகவே ஏற்றுக் கொண்டிருந்தார். ஆனால் கிழக்குத் தேர்தல் காலத்தில் முஸ்லிம் காங்கிரஸின் கடுமையான விமர்சனத்துக்குள்ளான ஜனாதிபதியும் அவரது அரசும் பஷீரின் இராஜினாமாவை ஏன் ஏற்றுக் கொள்ளவில்லை என்ற கேள்வியும் தற்போது எழுந்துள்ளது. இதன் மூலம் முஸ்லிம் காங்கிரஸின் பாம்புக்கு வாலும் மீனுக்குத் தலையையும் காட்டும் தனம் தெளிவாகிறது என்றும் கூறப்படுகிறது.

இதேவேளை, தனது இராஜினாமாவை ஏற்றுக் கொள்ளுமாறு ஜனாதிபதி மஹிந்த ராஜபக்ஷவுக்கு பஷீர் ஷேகுதாவுத் மீண்டும் கடிதம் ஒன்றினை அனுப்பியுள்ளார்.

http://thaaitamil.com/?p=34986