ஃபேஸ்புக்: போலீசார் சஸ்பெண்டை கண்டித்து சிவசேனா 'பந்த்’!

மும்பை: சிவசேனா தலைவர் பால்தாக்கரே குறித்து ஃபேஸ்புக்கில் கருத்து வெளியிட்ட 2 பெண்களை கைது செய்ய நடவடிக்கை எடுத்த காவல்துறை அதிகாரிகள் 2 பேர் சஸ்பெண்ட் செய்யப்பட்டதற்கு எதிர்ப்பு தெரிவித்து,இன்று சிவசேனா கட்சி முழு அடைப்பு போராட்டத்திற்கு அழைப்பு விடுத்துள்ளது.

சிவசேனா தலைவர் பால்தாக்கரே மரணம் அடைந்ததைத் தொடர்ந்து மறுநாள் மும்பையில் முழு அடைப்பு நடத்தப்பட்டது.இதை விமர்சித்து மகராஷ்ட்ரா மாநிலம் பல்கர் நகரை சேர்ந்த ஒரு பெண், ஃபேஸ்புக்கில் கருத்து தெரிவித்திருந்தார்.அதற்கு அவரது தோழி 'லைக்'போட்டிருந்தார்.

இந்நிலையில் சிவசேனா நிர்வாகிகள் கொடுத்த புகாரின் பேரில் அந்த 2 இளம்பெண்களும் கைது செய்யப்பட்டனர். அவர்கள் மீது போலீசார் 2 பிரிவுகளில் வழக்கு பதிவு செய்தனர்.அவர்களை 15 நாள் காவலில் வைக்க பல்கர் மாவட்ட ஜூடிசியல் மாஜிஸ்திரேட்ட ராமச்சந்திர பகடே உத்தரவிட்டார்.

பின்னர் அவர்கள் ஜாமீனில் விடுவிக்கப்பட்டனர்.இதற்கிடையே இந்த கைது நடவடிக்கை நாடெங்கும் பெரும் சர்ச்சையை ஏற்படுத்தியது.

இந்நிலையில் மாஜிஸ்திரேட் ராமச்சந்திர பகடே நேற்று திடீரென பல்கர் மாவட்டத்தில் இருந்து ஜல்கான் மாவட்டத்துக்கு இடமாற்றம் செய்யப்பட்டார்.இதற்கான உத்தரவை மும்பை உயர் நீதிமன்றம் வெளியிட்டது.

அதுமட்டுமல்லாது கைது நடவடிக்கையை மேற்கொண்ட காவல்துறை எஸ்.பி. மற்றும் ஆய்வாளர் ஆகிய இரு அதிகாரிகளையும் சஸ்பெண்ட் செய்து மகாராஷ்ட்ரா மாநில உள்துறை அமைச்சர் ஆர்.ஆர். பாட்டீல் உத்தரவு பிறப்பித்தார்.

இந்நிலையில் இந்த சஸ்பெண்ட் நடவடிக்கைக்கு எதிர்ப்பு தெரிவித்து, பல்கர் நகரில் சிவசேனா கட்சி இன்று முழு அடைப்பு போராட்டத்திற்கு அழைப்பு விடுத்திருந்தது.இதனால் அங்கு கடைகள் அடைக்கப்பட்டுள்ளன.வாகன போக்குவரத்தும் நிறுத்தப்பட்டு,இயல்பு வாழ்க்கை பாதிக்கப்பட்டுள்ளது.

http://news.vikatan.com/?nid=11412#cmt241