இலங்கை வன்முறைகள் குறித்து விசாரணை நடத்த கண்காணிப்புக் குழு:

இலங்கை வன்முறைகள் குறித்து விசாரணை நடத்த கண்காணிப்புக் குழு: சர்வதேச மன்னிப்புச் சபை

இலங்கை வன்முறைகள் குறித்து விசாரணை நடத்த கண்காணிப்புக்குழு ஒன்று அமைக்கப்பட வேண்டும் என்று சர்வதேச மன்னிப்புச்சபையின் அவுஸ்திரேலிய இணைப்பாளர் ரொபின் கில் பற்றிக் அம்மையார் வலியுறுத்தியுள்ளார்.

அவுஸ்திரேலிய விக்டோரிய ஈழத்தமிழ்ச் சங்கமும் அதன் சக தமிழ் அமைப்புக்களும் இணைந்து நடத்திய கண்டனப் பொதுக்கூட்டம் நேற்று சனிக்கிழமை மாலை மெல்பேணில் நடைபெற்றது.

இந்நிகழ்வில் கலந்து கொண்டு ரொபின் கில் பற்றிக் அம்மையார் பேசியதாவது:

சிறிலங்காவில் பரவலாக நடைபெற்றும் வன்முறை, தமிழ் நாடளுமன்ற உறுப்பினர்கள் மீதான தாக்குதல்கள், அதிகரித்துள்ள காணாமல் போதல் சம்பவங்கள், தேக்கமடைந்துள்ள பேச்சுக்கள், மனித உரிமை ஆணைக்குழுவுக்கான நியமனங்களில் ராஜபக்ச அரசு வெளிப்படுத்திய அரசியல் ஆதிக்கம், தொடர்ந்து நடைபெற்று வரும் உக்கிரமற்ற யுத்தம் ஆகியவை குறித்து சர்வதேச மன்னிப்பு சபை மிகுந்த கவலையடைகிறது.

தொடரும் வன்முறைகளால் கடந்த ஆறு மாதங்களில் மட்டும் அப்பாவி பொதுமக்கள் உட்பட 600 கொல்லப்பட்டுள்ளனர்.

கடந்த ஒரு மாதத்தில் மாத்திரம் சுமார் 200 மக்கள் படுகொலை செய்யப்பட்டுள்ளனர்.

கிழக்கிலங்கையில் சுமார் 20 ஆயிரத்துக்கும் மேற்பட்ட மக்கள் இடம்பெயர்ந்தள்ளனர்.

முழு அளவில் நடைபெறும் இந்த வன்முறைகளால் மனித உரிமைகள் குறிப்பாக இடம்பெயர்ந்த மக்களின் உரிமைகள் கடுமையாக பாதிக்கப்படும்

மனித உரிமைகள் ஆணைக்குழுவுக்கான நியமனங்களில் சிறிலங்கா அரசு காண்பித்துள்ள அரசியல் சாசனத்துக்கு புறம்பான ஆதிக்கத்தால் ஆணைக்குழுவின் செயற்திறன் பாரியளவில் பாதிக்கப்பட்டுள்ளது.

25 பேர் காணமல் போயுள்ளதாக அண்மையில் பதிவு செய்யப்பட்டுள்ள முறைப்பாடுகள், சிறிலங்காவில் 1995 - 96 காலப்பகுதியில் இராணுவ நடவடிக்கையில் இடம்பெற்ற காணமல் போதல் போன்ற ஒரு சூழ்நிலையை உருவாக்குமோ என்ற அச்சத்தை ஏற்படுத்தியுள்ளன.

எனவே, மனித உரிமைகள் வன்முறைகள் குறித்த உரிய விசாரணைகளை மேற்கொள்ள சர்வதேச மனித உரிமைகள் கண்காணிப்பு அமைப்புக்க சர்வதேச சமூகம் முழு ஒத்துழைப்பு வழங்கவேண்டும்.

குற்றவாளிகளை சட்டத்தின் முன் நிறுத்தவும் பாதிக்கப்பட்டவர்களுக்கு உரிய நட்ட ஈட்டை பெற்றுக்கொடுக்கவும் கொலைகள் மற்றும் காணமல் போதல்கள் குறித்து செம்மையான விசாரணைகள் மேற்கொள்ளப்பட வேண்டும்.

அச்ச, மேகங்கள் சூழ்ந்த நிலையை இல்லாமல் செய்யும் பொருட்டு வன்முறைகளை நிறுத்தவேண்டும்.

பிரச்சினையில் சம்பந்தப்பட்ட தரப்புகள் சரவதேச மனித உரிமை சட்டவிதிகளை பேணி அப்பாவி மக்களுக்கு பாதிப்பு ஏற்படாத சூழ்நிலையை உறுதிசெய்துகொள்ள வேண்டும்.

யுத்தத்தாலும் ஆழிப்பேரலையாலும் உள்நாட்டில் இடம்பெயர்ந்த மக்களுக்கு உரிய நிலையான தீர்வை பெற்றுக்கொடுக்க வேண்டும்.

மனித உரிமைகள் ஆணைக்குழுவுக்கு புதிய ஆணையாளர் ஒருவரை உடனடியாக நியமிப்பதன் மூலம் மனித உரிமைகளில் உள்ள ஈடுபாட்டை சிறிலங்கா அரசு காண்பிக்க வேண்டும்.

பொதுமக்களை நோக்கிய வன்முறைகளை நிறுத்தவேண்டும் என்றார் அவர்.

-புதினம்