அகதிகள் உயிருடன் விளையாடும் தரகர்கள்

அகதிகள் உயிருடன் விளையாடும் தரகர்கள்

மன்னார் கடல் கடும் கொந்தளிப்பாயிருப்பதால் கடற்றொழிலாளர்களே அதில் இறங்காத நிலையில், அகதிகளின் உயிர்களுடன் பணத்தாசை பிடித்த தரகர்கள் விளையாடுவதாக மன்னாரில் அரச அதிகாரிகள் கடும் விசனம் தெரிவித்துள்ளனர்.

கடந்த ஒரு வாரமாக மன்னார் மற்றும் தலை மன்னார் கடல் கடும் கொந்தளிப்பாயிருப்பதால் தொழிலுக்காக கடற்றொழிலாளர்கள் கூட கடலில் இறங்குவதில்லை.

ஆனால், கடந்த இரு நாட்களாக 150க்கும் மேற்பட்ட அகதிகள் கடற்

கொந்தளிப்பின் மத்தியில் தமிழகம் நோக்கிப் பயணம் செய்துள்ளதாகவும் இவர்கள் ஒழுங்காகப் போய்ச் சேர்ந்தார்களா என்பது குறித்து எதுவும் தெரியவில்லையெனவும் அதிகாரிகள் கூறுகின்றனர்.

திருகோணமலையிலிருந்து வந்து பேசாலை சென். மேரிஸ் பாடசாலையில் தங்க வைக்கப்பட்டிருந்தோரில் 50 பேர் கடந்த வியாழக்கிழமை அதிகாலை அங்கிருந்து வெளியேறியுள்ளனர்.

இவர்கள் படகுகள் மூலம் தமிழகம் சென்றிருக்க வேண்டுமெனத் தாங்கள் கருதுவதாகவும் நேற்று முன்தினம் வெள்ளிக்கிழமையும் நேற்று அதிகாலையும் மேலும் 107 பேர் இந்தப் பாடசாலையிலிருந்து வெளியேறி விட்டதால் அவர்களும் தமிழகத்திற்குப் பயணம் செய்திருக்கலாமென்றே தாங்கள் கருதுவதாகவும் அவர்கள் தெரிவித்தனர்.

தரகர்களே இந்த அகதிகளை ஏமாற்றி கடல் கொந்தளிப்பு பற்றி எதுவும் கூறாது சிறிய படகுகளில் பல பேரை ஏற்றி தமிழகம் நோக்கி அனுப்பி வைப்பதாகவும் இது அவர்களது உயிருடன் விளையாடும் செயலெனவும் அதிகாரிகள் கூறுகின்றனர்.

இதேநேரம், சிலாபத்திலிருந்து கூட்டி வரப்பட்ட திருகோணமலையைச் சேர்ந்த 18 அகதிகளும் சென்.மேரிஸ் பாடசாலையிலே தங்க வைக்கப்பட்டுள்ளனர். தற்போது இங்கு 171 அகதிகள் தங்கியுள்ளனர்.

இவர்களையும் தற்போது தலைமன்னார் புனித லோறன்ஸ் மகா வித்தியாலயத்தில் தங்க வைக்கப்பட்டுள்ள 50 அகதிகளையும், மன்னார் - தலைமன்னார் பிரதான வீதியில் நகர எல்லைக்குள் உள்ள இளைஞர் படையணி கட்டிடத்தில் தங்க வைக்கும் முயற்சிகள் நடைபெற்று வருகின்றன.

இங்கு ஏற்கனவே கடற்படையினரும் பொலிஸாரும் முகாமிட்டிருக்கையில் அவர்களுக்குப் பதிலாக அகதிகளை அந்த இடத்தில் அமர்த்தும் முயற்சிகளில் மன்னார் பிரதேச செயலர் திருமதி ஸ்ரான்லி டி மெல் ஈடுபட்டு வருகின்றார்.

-தினக்குரல்