சாதியம்

 

ஈழம் பிரிட்டனின் ஆட்சியில் இருந்த காலப்பகுதி..…. தாழ்ந்த சாதியை சேர்ந்த ஒருவர் கொழும்பில் இருந்து வரும் போது காலணி அணிந்திருந்ததற்காக ஒரு சாதிக்கலவரம்….. தாழ்ந்த சாதி என்ற வார்த்தைப்பிரயோகத்தை விட தாழ்த்தப்பட்ட சாதி என்பது மிகப்பொருத்தமாக இருக்கும். மூன்று தாழ்த்தப்பட்ட சாதியை சேர்ந்தவர்கள் உயிருடன் குடிசையொன்றில் போட்டு கொளுத்தப்பட்டார்கள்…… இது அண்மையில் ஒரு வயோதிபர் கூறிய தகவல். இதெல்லாம் அந்தநேரத்தில சர்வ சாதாரணமாய் நடந்தது தம்பி என்றார். அது மட்டுமல்ல உயர் சாதியினரின் கிணற்றில் தண்ணீர் அள்ளியதற்காக கொலைசெய்யப்படுவதும் உயர் சாதிப்பெண்ணை காதலித்ததற்காக கொலை செய்யப்படுவதும் சர்வ சாதாரணமாக நடந்திருக்கின்றன. அதற்கு பிற்பட்ட காலத்தில் ஓரளவு சாதிவெறி குறைந்து சிரட்டையில் நீர்வார்ப்பதும் மூக்குப்பேணிபயன்படுத்துவதாகவும் இருந்தது. அப்போதும் தீண்டாமை கொடுமை குறையவில்லை. கிணற்றில் நீர் அள்ளமுடியாது. உயர் சாதியினரின் வயலில் கால்வைக்கமுடியாது….. இப்படி ஏகப்பட்டவை…ஈழத்தில் மட்டுமல்ல இந்தியாவிலும் இதேநிலைதான். ஏன் உலகமெங்கும் இந்த சாதிய வெறி தலைவிரித்தாடியது. தலைவிரித்தாடிக்கொண்டிருக்கிறது. ஐரோப்பியரிடையே நிறப்பாகுபாடு எம்மவர்களிடையே சாதி பாகுபாடு.