வங்காலைப்பாட்டில் பெரும் அட்டூழியம்

வங்காலைப்பாட்டில் பெரும் அட்டூழியம்

-நூற்றுக்கணக்கான வாடி வீடுகள், படகுகள் தீக்கிரை; கடலுக்கு சென்ற 400 க்கும் மேற்பட்ட மீனவர்கள் கரை திரும்பவில்லை

மன்னார் வங்காலைப்பாட்டில் நேற்று சனிக்கிழமை காலை மீனவர்களின் நூற்றுக்கும் மேற்பட்ட வாடி வீடு களும், பேசாலை முதல் வங்காலைப்பாடு வரை ஐம்பதுக்கும் மேற்பட்ட கண்ணாடி நாரிழைப் படகுகளும் முற்றாக தீக்கிரையாக்கப்பட்டுள்ளன.

இதேநேரம், நேற்று அதிகாலை தலைமன்னார் முதல் மன்னார் வரையான கடற்பரப்பில் ஆழ்கடல் மீன்பிடிக்குச் சென்ற நானூறுக்கும் மேற்பட்ட மீனவர்கள் மாலை வரை கரைதிரும்பவில்லையென்றும் தெரிவிக்கப்படுகிறது.

பேசாலைக் கடற்பரப்பில் நேற்றுக் காலை கடற்படையினருக்கும் கடற்புலிகளுக்குமிடையே நடைபெற்ற கடற் சமரையடுத்தே கடற்றொழிலாளர் இந்த அனர்த்தத்தை சந்தித்துள்ளனர்.

இது பற்றி மேலும் தெரியவருவதாவது;

வங்காலையைச் சேர்ந்த பெருமளவு மீனவர்கள், பேசாலைக்கு அருகிலுள்ள வங்காலைப்பாட்டில் நூற்றுக்கும் மேற்பட்ட வாடிகளை அமைத்து மிக நீண்டகால தொழிலில் ஈடுபட்டு வருகின்றனர். இந்த வாடிகளில் பெறுமதி மிக்க வலைகள், வெளியிணைப்பு இயந்திரங்கள், மீன்கள் பழுதடையாது பாதுகாக்கும் பாரிய குளிரூட்டிப் பெட்டிகள் மற்றும் பெறுமதிமிக்க பொருட்களிருக்கும்.

நேற்று காலை 8 மணியளவில் இங்கு அதிக எண்ணிக்கையில் வந்த கடற் படையினர் மீன்பிடி வாடிகளுக்கு தீவைக்கவே வாடிகளிலிருந்த மீனவர்கள் அச்சத்தால் அங்கிருந்து தப்பியோட, அப்பகுதியிலிருந்த நூற்றுக்கும் மேற்பட்ட வாடிகளை கடற்படையினர் தீவைத்து முற்றாக எரித்துள்ளனர்.

இதனால் வங்காலைப்பாடு மீனவர்கள் அங்கிருந்து தப்பிச்சென்று அருகிலிருந்த முஸ்லிம் கிராமமான கரிசலில் தஞ்சமடைந்தனர்.

இதேநேரம், வங்காலைப்பாடு முதல் பேசாலை வரையான சுமார் இரண்டு கிலோ மீற்றர் தூரம் வரை கடற்கரையில் நிறுத்தப்பட்டிருந்த ஐம்பதுக்கும் மேற்பட்ட பெரிய கண்ணாடி நாரிழைப் படகுகள் கடற்படையினரால் குண்டு வைத்து தகர்க்கப்பட்டதுடன் முற்றாக தீக்கிரையாக்கப்பட்டுள்ளன.

காலை முதல் நண்பகலுக்குப் பின்னரும் இந்தப் படகுகள் பெரும் சுவாலையுடன் எரிந்து கொண்டிருந்தன.

நூற்றுக்கும் மேற்பட்ட வாடிவீடுகள் எரிக்கப்பட்டதாலும் ஐம்பதுக்கும் மேற்பட்ட பாரிய படகுகள் முற்றாக அழிக்கப்பட்டதாலும் ஐந்து கோடி ரூபாவுக்கு மேல் சேதங்கள் ஏற்பட்டுள்ளதாக ஆரம்ப மதிப்பீடுகள் தெரிவித்தன.

இந்தப் பகுதிக்கு எவரும் செல்ல அனுமதிக்கப்படாததாலும் பெரும் அச்சத்தாலும் எவராலும் உடனடியாக சேத விபரங்களை மதிப்பீடு செய்ய முடியவில்லை.

மீனவர்கள் கரைதிரும்பவில்லை

இதேநேரம், நேற்று அதிகாலை, தலைமன்னார் முதல் மன்னார் வரையான ஆழ்கடலுக்கு தொழிலுக்காகச் சென்ற நானூறுக்கும் மேற்பட்ட மீனவர்கள் நேற்று மாலை வரை கரை திரும்பவில்லையென மன்னார் அரசாங்க அதிபரிடம் முறைப்பாடு செய்யப்பட்டுள்ளது.

பள்ளிமுனை, தலைமன்னார், பனங்கட்டிக்கொட்டு, புதுக்குடியிருப்பு மற்றும் கரிசல் பகுதியிலிருந்து சென்ற மீனவர்களே கரை திரும்பவில்லையென முறைப்பாடு செய்யப்பட்டது.

அச்சம் காரணமாக இவர்கள் கரைதிரும்பவில்லையா அல்லது கடற்படையினர் இவர்களைக் கைது செய்தார்களா என்பது குறித்து உடனடியாக எதுவும் தெரியவரவில்லை.

நன்றி : தினக்குரல்