விடுதலைப் புலிகள் விட்ட இரு தவறுகள் : ஒரு பிழைப்பு வாதியின் ஓலம்

விடுதலைப் புலிகள் விட்ட இரு தவறுகள் : ஒரு பிழைப்பு வாதியின் ஓலம்

வன்னிப் படுகொலைகளின் வீழ்ந்த பிணங்களின் மேலால் நடந்து சயனைட் குப்பிகளை குப்பையில் வீசியெறிந்துவிட்டு கொலைகாரர்களோடு இணைந்து இன்று வடமாகாணத்தில் வேட்பாளராகியிருக்கும் தயா மாஸ்டர் என்ற வேலாயுதம் தயாநிதி விடுதலை புலிகள் இரண்டு தவறுகள் இழைத்ததாகக் கூறியுள்ளார். இலங்கை, இந்திய உடன்படிக்கையைத் தவறவிட்டமையும், நோர்வே சமாதான முன்னெடுப்பை பயன்படுத்திக் கொள்ளாமையும் கடந்த காலங்களில் விடுதலைப் புலிகள் இழைத்த இரண்டு தவறுகளாகும்.அதனால்தான் தமிழ் மக்கள் இந்தளவு இழப்பைச் சந்திக்க நேர்ந்தது என தயாமாஸ்டர் தெரிவித்துள்ளார்.

30 வருட ஆயுதப் போராட்டத்தையும் அதன் வழிமுறைகளையும் விமர்சிப்பதற்கு தயாமாஸ்டரிலிருந்து எரிக் சொல்ஹையும் வரைக்கும் பல காளான்கள் முளைத்துள்ளன. விமர்சிப்பவர்கள் இரண்டு வகையினர் முதலில் ஆயுதப் போராட்டமும் சுயநிர்ணய உரிமைக் கோரிக்கையும் சாத்தியமற்றது என்று கூறவும் அரசினதும் ஆளும்வர்க்கத்தினதும் காலடியொல் விழுந்து வணங்கி கிடைப்பதைப் பெற்றுக்கொள்ளுங்கள் என்று கூறும் பிழைப்புவாதக் கூட்டம். தயாமாஸ்டர், கருணா, டக்ளஸ், விக்னேஸ்வரன் என்று நீளும் இந்த வரிசை விரிந்து செல்கிறது. தமது பிழைப்புவாத நலன்களுக்காக தவறுகளை இந்தக் கும்பல் பயன்படுத்திக் கொள்கிறது.

சுயநிர்ணைய உரிமைக்காகப் போராட வேண்டும் என்ற உறுதிகொண்ட, இலங்கை இந்திய அரசுகளுக்கு எதிராகவும் ஏகாதிபத்தியங்களின் அழிவுகளுக்கு எதிராகவும் போராடுகின்றவர்கள் கடந்த காலப் போராட்டத்தை விமர்சிப்பது தேவையான ஒன்று. எதிர்காலத்தைச் செழுமைப்படுத்தும் நோக்கிலான மக்கள் நலன் சார்ந்த இவ்வகையான விமர்சனங்கள் அவசியமானவை.

தயாமாஸ்டர் போன்ற பிழைப்புவாதிகளுக்கும் எரிக் சொல்கையிம் போன்ற ஏகபோகங்களின் ஊழியர்களுக்கும் போராட்டம் குறித்து விமர்சிக்க எந்த உரிமையும் கிடையாது.

http://inioru.com/?p=36597