தகரக்கூடுகளில் கிளிநொச்சி - சிவபுரம் மக்கள்! உரியவர்களின் கவனத்திற்கு - கதை 1.

கிளிநொச்சி மாவட்டத்தின் கரைச்சிப் பிரதேச செயலாளர் பிரிவில் பரந்தன் பிரதேசத்தில் உள்ளது சிவபுரம். ஏ-9 வீதியிலிருந்து இரண்டு கிலோமீற்றர் தூரத்தில் உள்ளது இக் கிராமம். இந்தப் பகுதியில் உள்ள சுமார் 250 குடும்பங்கள் வசிப்பதற்கு வீடற்ற நிலையில் தகரக் கூடாரங்களிலும் கூரைகளால் வேயப்பட்ட குடிசைகளிலுமே வசித்து வருகின்றனர். 

 

 

“நானும் என்னுடைய கணவரும் மட்டுமே தற்பொழுது இங்கு இருக்கின்றோம். எனது பிள்ளைகள், பேரப்பிள்ளைகள், மருமகன் எல்லோரும் போரில் இறந்துவிட்டார்கள். மகள் ஒருத்தி விதவையாக இருக்கிறாள். எங்களுக்கு ஒரு வீட்டைக் கட்டித்தரவில்லை. எங்கள் குடும்ப எண்ணிக்கை போதாது என்றும் அதனால் புள்ளிகள் இல்லை எனறும் சொல்லிவிட்டார்கள். ஆனால் எங்கள் கிராமத்தில் வசிக்கும் யாருக்குமே வீடுகள் கட்டிக்கொடுக்கப்படவில்லை” 

 

மீள்குடியேற்றம் நடைபெற்று தற்பொழுது நான்கு வருடங்களைக் கடக்கின்றது. எனினும் இந்த மக்கள தொடர்ந்தும் இவ்வாறான கூடுகளிலும் குடிசைகளிலும் வாழ்கின்றனர். இங்குள்ள பல குடும்பங்களுக்கு இன்னமும் தற்காலிக வீடுகள்கூட கிடைக்கவில்லை என்றும் பிரதேசவாசிகள் அங்கலாய்ப்போடு தெரிவிக்கின்றனர்.