கந்துவட்டி கும்பலுக்கு பயந்து தனுஷ்கோடிக்கு பேரன்களுடன் வந்தார் யாழ்ப்பாணம் பெண்

ராமேஸ்வரம் : ராமேஸ்வரம் மரைன் போலீசார் நேற்று அதிகாலை தனுஷ்கோடி கடற்கரை பகுதியில் ரோந்து சென்றனர். அப்போது அரிச்சல்முனை கடற்கரையில் நின்று கொண்டிருந்த ஒரு பெண், 2 சிறுவர்களை பிடித்து விசாரித்தனர். இதில் இலங்கை யாழ்ப்பாணம் வல்வெட்டித்துறையை சேர்ந்த சிஸ்லி அம்மாள்(48), இவரது பேரன்கள் சியாக்கின்(6), லெட்சன்(2) என்பதும் அதிகாலையில் படகில் வந்திறங்கியதாகவும் தெரிவித்தனர்.

சிஸ்லி அம்மாள் போலீசாரிடம் கூறுகையில், ''மருமகன் பிரதீபன்(29) வாங்கிய கடனுக்காக கந்து வட்டி கும்பல் மிரட்டுகிறது. இதற்கு பயந்து வந்துள்ளேன்'' என்றார்.
2 நாளுக்கு முன் பேரன்களுடன் வல்வெட்டித்துறையிலிருந்து புறப்பட்டு மன்னார் வந்து பின்னர் நேற்று முன்தினம் இரவு தலைமன்னார் வந்துள்ளனர். பின்னர் அங்கிருந்து நேற்று அதிகாலை ஒரு மணியளவில் படகில் புறப்பட்டு 5 மணியளவில் தனுஷ்கோடி அரிச்சல்முனை கடற்கரையில் வந்திறங்கியுள்ளனர்.

அகதியாக வந்துள்ள சிஸ்லி அம்மாள் ஏற்கெனவே தமிழகத்திற்கு வந்து மண்டபம் முகாமில் தங்கியிருந்து பின் இலங்கைக்குச் சென்றவர் என்பது குறிப்பிடத்தக்கது.
சிஸ்லி அம்மாளை மரைன் போலீசார் மண்டபத்திற்கு அழைத்துச் சென்று தொடர்ந்து விசாரணை நடத்தி வருகின்றனர்.

எக்ஸ்ட்ரா தகவல்

ராமேஸ்வரம் அருகே தனுஷ்கோடி கடற்கரையிலிருந்து இலங்கையின் தலைமன்னார் நகரம் சுமார் 29 கிலோமீட்டர் தொலைவில் உள்ளது. இதனால் படகில் எளிதாக வந்துவிடலாம்.

http://www.dinakaran.com/News_Detail.asp?Nid=65112