மைக்கல் ஷூமாக்கர் வாழ்நாள் முழுவதும் கோமாவில் இருக்கும் ஆபத்து: ஜேர்மனிய நரம்பியல் நிபுணர்

போர்மியூலா வன் காரோட்டத்தில் 7 தடவை உலக சம்பியன் பட்டம் வென்ற ஜேர்மனிய வீரர் மைக்கல் ஷூமாக்கர் கோமா நிலையிலிருந்து ஒருபோதும் மீளாமல் போகக்கூடும் என அச்சம் தெரிவிக்கப்படுகிறது.

44 வயதான மைக்கல் ஷூமாக்கர் பிரான்ஸின் அல்ப்ஸ் மலைப்பகுதியில் கடந்த மாதம் 30 ஆம் திகதி பனிச்சறுக்கலில் ஈடுபட்டிருந்தபோது படுகாயமடைந்தார். அவரின் மூளையில் காயம் ஏற்பட்டுள்ள நிலையில் அவர் பிரெஞ்சு வைத்தியசாலையொன்றில் செயற்கை கோமா நிலையில் வைக்கப்பட்டுள்ளார்.

பொதுவாக விரைவாக குணமடைவதற்காக இத்தகைய செயற்கை கோமா நிலைக்கு நோயாளிகள் உட்படுத்தபடுவர். இரு வாரங்களில் அவர்கள் சுயநினைவுக்கு திரும்பச் செய்யப்படுவர். ஆனால் மைக்கல் ஷூமாக்கர் 18 நாட்களாக கோமா நிலையில் உள்ளார். அவர் எதிர்பார்த்த அளவு வேகமாக குணமடையவில்லை எனத் தெரிவிக்கப்படுகிறது.

இந்நிலையில் அவர் தனது வாழ்நாள் முழுவதும் கோமா நிலையில் இருக்கக்கூடிய ஆபத்துள்ளது என ஜேர்மனிய நரம்பியர் நிபுணரான அன்ட்ரியஸ் ஸீகர் தெரிவித்துள்ளார்.

எவ்வாறெனினும் "இது. சிக்கலாக இருக்கலாம். நாம் எதிர்வுகூறக்கூடாது. நாம் வாழ்க்கையையும் மரணத்தையும் பற்றி பேசிக்கொண்டிருக்கிறோம். கோமா நிலை வாழ்நாள் முழுவதும் நீடிக்கச் செய்யலாம். அது மனித மூளையை பாதிக்காது" எனஅவர் ஜேர்மன் மருத்துவ சஞ்சிகையொன்றுக்கு   தெரிவித்துள்ளார்.

மைக்கல் ஷூமாக்கர் குணமடைய வேண்டுமென உலகம் முழுவதுமுள்ள அவரின் இரசிகர்கள் பிரார்த்தித்து வருகின்றமை குறிப்பிடத்தக்கது.