சிறிலங்கா அரசியலில் தலையீடா?: இந்தியத் தூதுவர் விளக்கம்

[திங்கட்கிழமை, 11 செப்ரெம்பர் 2006, 18:52 ஈழம்] [கொழும்பு நிருபர்]

சிறிலங்கா அரசியலில் தலையிடுவதாக கூறப்படும் குற்றச்சாட்டு குறித்து இந்தியத் தூதுவர் நிருபமா ராவ் விளக்கம் அளித்துள்ளார்.

கொழும்பு ஆங்கில ஊடகம் ஒன்றுக்கு அவர் அளித்த நேர்காணலில் கூறியிருப்பதாவது:

அப்பல்லோ மருத்துவமனை விவகாரத்தைப் பொறுத்த வரையில் எமது இந்திய முதலீட்டாளர் நலன்களைப் பாதுகாப்பதற்காக தலையிட்டோம்.

இது விடயத்தில் உரிய வழிமுறையில்தான் தலையிடப்பட்டது. தனது நாட்டு வர்த்தக நலன்களை மேம்படுத்துவதில் தூதுவருக்கும் கடமை உண்டு.

இலங்கை தொழிலாளர் காங்கிரசைப் பொறுத்த வரையில் அக்கட்சி சொந்த முடிவின் படியே அரசாங்கத்தில் இணைந்துள்ளது.

முன்னர் சிறிலங்கா அரச தலைவர் மகிந்த ராஜபக்ச எமது இந்தியா இல்லத்துக்கு வருகை தந்தது விதிமுறைகளுக்கு அப்பாலானது அல்ல. இதற்கு பல முன் உதாரணங்கள் உள்ளன. நான் பெருவில் தூதுவராக இருந்த போது அந்நாட்டு அரச தலைவர் தனது மகள் மற்றும் அமைச்சருடன் விருந்து நிகழ்வில் கலந்து கொண்டிருந்தார்.

சிறிலங்காவிலும் முன்னர் பல முறை அரச தலைவர்கள் வந்துள்ளனர். ஆனால் அது குறித்து விவரிக்க முடியாது.

1960-களில் அமெரிக்க அரச தலைவராக இருந்த கென்னடி, அங்கே உள்ள இந்திய தூதுவருக்கு வருகை தந்திருக்கார். ஆகையால் இது விதிமுறைகளுக்கு எதிரானது என்று கூறமுடியாது.

இந்தியாவைப் பொருத்தவரையில் எந்த ஒரு வெளிநாட்டினது விவகாரங்களிலும் தலையிடாது என்பது அதன் வெளிவிவகாரக் கொள்கையில் முக்கியமானது ஒன்றை. அதனையே நாம் செய்கிறோம். சிறிலங்காவுக்கான தூதுவராகப் பணியாற்றிய ஜே.என். தீட்சித் காலத்தில் நாம் வெளிவிவகாரத்துறையில் பணியாற்றியுள்ளோம். மிகுந்த புத்திஜீவியான அவரிடமிருந்து நிறைய பாடங்களை நாம் கற்றுள்ளோம்.

சிறிலங்கா அமைச்சரின் விமர்சனம் குறித்து இந்திய அரசாங்கம் உடனே கருத்து தெரிவித்திருந்தமையானது என் மீது அரசாங்கம் வைத்திருக்கும் நம்பிக்கையை வெளிப்படுத்துவதாக இருந்தது.

ஆசியப் பிராந்தியத்தின் இரு பழைய ஜனநயக நாடுகளான இந்தியாவும் சிறிலங்காவும் இணைந்து புரிந்துணர்வுடன் செயற்பட வேண்டும் என்று விரும்புகிறோம். இதில் பெரிய நாடு, சின்ன நாடு என்றெல்லாம் பார்க்க முடியாது.

சிறிலங்காவுக்கான பாகிஸ்தான் தூதுவராக இருந்த பசீர் வலி மொகமெட் மீதான தாக்குதல் குறித்து அவர் கூறியிருக்கும் குற்றச்சாட்டுக்களை நிராகரிக்கிறோம்.

இலங்கையானது ஒரு பன்மைச் சமூக அமைப்பு கொண்டது. பல மொழி மற்றும் பல மதங்கள்- இனங்கள் இணைந்து நூற்றாண்டுகாலமாக வாழ்கின்றனர். வேற்றுமைகள் இருந்தாலும் இலங்கை என்ற ஒரு கட்டமைப்பில் இணைந்து உள்ளனர்.

இலங்கையின் ஐக்கியம், இறைமை மற்றும் பிரதேச ஒற்றுமை ஆகியவற்றின் அடிப்படையில் இனப்பிரச்சனைக்குத் தீர்வு காணப்பட வேண்டும். சிறுபான்மையினரது நலன்களுக்கும் பாதுகாக்கப்பட வேண்டும் என்றார் நிருபமா ராவ்.

http://www.eelampage.com/?cn=28744