தமிழ்ச்செல்வனுடன் கண்காணிப்புக்குழு தலைவர் சந்திப்பு

[வெள்ளிக்கிழமை, 15 செப்ரெம்பர் 2006, 18:00 ஈழம்] [காவலூர் சங்கீதன்]

தமிழீழ விடுதலைப் புலிகளின் அரசியல்துறைப் பொறுப்பாளர் சு.ப.தமிழ்ச்செல்வனை இலங்கை போர்நிறுத்த கண்காணிப்புக் குழுவின் புதிய தலைவராகப் பொறுப்பேற்றுள்ள லார்ஸ் சோல்வ்பேர்க் தலைமையிலான குழுவினர் இன்று சந்தித்துப் பேசினர்.

இச்சந்திப்பு கிளிநொச்சியில் உள்ள சமாதான செயலகத்தில் இன்று வெள்ளிக்கிழமை முற்பகல் 10.30 மணியிலிருந்து 11.15 மணிவரை நடைபெற்றது.

சு.ப.தமிழ்ச்செல்வனுடன் தமிழீழ காவல்துறைப் பொறுப்பாளர் பா.நடேசன் இச்சந்திப்பில் பங்கேற்றார்.

லார்ஸ் ஜொஹான் சோல்பெர்க் தலைமையிலான குழுவினரைச் சந்தித்த பின்னர் ஊடகவியலாளர்களிடம் சு.ப.தமிழ்ச்செல்வன் கூறியதாவது:

ஏ-9 பாதை மூடப்பட்டுள்ளதால் பொதுமக்களுக்கு ஏற்பட்டிருக்கும் மிக மோசமான பிரச்சனைகள் தொடர்பாக விளக்கம் வழங்கப்பட்டது. ஏ-9 பாதை மூடப்பட்டுள்ளமை பொதுமக்களைப் பெரிதும் அவதிக்குள்ளாக்குகிறது என்பதை கண்காணிப்புக்குழுவின் தலைவரும் ஏற்றுக்கொண்டார்.

தமிழர் தாயகப் பிரதேசங்களுக்கான இன்னும் பல பாதைகளும் தொடர்ந்து மூடப்பட்ட நிலையில் இருப்பதையும் அவருக்கு நாம் சுட்டிக்காட்டினோம். ஏ-9 பாதை உட்பட, பொதுமக்கள் பாவிப்பதற்கான பாதைகள் உடனடியாகத் திறக்கப்படுவது அவசியம். இது யுத்த நிறுத்த உடன்படிக்கை மீறல் மட்டுமல்ல, ஒரு முழு அளவிலான மனித உரிமை மீறலும் கூட என்பதைத் தெளிவுபடுத்தினோம்.

தமிழர் பகுதிகளில், மக்கள் தாங்கொணா துயரங்களை அனுபவித்து வருகிறார்கள். மிக ஆபத்தான அளவில், பொதுமக்கள் காணாமல் போகிறார்கள், கடத்தப்படுகிறார்கள், கொலை செய்யப்படுகிறார்கள்.

இடம்பெயர்ந்துள்ள பல்லாயிரக்கணக்கான மக்கள், மிகுந்த துன்பங்களை அனுபவித்து வருகிறார்கள். இவற்றுக்கும் மேலாக, சிறிலங்கா அரசு, திட்டமிட்ட அடிப்படையில், பொருளாதாரத் தடைகளை விதித்துள்ளது. அடிப்படை உணவு மற்றும் மருந்துப் பொருட்களுக்கும் கூட, தடை அமுலில் உள்ளது. இந்த சூழ்நிலையை புதிய கண்காணிப்புக்குழுத் தலைவருக்கு விளக்கினோம்.

யுத்த நிறுத்த ஒப்பந்தத்திற்கு முற்றிலும் முரணாக இந்த செயற்பாடுகளை சிறிலங்கா அரசு முன்னெடுத்து வருகிறது. இவற்றை நூறு வீதம் சரி செய்வது அவசியம் என்ற கோரிக்கையை விடுத்தோம். யுத்த நிறுத்த ஒப்பந்தத்தை சிறிலங்கா அரசு மதித்து நடப்பது அவசியம் என்பதை தெளிவுபடுத்தினோம்.

சிறிலங்கா அரசின் உயர்மட்டப் பிரதிநிதிகள் முன்னுக்குப் பின் முரணான கருத்துக்களை முன்வைத்து வருகிறார்கள். சிறிலங்கா அரச தலைவர், பிரதமர், இவர்களது உத்தியோகபூர்வ பேச்சாளர் என உயர்மட்டத்தில் உள்ளவர்கள் கூட, தங்களுக்கு இடையில் ஒருமித்த கருத்தை வெளிப்படுத்துவதாகத் தெரியவில்லை. இதனால், சிறிலங்கா அரசின் உண்மையான நிலைப்பாட்டை அறிய முடியாதுள்ளது.

தெளிவாக நாம் காணக்கூடியதாக உள்ள ஒரேயொரு விடயம், சிறிலங்கா அரசு போரை முன்னெடுப்பதிலேயே அக்கறை காட்டுகிறது என்பதையும், அதற்காக தமிழர் தாயகப் பிரதேசங்களின் பல பகுதிகளிலும் போர் களமுனைகளைத் திறந்துள்ளன என்பதையும் மட்டுமே. இதை அவருக்கு விளக்கியுள்ளோம் என்றார் சு.ப.தமிழ்ச்செல்வன்.

புதினம்