சர்வதேசத்தின் காதில் பூ குறைப்பிரசவமாக சாட்சிகளைப் பாதுகாக்கும் சட்டமூலம் பாராளுமன்றில் சமர்ப்பிப்பு

சாட்சிகளை பாதுகாக்க 10பேர் கொண்ட அதிகாரசபை - தலைவரை ஜனாதிபதி நியமிப்பார்- சட்டமூலத்தில் பரிந்துரை- அமைச்சர் ஹக்கீம் சமர்ப்பித்தார் - குளோபல் தமிழ்ச் செய்திகளின் விசேட செய்தியாளர்:-

உலகை ஏமாற்றும் முக்கிய விடயங்கள்-

1) பாராளுமன்ற நிலையியல் கட்டளை விதிகளுக்கு ஏற்ப எதிர்க்கட்சி உறுப்பினர்களையும் உள்ளடக்கிய பாராளுமன்ற தெரிவுக்குழு அமைக்கப்பட்டு இந்த சட்டமூலம் தயாரிக்கப்படவில்லை:

2) சட்டமூலத்தை சமர்பித்த அமைச்சர் ரவூப் ஹக்கீம் விவாதம் நடத்தப்பட்டு சட்டமூலம் எப்போது நிறைவேற்றப்படும் என எதுவும் கூறவில்லை:

3) சட்டமூலத்தின் பிரகாரம் அமைக்கப்படவுள்ள அதிகார சபையில் 10 பேர் அங்கம் வகிப்பர்:

4) ஐந்துபேர் நீதியமைச்சின் செயலாளர் உட்பட முக்கியமான அமைச்சுக்களின் செயலாளர்கள் அல்லது உயர் அதிகாரிகள்:

5) ஐந்துபேரை ஐனாதிபதி நியமிப்பார்...

சர்வதேச அழுத்தங்களினால் அவசர அவசரமாக தயாரிக்கப்பட்ட சாட்சிகளை பாதுகாக்கும் சட்டமூலத்தை நீதியமைச்சர் ரவூப் ஹக்கீம் இன்று புதன்கிழமை பிற்பகல் பாராளுமன்றத்தில் சமர்ப்பித்தார்.

எதிர்ப்பை வெளிக்காட்டும் நோக்கில் அமைச்சர்கள் பிரதி அமைச்சர்கள் எவரும் சபையில் இருக்கவில்லை என்றும் ஐக்கியதேசிய கட்சி உறுப்பினர்கள் ஒரு சிலர் மாத்திரமே சபையில் இருந்ததாகவும் குளோபல் தமிழ்ச் செய்திகளின் கொழும்புச் செய்தியாளர் தெரிவித்தார்.

பாராளுமன்ற நிலையியல் கட்டளை விதிகளுக்கு ஏற்ப எதிர்க்கட்சி உறுப்பினர்களையும் உள்ளடக்கிய பாராளுமன்ற தெரிவுக்குழு அமைக்கப்பட்டு இந்த சட்டமூலம் தயாரிக்கப்படவில்லை என்றும் அரசாங்கம் தன்னிச்சையாக சட்டமூலத்தை தயாரித்ததாகவும் எதிர்க்கட்சித் தலைவர் ரணில் விக்கிரமசிங்க குற்றம் சுமத்தினார்.

சட்டமூலத்தை சமர்பித்த அமைச்சர் ரவூப் ஹக்கீம் விவாதம் நடத்தப்பட்டு சட்டமூலம் எப்போது நிறைவேற்றப்படும் என எதுவும் கூறவில்லை. சபை முதல்வர் அமைச்சர் நிமல் சிறிபால டி சில்வா, அரசாங்கத்தின் பிரதமா கொறடா அமைச்சர் தினேஸ் குணவர்த்தன ஆகியோரும் சட்டமூலம் எப்போது விவாதத்திற்கு எடுத்துக் கொள்ளப்படும் என எதுவும் கூறவில்லை என குளோபல் தமிழ்ச் செய்திகளின் கொழும்புச் செய்தியாளர் தெரிவித்தார்.

சட்டமூலத்தின் பிரகாரம் அமைக்கப்படவுள்ள அதிகார சபையில் 10 பேர் அங்கம் வகிப்பர் என்றும் அதில் ஐந்துபேர் நீதியமைச்சின் செயலாளர் உட்பட முக்கியமான அமைச்சுக்களின் செயலாளர்கள் அல்லது உயர் அதிகாரிகள் அங்கம் வகிப்பர் என்றும் ஏனைய ஐந்துபேரை ஐனாதிபதி நியமிப்பார் என்றும் பரிந்துரைக்கப்பட்டுள்ளது.

ஐனாதிபதி நியமிக்கும் ஐந்துபேரில் ஒருவர் சாட்சியங்களை பாதுகாக்கும் அதிகார சபைக்கு தலைவராகவும் பதவி வகிப்பார் என்றும் சட்டமூலத்தில் கூறப்பட்டுள்ளது.

10பேர் கொண்ட அதிகாரசபையில் ஐந்துபேரை உள்ளடக்கிய முகாமைத்துவ சபை ஒன்று செயற்படும் என்றும் அந்த முகாமைத்துவ சபைக்கும் ஜனாதிபதியால் நியமிக்கப்படும் அதிகார சபையின் தலைவர்தான் தலைமை தாங்குவார் எனவும் சட்டமூலத்தில் பரிந்துரைக்கப்பட்டு உள்ளது.

ஆனால் அதிகார சபையின் பதவிக்காலம் எத்தனை வருடங்கள் என தெளிவாக சட்டமூலத்தில் கூறப்படவில்லை என எமது கொழும்புச் செய்தியாளர் மேலும் தெரிவித்தார்.

50இற்கும் அதிகமான பக்கங்களைக் கொண்ட சட்டமூலம் புத்தக வடிவில் சமர்ப்பிக்கப்பட்டது அதன் உள்ளடக்கங்களை அமைச்சர் ரவூப் ஹக்கீம் சமர்ப்பிக்கும்போது பாராளுமன்றத்தில் விபரிக்கவில்லை. ஆனால் பாராளுமன்ற உறுப்பினர் ஒருவர் மூலமாக சட்டமூல புத்தகத்தை பெற்றுக் கொண்ட குளோபல் தமிழ்ச் செய்தியாளர் உள்ளடக்கத்தின் சில விபரங்களை எமது தளத்திற்கு எழுதி அனுப்பியுள்ளார்.