டெல்லியில் பா.ஜனதா ஆட்சியமைக்கும் முயற்சிக்கு ஷீலா தீட்சித் ஆதரவு; காங்கிரஸ் அதிர்ச்சி!

புதுடெல்லி:  டெல்லியில் ஆட்சி அமைக்கும் பா.ஜனதாவின் முயற்சிக்கு அம்மாநில முன்னாள் முதலமைச்சர் ஷீலா தீட்சித் ஆதரவு தெரிவித்துள்ளது காங்கிரஸ் கட்சிக்கு அதிர்ச்சியை ஏற்படுத்தி உள்ளது.

டெல்லியில் கடந்த ஆண்டு இறுதிவாக்கில் ஆட்சியமைத்த ஆம் ஆத்மி கட்சித் தலைவர் அரவிந்த் கெஜ்ரிவால், ஜன்லோக்பால் மசோதாவை சட்டசபையில் நிறைவேற்ற காங்கிரசும், பா.ஜனதாவும் ஒத்துழைக்கவில்லை என்று கூறி பிப்ரவரி 14 ஆம் தேதி பதவி விலகினார். இதையடுத்து அங்கு சட்டசபை முடக்கி வைக்கப்பட்டு ஜனாதிபதி ஆட்சி அமல்படுத்தப்பட்டது.

இந்நிலையில் மத்தியில் ஆட்சி மாற்றம் ஏற்பட்டதை தொடர்ந்து,  சட்ட சபையில் தனிப்பெரும் கட்சியாக உள்ள பா.ஜனதாவை ஆட்சி அமைக்க வருமாறு அழைப்பு விடுக்க அனுமதி அளிக்க வேண்டும் எனக்கோரி ஜனாதிபதிக்கு டெல்லி ஆளுநர் நஜீப் ஜங் அண்மையில் கடிதம் எழுதினார். இதற்கு காங்கிரசும் ஆம் ஆத்மியும் கடும் எதிர்ப்பு தெரிவித்தன. இந்நிலையில் டெல்லி சட்டசபைக்கு தேர்தல் நடத்த உத்தரவிட வேண்டும் என்று ஆம் ஆத்மி கட்சி தொடர்ந்த வழக்கு இன்னும் நிலுவையில் உள்ளது.

இந்த நிலையில், டெல்லி முன்னாள் முதல்வரும் அண்மையில் கேரள கவர்னர் பொறுப்பை ராஜினாமா செய்தவருமான ஷீலா தீட்சித்  டெல்லியில் ஆட்சி அமைக்கும் பா.ஜனதாவின் முயற்சிக்கு ஆதரவு தெரிவித்துள்ளார்.

இது தொடர்பாக டெல்லியில் இன்று செய்தியாளர்களிடம் பேசிய அவர், "ஜனநாயகத்தில் தேர்ந்தெடுக்கப்பட்ட அரசுதான் எப்போதும் சிறந்தது. ஏனெனில் அது மக்கள் தேர்ந்தெடுத்தது. பாரதீய ஜனதா ஆட்சி அமைக்கும் நிலையில் இருந்தால் அது நல்லதுதான்” என்றார்.

இதனையடுத்து ஷீலாவின் இந்த கருத்துக்கு பா.ஜனதா வரவேற்பு தெரிவித்துள்ளது. இது தொடர்பாக கருத்து தெரிவித்த டெல்லி பா.ஜனதா தலைவர் சதீஷ் உபத்யாய், "
ஒரு அரசியல் கட்சி தலைவராக அவர் வெளியிட்ட கருத்து முதிர்ச்சியானது மற்றும் முக்கியமானது. ஷீலா தீட்சித் மூத்த அரசியல் தலைவர் அவர் அரசியல் அமைப்பு சட்டத்தை  நன்கு அறிந்தவர். அவருடைய கருத்தை நான் பாராட்ட விரும்புகிறேன்" என்று கூறினார்.

இந்நிலையில் ஷீலா தீட்சித்தின் இந்த கருத்துக்கு காங்கிரஸ் கட்சிக்கு அதிர்ச்சியை ஏற்படுத்தி உள்ளது. இது தொடர்பாக செய்தியாளர்களிடம் பேசிய டெல்லி காங்கிரஸ் தலைவர் முகேஷ் ஷர்மா, "ஷீலா தீட்சித் கருத்தால் மிகுந்த அதிர்ச்சி அடைந்தோம். அது அவருடைய சொந்த கருத்தாக இருக்கலாம்.காங்கிரஸ் கட்சி வேறு விதமான நிலைப்பாட்டை கொண்டுள்ளது. டெல்லியில் பாரதீய ஜனதாவை ஆட்சி அமைக்க விடக்கூடாது. அங்கு தேர்தல் நடத்த வேண்டும் என்ற நிலைப்பட்டை காங்கிரஸ் கட்சி கொண்டுள்ளது" என்றார். 

http://news.vikatan.com/article.php?module=news&aid=32279