சண்டிகர்: ஹரியானாவில் கைது செய்யப்பட்ட சர்ச்சை சாமியார் ராம்பாலை வருகிற 28 ஆம் தேதி வரை நீதிமன்ற காவலில் வைக்க நீதிமன்றம் உத்தரவிட்டதை தொடர்ந்து, அவர் சிறையில் அடைக்கப்பட்டார்.

நீதிமன்ற அவமதிப்பு வழக்கில் கைது செய்ய சென்ற போலீஸார் மீது ஆதரவாளர்களை ஏவிவிட்டு தாக்குதல் நடத்திய சாமியார் ராம்பாலுக்கு கொலை வழக்கில் வழங்கப்பட்டிருந்த ஜாமீனை ரத்து செய்து பஞ்சாப் மற்றும் ஹரியானா உயர்நீதிமன்றம் இன்று அதிரடி உத்தரவு பிறப்பித்தது.

இதனையடுத்து மருத்துவ பரிசோதனைக்காக அரசு மருத்துவமனையில் அனுமதிக்கப்பட்டிருந்த ராம்பால், பன்ச்குலா காவல் நிலைய லாக் அப்பில் அடைக்கப்பட்டார்.பின்னர் இன்று மதியம் நீதிமன்றத்தில் ஆஜர்படுத்தப்பட்ட அவரை, வருகிற 28 ஆம் தேதி வரை நீதிமன்ற காவலில் வைக்க உத்தரவிடப்பட்டது. இதனையடுத்து அவர் சிறையில் அடைக்கப்பட்டார்.

மருத்துவமனையிலிருந்து அழைத்து செல்லப்பட்டபோது செய்தியாளர்களிடம் பேசுகையில்,  தம்மீதான குற்றச்சாட்டுக்களை மறுத்த ராம்பால், தாம் யாரையும் பிணைக்கைதிகளாக பிடித்து வைக்கவில்லை என்றும், அடியாட்கள் படை எதையும் வைத்திருக்கவில்லை என்றும் கூறினார்.

மேலும் போலீஸார் தம்மை கைது செய்ய வந்தபோது நடந்த மோதலில் 6 உயிரிழந்த சம்பவத்திற்கு வருத்தம் தெரிவிப்பதாகவும் கூறினார்.

கைதுக்கு முன் நடந்த களேபரம்

முன்னதாக கடந்த 2006-ம் ஆண்டு நடந்த கொலை வழக்கில் ஒன்றில் சம்மன் அனுப்பியும் சாமியார் ராம்பால் ஆஜராகாததால் அவருக்கு எதிராக நீதிமன்ற அவமதிப்பு வழக்கு பதிவானது. இந்த வழக்கில் அவரை தேடி பார்வால ஆசிரமத்துக்கு போலீஸ் சென்ற போது சாமியாரை கைது செய்ய ஆதரவாளர்கள் எதிர்ப்பு தெரிவித்து, வன்முறையில் இறங்கியதால் கலவரம் வெடித்தது. இதில் காவல் ஆய்வாளர் உள்ளிட்ட 6 பேர் உயிரிழந்தனர். இதனையடுத்து டெல்லியிலிருந்து மத்திய பாராமிலிட்டரி படையினர் 500 பேர் வரவழைக்கப்பட்டனர். அவர்கள் உதவியுடன் போலீஸார் நேற்று ஆசிரமத்திற்குள் புகுந்து,  சாமியாரின் ஆதரவாளர்கள் 15 ஆயிரம் பேரையும் வெளியேற்றி, ராம்பாலை நேற்றிரவு கைது செய்தனர்.

கொலை முயற்சி மற்றும் கலவரத்தை தூண்டுதல் உள்ளிட்ட பல்வேறு பிரிவுகளின் கீழ் அவர் மீது வழக்கு பதிவுசெய்யப்பட்டுள்ளது. 

 

http://news.vikatan.com/article.php?module=news&aid=35084

இந்தவருசம் சாமிமாருக்கு பலன் நல்லாயில்லைப்போல.. பேசாமல் எல்லா சாமிமாரும் சேர்ந்து ஒரு யாகம் செய்துபார்க்கலாமே..