திணறும் மகிந்தர்

 

மகிந்த சிந்தனை 2, 2010 தேர்தலில் வந்திருக்க வேண்டும். வெற்றியில் பெரு நம்பிக்கை கொண்டதால், அது குறித்து அவர் அலட்டிக் கொள்ள வில்லை.

 

இம்முறையும் அது குறித்த கவலை இல்லாமல் தான் தேர்தலுக்கு அழைப்பு விடுத்தார். மைத்திரியின் பிரவேசம் மகிந்த சிந்தனை இரண்டினை அவசரம் அவசரமாக கொண்டு வர வைத்து விட்டது.

 

டிசம்பர் 26 ம் திகதி வெளியிட இருந்த அதனை, தீடீரென, அடடா, தபால் மூல வாக்களிப்பு 23ம் திகதி அல்லவா என்று நினைவுபடுத்த, முதல் நாளே அவசர அவசரமாக பல குளறு படிகளுடன் வெளியிடப் பட்டது.

 

ஆங்கிலத்தில் இல்லாத சிங்களத்தில் மட்டும், சிங்கள வாக்காளரை பயமுறுத்தும் வகையில், 'அங்கே உலகம் முழுவதும், உறுமியபடி, தகுந்த தருணம் வரும் வரை, தமது இரையினை கவ்வ புலிப் பயங்கரவாதிகள் இன்னமும் இருகின்றார்கள். ஒரு வித்தியாசம் அவர்கள் கையில் ஆயுதம் இல்லை. ஆனால் நான் ஜனாதிபதியாக இருக்கும் வரை இந்த நாடு பாதுகாப்பாக இருக்கும். அவர்கள் எண்ணம் ஈடு ஏறாது'  என்று சொல்கின்றார்.

 

அவரது பிரச்னை என்னெவெனில், யுத்தத்தினை முடித்த இவரது அரசின் முக்கிய உறுப்பினர் மைத்திரி. மே 17 அன்று மகிந்தர், ஜோர்டனில் இருந்த போது, மைத்திரியே, பதில் பாதுகாப்பு அமைச்சர். ஆகவே யுத்தத்தினை முடித்த தனது அரசின் பெரும் நாட்டுக்கான  'கடமையில்' அவரும் அல்லவா பங்கு கேட்கிறார். - அட போங்கப்பா.

 

ரணில் மட்டும் எதிர்த்து நின்றால் இந்த தேசிய கடமையை சொல்லியே, 'புலித்தோழர்' ரணிலை மண் கவ்வ வைத்திருக்க முடியும் இலகுவாய்... இப்ப என்ன செய்வது?

 

கிளம்பி அடுத்த பக்கம் போக விரும்பிய கூட்டத்தினை காசை கொடுத்து மடக்க, அவர்களோ காசையும் வாங்கிப் போட்டு உள்ள இருந்தே கழுத்தறுப்பு வேலை பார்கிறார்கள். விமல் வீரவன்ச அனுப்பிய குண்டர்கள் கூட்டம் UNP தலைமை அகம் முன் நடாத்திய அராஜகம், அதனைப் பொலிசார் தடுக்காமல் சும்மா பார்த்துக் கொண்டிருந்ததும், , மகிந்தவின் எதிரணி சொல்லும் 'இந்த நாட்டில் சட்டம் ஒழுங்கு இல்லை' என்பதை உறுதி செய்கிறது..அவனவன் வீடியோ எடுத்து youtube மூலம் மானத்தினை வாங்கி விட்டார்கள்.

 

தான்தான் சூத்திரதாரி என தெரிய வந்ததால், அவர்கள், UNP யின் ஜனநாயக விரோத செயல் பாடுகள் குறித்து அமைதியாக, ஆட்சேபம்  தெரிவிக்க போனவர்கள் என்கிறார், வீரவன்ச.

 

போதாகுறைக்கு ஒரு அடிபாட்டுக் கோஸ்டி பிரதி அமைச்சர், நீதிமன்ற பிடியாணை இருக்கையில் டிமிக்கி கொடுத்து விட்டு நாட்டை விட்டு வெளியேறினார். இவர் வெளியேறுவதை பார்த்த ஒருவர் அவசர போலீஸ் இலக்கத்துக்கு போன் செய்து, இவர் தப்பி ஓடுவது குறித்து சொல்லியும் ஒரு நடவடிக்கையும் விமான நிலையத்தில் எடுக்கவில்லை. மிகப் பாரிய damage உண்டான பின், அவரை உடனடியாக நாடு திரும்ப உத்தரவு damage control ஆக போக, வந்து இறங்கியதும் கைதானார்.-  இது போதாதா எதிரணிக்கு, நோகாம நொங்கு தின்ன.

 

அம்பாந்தோட்டை மேஜர் அடித்த அட்டகாசத்தில், கைதாகி நீதி மன்ற பிணையில் வெளியில் இருக்கின்றார். மகிந்தரின் சொந்த மாவட்டத்தில் அவருக்கு நிகழ்ந்த நெகடிவ் விளம்பரம்.

 

திஸ்ஸ அத்தநாயக்க என்ற ஒருவர் UNP ல் இருந்து பாய்ந்து வந்து, வாங்கிய பணத்துக்காக, மைத்திரி, ரணில் ஒப்பந்தம் என்று ஏதோ ஒன்றைக் காட்டி சீன் போட, அது போலி என்று அவர்கள் போலிசுக்கு போக, இது வேறையா என்று மகிந்தர் தலையில் அடித்துக் கொள்ளாக் குறையில் இருக்கிறார்.

 

உண்மையில் மகிந்தர் தனது நம்பகத் தன்மையை (credibility) முழுவதுமாக உள்ளும், புறமுமாக இழந்து விட்டார். சீனா கூட இவர் மீது நம்பிக்கை வைப்பது பாது காப்பானதோ என சிந்திக்கும் அளவுக்கு இவர் கொடுத்த வாக்குகள் எதனையும். பகிரங்கமாகவே நிறைவேற்றுவதில்லை, அது குறித்த கவலை படுவதோ, அல்லது காரணத்தினை நியாயப் படுத்துவதோ இல்லை.

 

காசுக்கு வந்த அடிபாட்டுக் கோஸ்டிகள், அடுத்த பக்கம் காசு காட்டினால் ஓடிப் போய் விடும். உதாரணம்: ரிசார்ட் பதியுதீன் எனும் அடாவடி அரசியல் வாதி. இன்னுமொருவர், மேர்வின்: மகனின் வழக்கு பிரச்சனையால் பாயாமல் இருக்கிறார், தற்சமயம்.

 

இதுவே இவரது மிகப் பெரிய பலவீனம்.