10,000 தொன் உணவுப் பொருள் தமிழகத்திலிருந்து யாழ். வரும்

உணவுப் பற்றாக்குறை காரணமாக பெரும் நெருக்கடியை எதிர்கொண்டுள்ள யாழ்ப்பாணத்திற்கு விநியோகிப்பதற்காக இலங்கை அரசாங்கம் தமிழ் நாட்டிலிருந்து 10,000 தொன் உணவுப் பொருட்களை கொள்வனவு செய்யவுள்ளதாக அதிகாரிகள் தெரிவித்துள்ளனர்.

தமிழ் நாட்டில் பயன்படுத்தப்படும் பல வகையான உணவுப் பொருட்களை கொள்வனவு செய்து கடல் வழியாக கொண்டு வருவதற்கும் நாகப்பட்டினத்திலிருந்து யாழ்ப்பாணத்தின் ஊர்காவற்றுறை பகுதிக்குக் கொண்டு செல்லவும் ஏற்பாடுகள் மேற்கொள்ளப்படுகின்றன.

யாழ்.குடாநாட்டில் அதிகம் தட்டுப்பாடாகவுள்ள செத்தல் மிளகாய், கோதுமை மா, கருவாடு, அப்பளம், சோயா, உப்பு, உருளைக் கிழங்கு, புளி, நவதானியம் உட்பட பல பொருட்களை தமிழ் நாட்டிலிருந்து கொள்வனவு செய்வதற்கு இலங்கை அரசாங்கம் தீர்மானித்துள்ளது.

இந்த வகையை சேர்ந்த 10,000 தொன் பொருட்களை கப்பல் மூலம் சென்னையிலிருந்து பருத்தித்துறைக்கு இரண்டு மூன்று கப்பல்களில் கொண்டு செல்வதற்கு தீர்மானிக்கப்பட்டுள்ளது.

இவற்றினை கப்பலில் ஏற்றி, இறக்கும் நடவடிக்கைகள் பல நாட்கள் நீடிக்கலாம் என தெரிவிக்கப்படுகின்றது.

இதேபோன்று, உணவுப் பொருட்களும் தமிழ் நாட்டின் நாகப்பட்டினத்திலிருந்து ஊர்காவற்றுறைக்கு எடுத்துச் செல்லப்படவுள்ளதாக தெரிவிக்கப்படுகின்றது.

தமிழ் நாட்டிலிருந்து எடுத்துச் செல்லப்படும் உணவுப் பொருட்கள், கூட்டுறவு சங்கங்களூடாக விநியோகிப்பதற்கு யாழ். அரசாங்க அதிபரிடம் ஒப்படைக்கப்படும்.

கொழும்பிலிருந்து பெறுவதை விட தமிழ் நாட்டிலிருந்து உணவுப் பொருட்களை கொள்வனவு செய்வது இலகுவானது என இலங்கை அரசாங்கம் கருதுகின்றது.

குறிப்பிட்ட நடவடிக்கைகளுக்காக இந்திய கப்பல்களா இலங்கை கப்பல்களா பயன்படுத்தப்படும் என்பது பற்றி எதுவும் தெரியப்படுத்தப்படவில்லை.

இதேபோன்று விநியோக நடவடிக்கைகளில் தனியார் வர்த்தகர்கள் ஈடுபடுத்தப்படுவார்களா என்பது குறித்தும் எதுவும் தெரிவிக்கப்படவில்லை.

-தினக்குரல்

இவ்வுணவுகள் யாழ்ப்பாண மக்களுக்கு உண்மையில் சென்றால் மகிழ்ச்சி. ஆனால் இராணுவத்துக்கும், துணைக்குழுக்களுக்கும் சென்றால் ?