டி 20 தொடரை வென்றது இங்கிலாந்து

 

பாகிஸ்தான் - இங்கிலாந்து அணிகள் இரண்டாவது டி 20 ஆட்டத்தில் துபையில் மோதின. முதலில் பேட் செய்த இங்கிலாந்து 8 விக்கெட் இழப்புக்கு 172 ரன் குவித்தது. வின்ஸ் 38, ஜோஸ் பட்லர் 33, ரன் எடுத்தனர். 173 ரன்கள் இலக்குடன் ஆடிய பாக். அணி 17 ஓவரில் 6 விக்கெட் இழப்புக்கு 126 ரன் எடுத்தது.

கடைசி 3 ஓவரில் வெற்றிக்கு 47 ரன்கள் தேவைப்பட்ட நிலையில் வோக்ஸ் வீசிய 18வது ஓவரில் அப்ரீடி 3 சிக்ஸர்கள் பறக்கவிட்டார். இந்த ஓவரில் 5 பந்தில் 21 ரன் சேர்க்கப்பட்ட நிலையில் கடைசி பந்தில் அப்ரீடி ஆட்டமிழந்தார். அவர் 8 பந்தில் 24 ரன் எடுத்தார். வில்லி வீசிய அடுத்த ஓவரில் பாக். அணி 14 ரன்கள் சேர்த்தது. கடைசி 6 பந்தில் 11 ரன்கள் தேவைப்பட்ட நிலையில் வோக்ஸ் வீசிய இந்த ஓவரின் முதல் பந்தில் சப்ராஸ் அமகது ஆட்டமிழந்தார். அதன் பின்னர் வந்த ஷோகையில் தன்வீர் தான் சந்தித்த முதல் பந்தை பவுண்டரிக்கு விரட்டினார்.

கடைசி பந்தில் 4 ரன்கள் தேவை என்ற நிலையில் அன்வர் அலி இந்த பந்தை வீணடித்தார். முடிவில் பாக். அணி 8 விக்கெட் இழப்புக்கு 169 ரன்கள் சேர்த்தது. 3 ரன்கள் வித்தியாசத்தில் வெற்றி பெற்ற இங்கிலாந்து அணி 3 போட்டிகள் கொண்ட தொடரை 2-0 என தன்வசமாக்கியுள்ளது. முதல் ஆட்டத்தில் இங்கிலாந்து 14 ரன்கள் வித்தியாசத்தில் வெற்றி பெற்றிருந்தது. கடைசி ஆட்டம் நாளை ஷார்ஜாவில் நடைபெறுகிறது.

http://tamil.thehindu.com/sports/%E0%AE%9F%E0%AE%BF-20-%E0%AE%A4%E0%AF%8A%E0%AE%9F%E0%AE%B0%E0%AF%88-%E0%AE%B5%E0%AF%86%E0%AE%A9%E0%AF%8D%E0%AE%B1%E0%AE%A4%E0%AF%81-%E0%AE%87%E0%AE%99%E0%AF%8D%E0%AE%95%E0%AE%BF%E0%AE%B2%E0%AE%BE%E0%AE%A8%E0%AF%8D%E0%AE%A4%E0%AF%81/article7929849.ece

 

சூப்பர் ஓவரில் பாகிஸ்தானை வீழ்த்தி இங்கிலாந்து ஹாட்ரிக் வெற்றி

 

 

 

 

பாகிஸ்தான்– இங்கிலாந்து அணிகள் மோதிய 3–வது மற்றும் கடைசி 20 ஓவர் கிரிக்கெட் போட்டி சார்ஜாவில் நேற்று பகல்–இரவாக நடந்தது.

முதலில் விளையாடிய இங்கிலாந்து அணி 20 ஓவரில் 8 விக்கெட் இழப்புக்கு 154 ஓட்டம் எடுத்தது. வீன்ஸ் 46 ஓட்டமும், வோக்ஸ் 24 பந்தில் 37 ஓட்டமும் (1 பவுண்டரி, 3 சிக்சர்), ஜோரூட் 32 ஓட்டமும் எடுத்தனர். சோகைல் தன்வீர், அப்ரீடி தலா 2 விக்கெட் கைப்பற்றினர்.

155 ஓட்ட இலக்குடன் பாகிஸ்தான் அணி பின்னர் விளையாடியது. ஒரு முனையில் விக்கெட் விழுந்தாலும் மறுமுனையில் இருந்த முன்னாள் கேப்டன் சோயிப் மாலிக் சிறப்பாக விளையாடி அணியை முன்னேற்றப்பாதைக்கு அழைத்து சென்றார்.

ஆட்டத்தின் கடைசி 2 ஓவரில் பாகிஸ்தான் வெற்றிக்கு 18 ஓட்டங்கள் தேவைப்பட்டது. கைவசம் 4 விக்கெட் இருந்தது. ஜோர்டான் வீசிய 19–வது ஓவரில் 8 ஓட்டங்கள் எடுக்கப்பட்டது.

கடைசி ஓவரில் வெற்றிக்கு 10 ஓட்டங்கள் தேவைப்பட்டது. வோக்ஸ் வீசிய அந்த ஓவரின் முதல் பந்தில் சேயிப் மாலிக் 1 ஓட்டம்  எடுத்தார். 2–வது பந்தில் சோகைல் தன்வீர் சிக்சர் அடித்து அசத்தினார். 3–வது பந்தில் ஓட்டம் இல்லை. 4–வது பந்தில் 1 ஓட்டம்  எடுக்கப்பட்டது. கடைசி 2 பந்தில் 2 ஓட்டங்கள் தேவை.

5–வது பந்தில் சோயிப் மாலிக் ஆட்டம் இழந்தார். கடைசி பந்தில் பாகிஸ்தான் வெற்றிக்கு 2 ஓட்டங்கள் தேவைப்பட்டது. ஆனால் ஒரு ஓட்டமே எக்ஸ்ட்ரா மூலம் எடுக்கப்பட்டது. இதனால் பரபரப்பான இந்த ஆட்டம் சமனிலையில் முடிந்தது.

பாகிஸ்தான் அணி 20 ஓவரில் 7 விக்கெட் இழப்புக்கு 154 ஓட்டங்கள் எடுத்தது. சோயிப் மாலிக் 54 பந்தில் 75 ஓட்டமும் (8 பவுண்டரி, 2 சிக்சர்), அப்ரிடி 20 பந்தில் 29 ஓட்டமும் (3 சிக்சர்) எடுத்தனர். டேவிட் வில்லி 3 விக்கெட் கைப்பற்றினார்.

ஆட்டம் சமனிலை ஆனதால் வெற்றி– தோல்வியை நிர்ணயிக்க சூப்பர் ஓவர் கடைபிடிக்கப்பட்டது. இங்கிலாந்து வீரர் ஜோர்டான் சூப்பர் ஓவரை சிறப்பாக வீசினார். பாகிஸ்தான் அணியால் 3 ஓட்டங்களே எடுக்க முடிந்தது. அப்ரிடியும், உமர் அகமலும் அதிரடியாக ஆட முடியவில்லை. ஓட்ட இலக்கை 1 பந்து எஞ்சி இருந்த நிலையில் எடுத்து சூப்பர் ஓவரில் இங்கிலாந்து வெற்றி பெற்றது.

அந்த அணி பெற்ற ‘ஹாட்ரிக்’ வெற்றியாகும். ஏற்கனவே முதல் 2 ஆட்டத்திலும் வென்று இருந்தது. இதன்மூலம் இங்கிலாந்து 3–0 என்ற கணக்கில் ‘ஒயிட்வாஷ்’ செய்தது. ஒருநாள் தொடரை இங்கிலாந்து 3–1 என்ற கணக்கில் கைப்பற்றி இருந்தது. டெஸ்ட் தொடரை பாகிஸ்தான் 2–0 என்ற கணக்கில் வென்று இருந்தது.

http://www.hirunews.lk/tamil/picture-story/145