வட கொரிய தலைவரின் உயர்மட்ட உதவியாளர் கார் விபத்தில் பலி

  வட கொரிய தலைவர் கிம் ஜாங் உன்னின் உயர்மட்ட உதவியாளர் கிம் யங் கோன் கார் விபத்தில் உயிரிழந்துள்ளார்.

வட கொரிய தலைவர் கிம் ஜாங் உன்னின் உயர்மட்ட உதவியாளர் கார் விபத்தொன்றில் உயிரிழந்துள்ளதாக அந்நாட்டு அரச ஊடகம் தெரிவித்துள்ளது.

கிம் யங் கோன் என்ற எழுபத்து மூன்று வயதான அவர், தென் கொரியாவுடனான உறவுகளை கையாளும் பொறுப்பில் இருந்தார். இரு நாடுகள் மீள இணைவது தொடர்பிலான பேச்சுவார்த்தைகளையும் இவர் கையாண்டு வந்தார்.

கடந்த ஆகஸ்ட் மாதம் தென் மற்றும் வட கொரியாவுக்கு இடையில் பீரங்கித் வெடி பரிமாற்றதை அடுத்து ஏற்பட்டிருந்த பதற்றநிலையை தளர்த்த உதவிய வட கொரிய பிரதிநிதிகள் குழுவில் இவரும் இருந்தார்.

பதற்றம் நிலவிய சமயத்தில் நடந்த உயர்மட்ட பேச்சுக்களில் அர்த்தமுள்ள ஒப்பந்தம் ஒன்றை அடைவதில் கிம் உதவினார் என்று தென் கொரியாவின் ஐக்கியத்திற்கான அமைச்சகத்தின் பேச்சாளர் ஜியோங் ஜீன் ஹீ தெரிவித்துள்ளார்.

இவரை வட கொரிய தலைவரின் நெருங்கிய நண்பர் என்றும் திடமான பங்காளி என்றும் பியாங்யாங்கில் உள்ள அரச ஊடகம் வர்ணித்துள்ளது.

http://www.bbc.com/tamil/global/2015/12/151230_north_korea_official_killed