திருமலை சம்பூரில் அனல் மின் நிலையம் அமைக்கப்படுவதற்கு எதிராகப் போர்க்கொடி தூக்கப்பட்டுள்ளது! அப்படிப் போர்க்கொடி துாக்கியவர்கள் தமிழ்த் தேசியக் கூட்டமைப்பினர் அல்ல. தமிழரசுக் கட்சியினரும் அல்ல. திருமலை மாவட்ட நாடாளுமன்ற உறுப்பினரும் எதிர்க்கட்சித் தலைவருமான இரா. சம்பந்தனுமல்ல.

கிழக்கின் குரல் என்ற சிவில் அமைப்பும் ஜே.வி.பி. தலைவர்களில் ஒருவரான லால்கந்தாவும் சம்பூரில் அனல்மின் நிலையம் அமைப்பதை எதிர்த்து மனித உரிமைகள் ஆணைக்குழுவில் வழக்குத் தாக்கல் செய்துள்ளனர். இந்த அனல் மின்நிலையம் அமைக்கப்படுவதால் சேருவில வாழ் சிங்கள மக்களுக்கு ஒரே ஒரு பாதிப்பு மட்டும்தான். எனினும் அவர்கள் போர்க்கொடி தூக்கிவிட்டனர்.

தமிழ் மக்களுக்கோ அவர்களின் இருப்பையே கேள்விக் குள்ளாக்கும் அடிப்படைப் பாதிப்புகள் பல. ஆனாலும் தமிழ் தேசியக் கூட்டமைப்பு எதிர்த்துக் குரல் எழுப்பவில்லை. அரசாங்கத்துடன் நல்லிணக்க அரசியலை மேற்கொண்ட போதிலும் இது சம்பந்தமாக அவர்கள் தங்கள் ஆட்சேபனையைத் தெரிவிக்கவுமில்லை. அண்மையில் அங்கு விஜயம் செய்த இந்திய வெளியுறவு அமைச்சரிடம் இந்த மின்நிலையத் திட்டத்தை விடும்படி கோரவும் இல்லை.

இந்த மின்நிலையத்திலிருந்து வெளியேற்றப்படும் கரித்துகள்கள் காரணமாக சேருவில வாழ் சிங்கள மக்களுக்கு நுரையீரல் நோய், புற்றுநோய் போன்ற ஆபத்துகள் ஏற்பட வாய்ப்புண்டு.

எனவே – ஜே.வி.பி. போரைத் தொடுத்துவிட்டது. ஆனால் தமிழ் மக்களுக்கு காற்று மாசு ஆபத்துடன் மேலும் பல பாதிப்புகள் உண்டு. சம்பூர் கடல் பல கண்ட மேடைகளைக் கொண்ட பகுதி. இது மீன்கள் இனப்பெருக்கம் செய்யும் பிரதான மையமாகும். மின் நிலையத்திலிருந்து வெளியேறும் நீர் கழிவுகள் காரணமாக இப்பகுதியில் மீன் இனமே அழிவடைந்து விடும். இது சம்பூரை மட்டுமன்றி கிழக்குக் கடலின் மீன் வளத்தையே பாதிக்கும்.

மின் நிலையத் தேவைகள் என்ற பேரில் சம்பூர் மக்களின் ஒரு பகுதி காணிகள் அபகரிக்கப்பட்டுவிடும். அனல் மின் நிலையத்தைத் தொடர்ந்து அமைக்கப்படவுள்ள கைத்தொழில் பேட்டையின் தொழிலாளர்கள் என்ற பேரில் சிங்களக் குடும்பங்கள் குடியேற்றப்பட்டு சம்பூர் சிங்கள மயமாக்கப்படும். இந்தியாவின் உதவியுடன் அமைக்கப்படும் இந்த மின் நிலையத்தால் தமிழ் மக்களுக்கு ஏற்படும் பெரும் பாதிப்புகள் இவை?

ஆனால் தமிழ் தேசியக் கூட்டமைப்பினர் இது பற்றி இந்திய வெளியுறவு அமைச்சரிடம் வாய் திறக்கவே இல்லை. தடுத்து நிறுத்த ஒரு சிறு முயற்சி கூட எடுக்கவில்லை. ஜே.வி.பி சிங்கள மக்களுக்காகக் குரல் கொடுக்கும் அதேவேளையில் இது விடயம் தொடர்பாக தமிழ் தேசியக் கூட்டமைப்பு தமிழ் மக்களுக்காகக் குரல் கொடுக்காதது ஏன்? தமிழ் தேசியக் கூட்டமைப்பு தமிழ் மக்களின் நலனைவிட இலங்கை அரசையும்இ இந்தியப் பெரும் முதலாளித்துவ சக்திகளையும் திருப்திப்படுத்தும் அரசியல் போக்கைக் கையில் எடுத்துள்ளது.

மக்களின் அடிப்படை உரிமைகள் பறிக்கப்படும்போது தயங்கி நிற்கும் தலைமைகளைத் தள்ளிவிழுத்திவிட்டு மக்கள் முன் செல்வார்கள் என்பதைத் தமிழ் தேசியக் கூட்டமைப்பு புரிந்துகொள்ளவேண்டும்.

அதைப் புரிந்துகொள்ள மறந்து தொடர்ந்து ஏமாற்று அரசியலில் பயணித்தால் அவர்கள் வரலாற்றின் குப்பைத் தொட்டிக்குள் வீசப்படுவது தவிர்க்கமுடியாததாகிவிடும்.

தமிழரசுக் கட்சி என்ற போர்வையில் தமிழ் தேசியக் கூட்டமைப்பைச் சேர்ந்த ஒரு சிலர் இப்படியான தமிழ் மக்களுக்கு விரோதமான பாதையில் இட்டுச் செல்வதை அனைவரும் கண்டிக்கவேண்டும்.

கண்டிப்பார்களா?

துளியத்திற்காக அரவிந்தநாதன்

http://thuliyam.com/?p=14241