`இலங்கையில் அடிப்படை உரிமை மீறல் வழக்குகள் அதிகரிப்பு'

`இலங்கை உச்சநீதிமன்றத்தில் தாக்கல் செய்யப்படும் அடிப்படை உரிமை மீறல் வழக்குகள் அதிகரித்துள்ளன' (கோப்புப் படம்)

இலங்கை உச்ச நீதிமன்றத்தில் தாக்கல் செய்யப்படும் அடிப்படை உரிமை மீறல் வழக்குகளின் எண்ணிக்கை அதிகரித்துள்ளதாக, உச்ச நீதிமன்ற தகவல்கள் தெரிவிக்கின்றன.

மஹிந்த ராஜபக்ஷவின் ஆட்சிக்காலத்தில் இந்த எண்ணிக்கை படிப்படியாக குறைந்து வந்திருந்ததாகவும் சுட்டிக்காட்டப்பட்டுள்ளது.

கடந்த 2014 இல் இலங்கை உச்ச நீதிமன்றத்தில் பதிவு செய்யப்பட்ட அடிப்படை உரிமை மீறல் வழக்குகளின் எண்ணிக்கை 370 எனவும், அந்த எண்ணிக்கை 2015 இல் 472ஆக அதிகரித்துள்ளதாகவும் அந்தத் தகவல்கள் மேலும் தெரிவிக்கின்றன.

முன்னாள் அதிபர் மஹிந்தவின் ஆட்சிக் காலத்தில் முன்னாள் பிரதம நீதியரசர் ஷிராணி பண்டாரநாயக்க பதவி நீக்கம் செய்யப்பட்டதன் பின்னர், மக்கள் மத்தியில் அச்சம் ஏற்பட்டதுடன், நீதித்துறை மீது மக்களுக்கு நம்பிக்கையின்மை ஏற்பட்டிருந்ததாகவும் வழக்கறிஞர் பொன்னுத்துரை கிறிஷாந்தன் கூறினார் .

ஆட்சி மாற்றத்தின் பின்னர் நீதிமன்றத்திற்கு சுதந்திரம் கிடைத்ததுடன், நீதிபதிகள் மிகத் தெளிவான தீர்ப்புக்களையும் வழங்கினார்கள், மக்களுக்கு நீதிமன்றத்தின் மீது நம்பிக்கையும் ஏற்பட்டது என அவர் மேலும் தெரிவித்தார்.

அரசியல் பழிவாங்கல்களை எதிர்கொண்டோர், புதிய அரசாங்கம் ஆட்சிக்கு வந்த பின்னர் நம்பிக்கையுடன் வழக்குகளை தாக்கல் செய்ததாக தெரிவிக்கும் அவர், அவர்களுக்கு நீதி கிடைப்பதுடன் நிவாரணங்களும் கிடைக்கின்றன என தெரிவித்தார்.

கடந்த ஆண்டு தாக்கல் செய்யப்பட்ட அடிப்படை உரிமை மீறல் வழக்குகளில் பெரும்பான்மையானவை காவல்துறைக்கு எதிராகவே மேற்கொள்ளப்பட்டதாக தெரிவிக்கப்படுகிறது.

http://www.bbc.com/tamil/sri_lanka/2016/03/160307_srilanka_court