சூடு வைக்கப்பட்டு கொடுமைப்படுத்தப்பட்ட சிறுமி; தந்தையும் வளர்ப்புத் தாயும் கைது

மட்டக்களப்பு காத்தான்குடிப் பொலிஸ் பிரிவிற்குட்பட்ட 6ஆம் குறிச்சி பகுதியில் 10 வயதுடைய சிறுமியொருவருக்கு சூடு வைத்து கொடுமைப்படுத்தப்பட்டு வந்த சம்பவம் தொடர்பில் சிறுமியின் தந்தையும் வளர்புத்தாயும் கைது செய்யப்பட்டுள்ளனர்.

 

காத்தான்குடி ஆறாம் குறிச்சி பதுறியா பகுதியில் வசிக்கும் சிறுமியொருவருக்கு அவரது வளர்ப்புத்தாய்   நெருப்பால் சூடு வைத்ததாகவும் இதனால், அவரது உடம்பில் எரிகாயம் காணப்படுவதாகவும்,சிறுமி  தொடர்ந்தும்  கொடுமைப்படுத்தப்பட்டு  வருவதாகவும்  காத்தான்குடி பிரதேச செயலக சிறுவர் பாதுகாப்புப் பிரிவுக்கு கடந்த வெள்ளிக்கிழமை தகவல் ஒன்று கிடைத்தது.இதனைத் தொடர்ந்து, காத்தான்குடி பிரதேச செயலக சிறுவர் அபிவிருத்தி உத்தியோகத்தர்கள் சிறுமியின் வீட்டுக்குச் சென்று அவரை விசாரித்ததுடன், சிறுமியின் தந்தை மற்றும் வளர்ப்புத்தாயிடமும் விசாரணை செய்தனர்.

 

குறித்த சிறுமி காத்தான்குடி ஆதார வைத்தியசாலையில் அனுமதிக்கப்பட்டு சிகிச்சை பெற்று வரும் நிலையில் சம்பவம் தொடர்பில் தமக்கும் தகவல் வழங்கப்பட்டதையடுத்து தந்தையையும் தாயையும் கைது செய்துள்ளதாக காத்தான்குடிப் பொலிஸார் பொலிஸார் தெரிவித்தனர். 

 

மேற்படி சிறுமியின் தாய் சுகவீனமுற்ற நிலையில் சுமார் மூன்று வருடங்களுக்கு முன்னர் உயிரிழந்ததால் அதன் பின்னர் சிறுமியின் தந்தை மற்றுமொரு திருமணம் செய்த நிலையில் முதல் மனைவியின் இரண்டு பிள்ளைகளும் வளர்ப்புத்தாயிடம் வளர்ந்து வந்துள்ளனர்.

 

சிறுவர்கள் மற்றும் பெண்கள் தொடர்பில் கவனம் செலுத்துவதற்காக நாடு முழுவதுமுள்ள பிரதேச செயலகப் பிரிவுகளில் 5பேர் கொண்ட சிறுவர் மற்றும் பெண்கள் பாதுகாப்புப் பிரிவு நியமிக்கப்பட்டுள்ளமை குறிப்பிடத்தக்கது.

http://onlineuthayan.com/news/10678