அஸ்கிரிய மகாநாயக்கர் இலங்கை சிக்கல்களுக்கு தீர்வுகாண முயன்றவர்: மைத்திரி

மகாநாயக்கர் கலகம ஸ்ரீ அத்ததஸ்ஸி தேரரின் இறுதிச் சடங்கில் கலந்துகொண்டபோது, ஜனாதிபதி இவ்வாறு கூறினார்.

குருநாகலிலுள்ள ஒரு விகாரையில் வைத்து கலகம ஸ்ரீ அத்ததஸ்ஸி தேரரை கடந்த வாரம் சந்தித்து பேசியபோது, நாட்டிலுள்ள பிரச்சனைகளுக்கு தீர்வுகாண்பது தொடர்பில் அவர் தன்னுடன் கலந்துரையாடியதாக ஜனாதிபதி மைத்திரிபால சிறிசேன தெரிவித்தார்.

இதனிடையே, கலகம ஸ்ரீ அத்ததஸ்ஸி தேரர், இலங்கையின் வரலாற்றை நன்கு அறிந்திருந்தவர் எனவும், அவரது ஆலோசனைகள் நாட்டுக்கு உதவியதாகவும் அவரின் உடலுக்கு இறுதி அஞ்சலி செலுத்திவிட்டு ஊடகங்களுக்கு கருத்து தெரிவித்த பிரதமர் ரணில் விக்ரமசிங்க தெரிவித்தார்.

உடல் நலக்குறைவால் கண்டி போதனா மருத்துமனையில் அனுமதிக்கப்பட்டிருந்த அஸ்கிரிய பீடத்தின் மகாநாயக்கர் கலகம ஸ்ரீ அத்ததஸ்ஸி தேரர், 94 வயதில் கடந்த புதன்கிழமை காலமானார்.

கண்டி பொலிஸ் மைதானத்தில் அவரது இறுதிச் சடங்கு நடந்த இன்றைய தினத்தை தேசிய துக்க தினமாக அரசு அறிவித்திருந்தமை குறிப்பிடத்தக்கது.

http://www.bbc.com/tamil/sri_lanka/2016/03/160313_asgiriya_funeral.shtml?ocid=socialflow_facebook