ஐஎஸ்ஸை நிராகரிக்கும் இளைஞர்கள்

மத்தியக் கிழக்கு நாடுகளுக்கு மிகப் பெரிய பிரச்சினையே ஐஎஸ்தான்

அரபு நாடுகளில் வசிக்கும் இளைஞர்களில் பெரும் பாலானவர்கள் ஐஎஸ் அமைப்புக்கு எதிராகத் திரும்பிவருகின்றனர். இஸ்லாமிய அரசை ஐஎஸ் அமைப்பால் அமைக்க முடியாது என்று அரபு இளைஞர்கள் கருதுகின்றனர்.

அரபு நாடுகளைச் சேர்ந்த 18 வயது முதல் 24 வயது வரையிலான 3,500 இளைஞர்களிடம் கருத்துக் கணிப்பு நடத்தப்பட்டது. அல்ஜீரியா, பஹ்ரைன், எகிப்து, இராக், ஜோர்டான், குவைத், லெபனான், மொராக்கோ, ஓமான், பாலஸ்தீனம், கத்தார், சவுதி அரேபியா, துனீசியா, ஐக்கிய அரபு அமீரகம் மற்றும் யேமன் ஆகிய நாடுகளின் இளைஞர்கள் இதில் பங்கேற்றனர். இதை ‘அரபு இளைஞர் சர்வே-2016’ என்ற பெயரில் சர்வதேச வாக்கெடுப்பு நிறுவனமான பென் ஷியான் பெர்லேண்ட் என்ற அமைப்பு, அஸ்டாஸ் பர்சன்-மார்ஸ்டெல்லர் என்ற நிறுவனத்துக்காக நடத்தியது.

ஐஎஸ் அமைப்பு வன்முறைகளைக் கையாளாது என்ற நிலை வந்தால்கூட, அந்த அமைப்புக்குத் தங்களுடைய ஆதரவு தொடரும் என்று 13% பேர் கூறினர். கடந்த ஆண்டில் 19% பேர் இந்த பதிலைக் கூறியிருந்தனர். மத்தியக் கிழக்கு நாடுகளுக்கு மிகப் பெரிய பிரச்சினையே ஐஎஸ் அமைப்புதான் என்று 50% பேர் கூறினர். கடந்த ஆண்டு 37% பேர் மட்டுமே அப்படிக் கருதினர்.

வறண்ட வசந்தம்

பயங்கரவாதிகளுக்கு ஆதரவாக இளைஞர்கள் திரண்டெழுவதற்குக் காரணம் வேலையில்லாத் திண்டாட்டம்தான் என்று இளைஞர்கள் கவலை தெரிவித்துள்ளனர். சர்வே நடந்த 16 நாடுகளில் 8 நாடுகளில் வேலையில்லாத் திண்டாட்டம் மிகக் கடுமையாக நிலவுகிறது. அந்த நாடுகளிலிருந்துதான் இளைஞர்கள் ஐஎஸ் அமைப்பில் சேரச் செல்கின்றனர்.

20 கோடி அரபு இளைஞர்களின் எண்ணங்களை இந்த சர்வே எதிரொலிக்கிறது என்று கருதலாம். ‘அரபு வசந்தம்’ என்ற ஜனநாயக உணர்வுகளுக்கான ஆதரவுப் போராட்டம் தொடங்கிய 5 ஆண்டுகளுக்குப் பிறகு, அரபு இளைஞர்களில் பெரும்பாலானவர்களின் ஆதரவு, ஜனநாயகத்தைவிட நிலையான அரசுக்குத்தான் (அது எப்படிப்பட்ட அரசாக இருந்தாலும்) என்று மாறியிருக்கிறது. 2011 அரபு வசந்தத்துக்குப் பிறகு, தங்கள் பகுதி வளம் பெறும் என்று நம்பியவர்களின் நம்பிக்கை குறைந்துவிட்டது.

ஜனநாயகக் கிளர்ச்சியால் ஏற்பட்ட ஆட்சி மாற்றங்களுக்குப் பிறகு 2012-ல், 72% பேர் அரபு நாடுகள் இப்போது நல்ல நிலைக்கு வந்துவிட்டன என்று கருதினார்கள். இப்போதோ 36% பேர்தான் அப்படி நினைக்கின்றனர். ஜனநாயகம்தான் முக்கியம் என்று 28% பேரும் நிலையான ஆட்சிதான் தேவை என்று 53% பேரும் கருத்துத் தெரிவித்துள்ளனர். 2011-ல் நடத்தப்பட்ட கருத்துக்கணிப்பின்போது ஜனநாயக நாட்டில் வாழ்வதுதான் எங்களுடைய லட்சியம் என்று 92% இளைஞர்கள் கூறியிருந்தனர்.

அரபு நாடுகளில் வேலைவாய்ப்பு குறைந்துவருவது குறித்து பெரும்பாலான இளைஞர்கள் கவலை தெரிவித்தனர். 15 வயது முதல் 24 வயது வரையில் உள்ளவர்களில் 20% பேர் வேலையின்றி இருக்கின்றனர். இது உலகின் பிற பகுதிகளைவிட அதிகம் என்கிறது உலக வங்கியின் அறிக்கை. அரபு நாடுகளில் மொத்தம் 7.5 கோடி இளைஞர்களுக்கு வேலையில்லை என்கிறது சர்வதேசத் தொழிலாளர் அமைப்பு.

சன்னி - ஷியா உறவு

சன்னி, ஷியா பிரிவு முஸ்லிம்களிடையே உறவு மோசமாகிக்கொண்டே வருகிறது என்று 47% இளைஞர்கள் கருதுகின்றனர். சவுதி அரேபியா, ஈரான் ஆகியவற்றின் ஆதிக்கத்துக்கு உட்பட்ட தங்களுடைய பகுதியில் மதம்தான் அரசியலில் முக்கியப் பங்கு வகிக்கிறது என்று 52% இளைஞர்கள் குறிப்பிட்டனர். சிரியா, யேமன் நாடுகளில் நடைபெறும் உள்நாட்டுச் சண்டையில் சவுதி அரேபியாவும் ஈரானும் எதிரெதிர் முகாம்களை ஆதரிக்கின்றன.

சிரியாவில் நடப்பது பிராந்திய, உலக அளவிலான ஆதிக்கச் சக்திகளுக்கு இடையிலான ‘நிழல் யுத்தம்’ என்றே 39% அரபு இளைஞர்கள் கருதுகின்றனர். பஷார்-அல்-அஸ்ஸாத் அரசுக்கு எதிரான புரட்சி என்று 29% இளைஞர்கள் கருதுகின்றனர். சிரியாவிலேயே நடக்கும் ‘உள்நாட்டுச் சண்டை’ என்று 22% பேர் நினைக்கின்றனர்.

ஈரான் மீதான பொருளாதாரத் தடையை நீக்க உதவிய 2015-ம் ஆண்டு சர்வதேச அணுசக்தி உடன்பாட்டை 50% இளைஞர்கள் ஆதரித்தனர். அரபு இளைஞர்களில் 63% பேர் அமெரிக்காவைத் ‘தோழன்’ என்றும் 32% பேர் ‘எதிரி’ என்றும் கருதுகின்றனர்.

மத்தியக் கிழக்கு நாடுகளில் ஜனநாயகம் இல்லாததுதான் வளர்ச்சிக்குப் பெரிய தடையாக இருக்கிறது என்று 22% இளைஞர்கள் கருதுகின்றனர். ஐஎஸ்தான் வளர்ச்சிக்குத் தடை என்று 50% பேர் கருதுகின்றனர். அரபு நாடுகளில் தனி மனித உரிமைகளுக்கும், மனித உரிமைகளுக்கும், அதிலும் குறிப்பாக மகளிர் உரிமைகளுக்கும் தங்களுடைய அரசுகள் செய்ய வேண்டியவை நிறைய இருக்கிறது என்று 67% இளைஞர்கள் நினைக்கின்றனர்.

அமீரகத்துக்கு ஆதரவு

ஐக்கிய அரபு அமீரகம்தான் லட்சிய நாடு, அங்கே பாதுகாப்பான பொருளாதாரம் நிலவுகிறது, வாழ்வதற்குத் தகுதியான நாடு அதுதான் என்று பெரும்பாலான இளைஞர்கள் கருத்துத் தெரிவித்தனர்.

மக்களால் தேர்ந்தெடுக்கப்பட்ட அமைப்புகள் இல்லாமலேயே பாரம்பரியமாக சிறப்பாக நிர்வகிக்கப்படுகிற நாடு ஐக்கிய அரபு அமீரகம். அங்குதான் வாழ வேண்டும் என்று 22% இளைஞர்கள் கருதுகின்றனர். எங்கள் நாடும் ஐக்கிய அரபு அமீரகம் போல மாற வேண்டும் என்று 23% பேர் நினைக்கின்றனர்.

கருத்து தெரிவித்த இளைஞர்களில் 66% பேர், சர்வதேசச் சந்தையில் கச்சா பெட்ரோலிய எண்ணெய் விலை வீழ்ச்சி அடைந்திருப்பது குறித்து கவலைப்பட்டனர். அரசுக்கு வருவாய் குறைந்தாலும் மானிய விலையில் தங்களுக்குத் தரும் பெட்ரோல், டீசலை அரசு குறைக்கக் கூடாது என்றே 78% பேர் கருத்து தெரிவித்தனர்.

அரபு இளைஞர்கள் தங்களுக்குத் தேவைப் படும் அன்றாடச் செய்திகளை ஆன்-லைன், தொலைக்காட்சி மற்றும் செய்தித்தாள்கள் மூலம் பெறுகின்றனர்.

32% பேர் இணைய தளத்தில் வாசிக்கின்றனர். 29% தொலைக்காட்சி வாயிலாக அறிகின்றனர். 7% மட்டுமே செய்தித்தாள்கள் மூலம் நாட்டு நடப்புகளை அறிகின்றனர். 2015-ல் செய்தித்தாள் மூலம் அறிபவர்கள் எண்ணிக்கை 13% ஆக இருந்தது.

அரபு இளைஞர்கள் ஐஎஸ் ஆதரவுப்போக்கை கைவிட்டுவருகின்றனர்; வளர்ச்சி, வேலைவாய்ப்பு, நிலையான அரசு ஆகியவற்றையே அவர்கள் விரும்புகின்றனர் என்பதையும் இந்த ஆய்வு வெளிப்படுத்தியது.

தமிழில்: சாரி, ©: ‘தி கார்டியன்’