தமிழ் மக்களுக்கு எதிரான நடவடிக்கைகள் எவை?; முதல்வரிடம் வினவிய ஐரோப்பிய ஒன்றியப் பிரதிநிதிகள்

தமிழ் மக்களுக்கு எதிராக அல்லது  அவர்களால் ஏற்றுக் கொள்ள முடியாத எவ்வித நடவடிக்கைகள் முன்னெடுக்கப்படுகின்றனவென நேற்று திங்கட்கிழமை யாழ்ப்பாணம் விஜயம் செய்த ஐரோப்பிய ஒன்றியக் குழுவினர் கேட்டதாக வடக்கு மாகாண முதலமைச்சர்  சி.வி.விக்னேஸ்வரன் தெரிவித்துள்ளார்.

ஐரோப்பிய ஒன்றியத்தின் பதில்நிலைத் தலைவர் போல் கொட்றி தலைமையிலான பிரதிநிதிகள் நேற்று திங்கட்கிழமை யாழ்ப்பாணத்திற்கு விஜயம் செய்திருந்தனர். அவர்கள் வடக்கு மாகாண முதலமைச்சரை கைதடியிலுள்ள அவரது  செயலகத்தில் சந்தித்து கலந்துரையாடினர்.

இதன் போது இங்குள்ள நிலைமைகள் தொடர்பில் நீண்ட நேரம் இரு தரப்பினரும் பேசியிருந்தனர். சந்திப்பின் முடிவில் சந்திப்பு தொடர்பாக ஊடகங்களுக்கு கருத்து வெளியிட்ட போதே முதலமைச்சர் மேற்கண்டவாறு தெரிவித்தார்.  இங்கு எத்தகைய பொருத்தமற்ற செயற்பாடுகள்  இடம்பெறுகின்றன என்று என்னிடம் கேட்டனர்.

அதற்கு நான் சமஷ்டி என்பது பிரிவினை என்ற கருத்தை சிங்கள மக்களிடையே இதுவரை காலமும் தெற்கு அரசியல்வாதிகள் பரப்பி வந்திருக்கின்றார்கள் என்றும் அது பிழையானதொன்று என்றும் சுட்டிக்காட்டியிருந்தேன்.

மேலும் சமஷ்டி என்பது பிரிவினை அல்ல; சமஷ்டி என்பது  மக்களைச் சேர்க்கின்ற அல்லது  சேர்த்து  வைத்தல் ஆகும். ஆனால் தங்களை தங்களுக்குரிய இடங்களில் ; தங்களைத் தாங்களே நிர்வகித்துக்கொள்ளக் கூடிய நிலைமையை வழிவகுத்தல் ஆகும். 

ஆகவே இது சம்மந்தமாக மக்களுக்கு எடுத்தியம்ப வேண்டியதொரு அவசியம். தெற்கிலுள்ள அரசியல் வாதிகளுக்கு இருப்பதையும் அவர்கள்  அதனைச் செய்கின்றார்கள் இல்லை என்பதையும் ஐரோப்பிய ஒன்றியம் கருத்திலெடுக்க வேண்டுமென்றும் குறிப்பிட்டேன்.

அவர்களுக்கு அவ்வாறு செய்ய வேண்டியதன் அவசியத்தையும் எடுத்துக் கூறினேன். மக்களுக்கு உண்மையான கருத்துக்கள் தெரியப்படுத்தப்பட வேண்டும். அது தொடர்பாக அறிய வேண்டுமென்ற எண்ணம் தெற்கிலுள்ளவர்களுக்கு இருந்தால் மக்கள் எல்லோருமே நல்லிணக்கத்திற்காக, சமஷ்டி ரீதியான ஒரு தீர்வைப் பெறுவதற்கு ஒத்துழைப்பு நல்குவார்கள் என்பது என்னுடைய கருத்து என்று குறிப்பிட்டேன். 

இதே வேளை சமஷ்டி என்ற சொல்லைப் பாவிக்கத் தேவையில்லை. மக்களுக்குக் கொடுக்க வேண்டிய அதிகாரபரவலைப் பற்றி நாங்கள் குறிப்பிடலாம் என்று சொல்லியிருந்தேன். ஆகவே இது சம்பந்தமாக தாம் தெற்கிலுள்ளவர்களுடன் பேசுவதாகவும் அவர்கள் என்னிடம் கூறிச் சென்றுள்ளனர் என முதலமைச்சர் மேலும் தெரிவித்தார்.  

http://www.thinakkural.lk/article.php?local/atajitdwsl475039dd987a9d20616owbrm27f1045aa0ad3ed5995dd2hrpc0#sthash.CEjo4pUP.dpuf