மு.காங்கிரஸிலிருந்து விலக நிஜாமுதீன் எம்.பி. முடிவு? அமைச்சுப் பதவி கிடைக்காததால் ஏமாற்றம்.

மு.காங்கிரஸிலிருந்து விலக நிஜாமுதீன் எம்.பி. முடிவு? அமைச்சுப் பதவி கிடைக்காததால் ஏமாற்றம்.

அமைச்சுப் பதவி பெற்றுத் தருவதாகக்கூறி ஸ்ரீலங்கா முஸ்லிம் காங்கிரஸின் தலைவர் ரவூப் ஹக்கீமால் ஜனாதிபதி செயலகத்திற்கு அழைத்துச் செல்லப்பட்டு இறுதி நேரத்தில் ஏமாற்றப்பட்டார் எனக் கூறப்படும் அக்கட்சியைச் சேர்ந்த எம்.பியான நிஜாமுதீன் அக்கட்சியை விட்டு விலகத் தீர்மானித்துள்ளார் என்று தெரியவருகின்றது.

ஜனாதிபதி செயலகத்தில் இடம்பெற்ற அமைச்சரவை மாற்றத்தின்போது ஸ்ரீலங்கா முஸ்லிம் காங்கிரஸும் அரசுடன் இணைந்து அமைச்சுப் பதவிகளைப் பெற்றுக்கொண்டது. கட்சியின் மொத்தம் 6 எம்.பிக்களில் ஐவர் அமைச்சுப் பதவிகளை ஏற்றனர். நிஜா முதீனுக்கு மாத்திரம் அமைச்சுப் பதவி வழங்கப்படவில்லை.

அமைச்சுப் பதவிகளை ஏற்பதற்கு ஜனாதிபதி செயலகத்திற்குச் செல்ல மு.கா. எம்.பிக்கள் தயாரான வேளையில் நிஜாமுதீனுக்கும் அமைச்சுப் பதவி கிடைக்கவுள்ளது எனக்கூறி அவரை ரவூப் ஹக்கீம் அழைத்துச் சென்று இறுதியில் அமைச்சுப் பதவி பெற்றுக்கொடுக்காமல் ஏமாற்றிவிட்டார் என நிஜாமுதீன் கூறியுள்ளார்.

இது தொடர்பாக நிஜாமுதீன் மேலும் கூறியிருப்பதாவது:

கட்சியில் இருப்பவர்களில் நான்தான் மிகவும் சிரேஷ்ட உறுப்பினர். பல காரணங்களைக் காட்டி பலர் கட்சியை விட்டு விலகிச் சென்ற போதிலும் கட்சியை வளர்த்தெடுக்கும் நோக்கில் நானும் அவ்வாறு விலகிச் சென்று அமைச்சுப் பதவிகளைப் பெறவிரும்பவில்லை. இப்போது கூட எனக்கு அமைச்சுப் பதவி வேண்டும் என்று நான் விடாப்பிடியாக இருக்கவில்லை. ஆனால், அமைச்சுப் பதவி ஏற்கும் இறுதி நேரத்தில் எனக்கும் அமைச்சுப் பதவி உண்டு என்று கூறி ரவூப் ஹக்கீம் என்னையும் ஜனாதிபதி செயலகத்திற்கு அழைத்துச் சென்றார். அங்கு சென்றதும் எனக்கு அமைச்சுப் பதவி இல்லை என்பதை உணர்ந்தேன். ஹக்கீம் எதற்காக என்னை அழைத்து வந்து இவ்வாறு அவமானப்படுத்தினார் என்று எனக்குத் தெரியவில்லை. ஹக்கீம் அங்கே ஒளிந்துவிட்டார். ஆனால், தனது கட்சிக்கு எத்தனை அமைச்சுப் பதவிகள் கிடைக்கப்போகின்றன என்று ஹக்கீமுக்கு எதுவும் தெரியாது. அமைச்சுப் பதவிகளைப் பெற்றுக்கொள்ள வாருங்கள் என்று ஜனாதிபதி அழைத்ததும் தருவன தரட்டும் என்ற நோக்கில் தான் ஹக்கீம் எம்மை அழைத்துச் சென்றுள்ளார்.

ஓர் உறுதி இல்லாத பேரம் பேசுகின்ற முஸ்லிம்களின் பிரச்சினையை எதிர்த்து நிற்கத் திராணி இல்லாத ஹக்கீமால் ஒரு போதும் முஸ்லிம்களுக்கு விடிவு வரப்போவதில்லை. ஹக்கீமின் தலைமையில்தான் இனி முஸ்லிம்கள் அதிக துன்பத்தை அனுபவிக்கப்போகின்றனர்.

ஹக்கீம் போன்றதொரு தலைவரின் கீழ் நான் இவ்வளவு காலமும் அரசியல் நடத்தியதையிட்டு மிகவும் கவலைப்படுகின்றேன். ஹக்கீமின் தான்தோன்றித்தனமான செயற்பாடுகள் காரணமாகத்தான் பலர் கட்சியில் இருந்து விலகினார்கள் என்பது இப்போது எனது விடயத்தில் தெளிவாகியுள்ளது.

எனக்கு அமைச்சுப் பதவி தரவில்லை என்று நான் கவலைப்படவில்லை. என்னைக் கூட்டிச்சென்று ஏமாற்றியதையிட்டுத்தான் கவலைப்படுகிறேன். இப்படித்தானே இவர் முஸ்லிம் சமூகத்தையும் ஏமாற்றுவார்.

இவரது தலைமையின் கீழ் முஸ்லிம் காங்கிரஸ் மேலும் மேலும் அழியப்போவதும் முஸ்லிம்கள் துன்பப்படப்போவதும் நிச்சயம். முஸ்லிம் காங்கிரஸ் உடனான எனது அரசியல் உறவுகுறித்து நான் யோசித்து இறுதி முடிவெடுக்க வேண்டிய கட்டாயத்தில் உள்ளேன் என்றார். இதேவேளை, தேசிய காங்கிரஸின் தலைவர் அமைச்சர் அதாவுல்லாஹ், நிஜாமுதீனைத் தொடர்புகொண்டு பேசினார் என்றும் தமது கட்சியில் இணைந்துகொள்ளுமாறு அதாவுல்லாஹ் அழைப்புவிடுத்தார் என்றும் தகவல் அறிந்த வட்டாரங்கள் கூறுகின்றன.

பெரும்பாலும் மு.கா. வைவிட்டு விலகி வேறொரு கட்சியில் இணைவது தொடர்பாக நிஜாமுதீன் தீவிரமாக யோசித்து வருகிறார் என்றே தெரியவருகிறது. நாடாளுமன்றில் எதிர்க்கட்சி வரிசையில் அவர் அமரப்போகின்றார் என்றும் தகவல் அடிப்படுகிறது.

-Sudaroli-