2016-ம் ஆண்டு, ரசிகர்களுக்கு வெள்ளித்திரை அளித்தது வகைவகையான  விருந்து. குறிப்பாக, கதாநாயகிகளுக்கு இணையாக துணைக் கதாபாத்திரங்கள் ஏற்ற நடிகைகள் ஸ்கோர் செய்யும் வாய்ப்பு, பல திரைக்கதைகளில் வழங்கப்பட்டன. அப்படி ரசிகர்களால் பெரிதும் பேசப்பட்டவர்களில் சிலர்... 

மியா ஜார்ஜ்

தொடரும் பெண் பார்க்கும் படலம், ஏதோ ஒரு காரணத்தால் கைநழுவிச் சென்றுகொண்டே இருக்கும் திருமண யோகம்... இந்தச் சூழல் ஒரு கிராமத்து அப்பாவிப் பெண்ணின் மனதை எப்படியெல்லாம் பாதிக்கிறது என்பதை அழுத்தமாகச் சொன்ன படம் 'ஒருநாள் கூத்து'. 'லட்சுமி' கேரக்டரில், கிராமப்புற இளம் பெண்களின் நிலையையும், உணர்வுகளையும் மியா ஜார்ஜ் தன் கண்களாலும், ஆர்ப்பாட்டமில்லாத நடிப்பாலும் அழுத்தமாகப் பதிவுசெய்திருந்தார். பெண் பார்க்க வரும் மாப்பிள்ளையை தனக்குப் பிடித்திருந்தாலும், அப்பாவின் பேச்சை மீறாத மகளாக தன் சோகங்களை மனதிலேயே புதைத்துக்கொள்வதும், தலைநிமிர்ந்துகூட பேசாதவர் வீட்டைவிட்டு  வெளியேறுவதும், பிறகு சிக்கல் ஏற்பட்டு மீண்டும் வீட்டுக்கே வருவதும், இறுதியில் எப்படியோ ஒரு மாப்பிள்ளையுடன் தனக்கு திருமணம் செட் ஆவதும் என... எதார்த்தமான நடிப்பால் அசத்திவிட்டார் மியா ஜார்ஜ்!

'கொளப்புள்ளி' லீலா!

சென்ற வருடம் நம்மை சோகத்தில் ஆழ்த்தி விடைபெற்றுச் சென்ற ஆச்சி மனோரமாவை, இந்த ஆண்டு 'மருது' படத்தில் தன் 'அப்பத்தா' கேரக்டர் மூலமாக நம் நினைவுக்குக் கொண்டுவந்தவர் 'கொளப்புள்ளி' லீலா. தமிழ் தெரியாததால் வசனங்களை தன் தாய்மொழியான மலையாளத்தில் எழுதி வைத்துப் பேசினாலும், முகபாவனைகளிலும் வார்த்தை உச்சரிப்பிலும் அசத்திவிட்டார். குறிப்பாக வில்லன் குழுவால் தலையில் எண்ணெய் தேய்க்கப்பட்டு, குளிர்ந்த தண்ணீரில் முக்கி எடுக்கப்பட்ட காட்சிகளின் பெரிய பலம், இவரது கண்கள். மதுரை வட்டார உடல்மொழியுடன் நம்மை கவர்ந்த இந்த அப்பத்தாவை, தமிழ் சினிமா சிறப்பாகப்  பயன்படுத்திக்கொள்ளலாம்.

ஐஸ்வர்யா ராஜேஷ்!

ஒரு பக்கம் ஹிரோயினாக நடித்து வந்தாலும், மறுபக்கம் சில படங்களில் அழுத்தமான கேரக்டர் ரோல்களிலும் தடம் பதித்து வரும் ஐஸ்வர்யா ராஜேஷுக்கு, இந்த ஆண்டு நல் ஆண்டு. குறிப்பாக 'தர்மதுரை' படத்தில் மூன்று கதாநாயகிகள் இருந்தாலும், 'அன்புச்செல்வி'யை அவ்வளவு எளிதில் மறக்க முடியுமா?! கிராமத்துப் பெண்ணின் எதார்த்த குணங்களால் ஈர்க்கப்பட்டு காதல் வயப்படும் விஜய் சேதுபதியை, முதலில் 'அண்ணே' எனக் கூப்பிட்டு, பின்னர் விஜய் சேதுபதி தன்னை பெண் கேட்டு வரும்போது 'மாமா' என அழைத்து ரசிக்க வைத்தவர், தன் அப்பாவுக்குக் கஷ்டம் தரக்கூடாதென தன்னையே மாய்த்துக்கொள்ளும் காட்சியில் கலங்கவைத்தார்! 

தீபா ராமானுஜம்

கே.பாலச்சந்தரின் 'பிரேமி' உள்ளிட்ட சில சீரியல்களில் நடித்த தீபா ராமானுஜம், நடுவில் கொஞ்சம் நாள் மிஸ்ஸிங். நடிகை, நாடக் கலைஞர், நிகழ்ச்சித் தொகுப்பாளர், இயக்குநர், டயட்டீஷியன் என பன்முகங்களைக் கொண்டவர்... இந்த ஆண்டில் மூன்று படங்களில் நடித்து ரீ-என்ட்ரி கொடுத்து, பலரையும் கவனிக்க வைத்தார். 'ரஜினி முருகன்' படத்தில் சிவகார்த்திகேயனுக்கு அம்மா, 'பிச்சைக்காரன்' படத்தில் விஜய் ஆண்டனிக்கு அம்மா, 'இது நம்ம ஆளு' படத்தில் நயன்தாராவுக்கு அம்மா என, அழகு அம்மா. குறிப்பாக, 'பிச்சைக்காரன்' படத்தில் தந்தை இல்லாத மகனை வளர்த்து ஆளாக்கும் தாய். அந்த ஃப்ளாஷ் பேக் பாடலில், நம் மனதில் எக்கச்சக்க இடம் பிடித்தார் தீபா.   

தன்ஷிகா!

'கபாலி' படத்தில் ஆக்‌ஷனில் தெறிக்கவிட்டிருந்தார் 'யோகிதா'  தன்ஷிகா. வில்லன் கிஷோரால் தன் அப்பா ரஜினியையே கொலைசெய்ய அனுப்பப்படும் தன்ஷிகா, பின்னர் தன் அப்பாவுடன் கைகோத்து வில்லன்களை துவம்சம் செய்யும் கதைக்களம். அட்டகாச ஹேர்ஸ்டைல், கேங்ஸ்டர் உடல்மொழி என, இதுவரைப் பார்த்த தன்ஷிகாவை மறக்கவைத்து, 'யோகிதா'வை ரசிக்கச் செய்தார். சூப்பர் ஸ்டாரின் படத்திலும் தனக்கென்று ஸ்கோர் செய்த பவர்ஃபுல் கேரக்டர்!