மதவாச்சி பிரதான வீதியில் இரு மணிநேரம் கடும் மோதல்

மதவாச்சி பிரதான வீதியில் இரு மணிநேரம் கடும் மோதல்

பன்னவெட்டுவான் பகுதியில் நேற்று ஞாயிற்றுக்கிழமை காலை விடுதலைப் புலிகளுக்கும் பொலிஸாருக்குமிடையில் சுமார் இரு மணிநேரம் கடும் மோதல்கள் இடம்பெற்றுள்ளன.

நேற்றுக் காலை 8.30 மணிக்கு ஆரம்பமான இருதரப்பினருக்குமிடையிலான மோதல் சம்பவம் காலை 10.30 மணி வரை நீடித்துள்ளது.

இந்த மோதல் சம்பவத்தில் விடுதலைப் புலிகள் தரப்பில் ஒருவர் உயிரிழந்துள்ளதாகவும் அவரின் சடலத்தை தமது கட்டுப்பாட்டு பிரதேசத்திற்கு அவர்கள் எடுத்துச் சென்றுள்ளதாகவும் தெரிவிக்கப்படுகின்றது.

சம்பவ இடத்திற்கு மேலதிக படையினர் வரவழைக்கப்பட்டு தேடுதல் மேற்கொண்ட போது ரி-56 ரக துப்பாக்கியொன்றும் அதற்குரிய மகஷின்களும் மீட்கப்பட்டுள்ளதாக முருங்கன் பொலிஸ் நிலையப் பொறுப்பதிகாரி தெரிவித்தார்.

இதேவேளை, இந்த மோதல் சம்பவத்தையடுத்து மன்னார்- மதவாச்சி வீதியூடான போக்குவரத்து நடவடிக்கைகள் ஸ்தம்பிதமடைந்து நண்பகலுக்கு பின்னரே வழமைக்கு திரும்பியது.

இதேநேரம், நேற்று முன்தினம் சனிக் கிழமை இரவு வங்காலை புனித ஆனார் தேவாலயத்திற்கு முன்பாகவுள்ள படையினரின் காவலரண் மீது கைக்குண்டுத் தாக்குதல் மேற்கொள்ளப்பட்டுள்ளது.

இந்த தாக்குதல் சம்பவத்தில் எவருக்கும் எந்தவொரு சேதமும் ஏற்படவில்லை.

இதனையடுத்து நேற்றுக் காலை படையினர் இப்பகுதியில் பெருமளவிலான சுற்றிவளைப்பு தேடுதல் நடவடிக்கையில் ஈடுபட்ட போதிலும் எவரும் கைது செய்யப்படவில்லை.

அத்துடன், நேற்றுக் காலை வங்காலை புனித ஆனார் தேவாலயத்திற்கு ஞாயிறு ஆராதனைக்கு சென்ற பொதுமக்களை அழைத்த படையினர் அறிவுறுத்தல் கூட்டமொன்றை நடத்தியுள்ளனர்.

இனந்தெரியாத நபர்களின் நடமாட்டம் காணப்பட்டால் தமக்கு அறிவிக்கும்படியும் தாக்குதல் நடவடிக்கைகளுக்கு பொதுமக்கள் ஒருபோதும் இடமளிக்கக்கூடாதென்றும் படைத்தரப்பினரால் அறிவுறுத்தப்பட்டுள்ளது.

http://www.tamilwin.com