வேலை தேடிச்சென்று ஈராக் நாட்டில் அந்தரித்த 17 இலங்கைத் தமிழர்கள் ஐ.நா. உதவியுடன் திங்களன்று நாடு திரும்பினர்

வேலை தேடிச்சென்று ஈராக் நாட்டில் அந்தரித்த 17 இலங்கைத் தமிழர்கள் ஐ.நா. உதவியுடன் திங்களன்று நாடு திரும்பினர்

வளைகுடாவில் வேலைவாய்ப்புப் பெற்றுத் தருவதாகக்கூறி ஏமாற்றி அழைத்துச் செல்லப்பட்ட இலங்கைத் தமிழர்கள் 17 பேர் ஈராக்கிலுள்ள வீடொன்றில் ஒருமாதகாலமாக அடைத்து வைக்கப்பட்டிருந்தமை தெரியவந்துள்ளது. அவர்கள் பின்னர் கடந்த திங்கட்கிழமை இலங்கைக்கு அனுப்பப்பட்டனர் என்று சர்வதேச குடியகல்வு நிறுவனம் தெரிவித்துள்ளது.

இலங்கையைச் சேர்ந்த இந்த 17 தமிழர்களும் வளைகுடா நாடொன்றிக்கு வேலை வாய்ப்பைப் பெறுவதற்காக இலங்கையிலுள்ள வெளிநாட்டு வேலைவாய்ப்பு முகவர் நிலையம் ஒன்றுக்குத் தலா இரண்டாயிரம் அமெரிக்க டொலர்களைக் கட்டணமாகச் செலுத்திய பின்னர், அவர்கள் இந்த முகவர் நிலையத்தால் ஈராக்கிற்கு அழைத்துச் செல்லப்பட்டுள்ளனர்.

இந்த முகவர் நிலையம் இவர்களை வேறொரு முகவர் நிலையத்திடம் ஒப்படைத்திருந்தது. இவர்களின் கடவுச்சீட்டுகள் அத்தனையும் அந்த முகவர் நிலையத்தால் பறிக்கப்பட்டதோடு ஈராக்கிலுள்ள இர்பில் நகரில் உள்ள வீடொன்றில் இவர்கள் சிறை வைக்கப்பட்டிருந்தனர்.

இவர்களுக்கு அங்கு எதுவித வசதிகளும் செய்து கொடுக்கப்படவில்லை என்று தெரிவிக்கப்படுகின்றது. இவர்கள் தங்களை இலங்கைக்கு அனுப்பி வைக்குமாறு முகவர் நிலைய அதிகாரிகளைக் கேட்டுக் கொண்டபோது அவர்கள் அந்த அதிகாரிகளிடமிருந்து அச்சுறுத்தலை எதிர்நோக்கினர்.

இவர்கள் ஏற்கனவே தங்கவைக்கப்பட்டிருந்த இடத்தில் இருந்து வேறொரு இடத்திற்கு மாற்றப்பட்டு அழைத்துச் செல்லப்பட்டுக் கொண்டிருந்த சமயம் வழியில் ஐ.நா. அலுவலகம் ஒன்றைக் கண்டுள்ளனர்.

ஒருவாறு சிரமப்பட்டு இவர்கள் அந்த ஐ.நா. அலுவலகத்திற்குத் தகவல் கொடுத்துள்ளனர். தகவலின்படி சர்வதேச குடியகல்வு நிறுவனம் இவர்களை மீட்டது என அந்நிறுவனம் தெரிவித்துள்ளது.

இவர்கள் ஜோர்தானுக்கு அனுப்பப்பட்டு அங்கிருந்து திங்கட்கிழமை இலங்கைக்கு அனுப்பப்பட்டனர் என்று சர்வதேச குடியகல்வு நிறுவனத்தின் பேச்சாளர் ஜெமினி பன்டியா தெரிவித்துள்ளார்

- சுடர் ஒளி